2Sam. 21 - BUKO SIPUNENAN

Muntogat Saul tuukumake simateiakenen

¹ Kateteret puparentaat David, bara pulajeat sabeu telu ngarura burunia. Lepa ei si David masitiddou enungan katubut Tuhan. Kuanangan si Tuhan, “Pulajeat sabeu nene iate kalulut puseleat Saul samba sangalalepnia aramateiake tai Gibeon.”

² (Tai Gibeon nene ta tai Israel, sia nene iate tai Amori sipulelegei. Tai Israel aiat palelenganda bule rapasikeli sia, tapoi si Saul masibesiake isubuake sia kalulut aipaatu puuktunganda tai Israel samba Jehuda.) Lepa sogainangan tai Gibeon si David

³ samba rerenangan sia, “Aponia momoi kugalaiake katubumui samba aponnia momoi kubaraake sibailiu panebui, bule nusukatake kam paamian Tuhan?”

⁴ Alegirangannia tai Gibeon, “Pakaroatmai katubut Saul samba ka sangalalepnia tamomoi tulepaake ka mas ele perak, tapoi ta leuet koba kai masimateiake berisara sirimanua tai Israel.” Lepa kuanangan si David, “Ke kisedda, aponia le kiddiet bagamui galaiakenenku?”

⁵ Alegirangannia, “Si Saul rimata sipilit Tuhan ioba masisubuake kai sangamberimai pat tata kai ka sangaliot Israel.

⁶ Kalulut nenda, ake pitu sia sibara ka muntogatnia taimanteu, bule kutiggotake kai sia kamatat Tuhan ka Gibea, ka laggai Rimata Saul.” Aleginangannia rimata, “Kauan, aile kuake sia katubumui.”

⁷ Tapoi kalulut amusuppangan si David samba si Jonatan, bailiu si David ta aikau si Mefiboset katubutda.

⁸ Tapoi si David masiala si Armoni samba si Mefiboset bagei, iate tatogat Saul taimanteu situ'tuakenen Rizpa togat Aya, samba ka lima taimanteu tatogat Merab togat Saul sinanalep, situ'tuakenen Adriel togat Barzilai tai Mehola.

⁹ Iageti kaunangan sia katubutda tai Gibeon. Lepa tiggotakerangan sia tai Gibeon ka uddut leleu kamatat Tuhan. Pitutda nenda matei sia simakere. Ukuman simateiakenen nenda tugalaiake ka panandaat pasimoneiat, kateteret tutaddake masigetai gandum.

¹⁰ Lepa geti alanangan komak goni si Rizpa togat Aya samba nga'ngaakenangannia ka sia ka uddut leleu bukku, barania ka panandaat pasimoneiat pat bele urat sibara ka manua ka uddut tubutda simamatei nenda; ta iobaake ioi uma sinago masigeugeu tubu simamatei nenda, ele ioi sinoibo tarimeu simasabbak sikuddu kabakkat loina.

¹¹ Kele arapaagainia katubut David sigalaiakenen Rizpa togat Aya, sinanalep Saul kabebe nenda,

¹² ei si David masiala sangamberi tolat Saul samba tolat Jonatan, togat Saul ka sipulalaggai ka Jabesh ka Gilead. (Sipasinanangkou sangamberi tolat nenda ka polak simalio ka laggai Bet ka San. Ka kudduat aratiggotake si Saul kateteret arakalaake si Saul tai Filistin ka pasaggangan ka leleu Gilboa.)

¹³ Sangamberi tolat Saul samba tolat Jonatan nenda ambitnangannia sibara sedda, lepa ruruakeranangannia leu sangamberi tolatda sipitu sirimanua sitiggotakenen nenda.

¹⁴ Iageti rateiakerangan sangamberi tolat Saul samba tolat Jonatan samba leu tolatda sipitu sirimanua nenda kabagat puariat Kish ukkui Saul ka Zela ka kupkumen laggai Benjamin. Kele ailepa aitugalaiake sangamberinia nenda siripot siparentaakenen rimata, iageti arepinangan Taikamanua panindogatda ka laggai nenda.

Pasaggangan masisaggangi tai Filistin

¹⁵ Kateteret aibara minca pasagganganda tai Israel samba tai Filistin, ei si David sambatda saladdunia masisaggangi tai Filistin. Kabagat pasaggangan nenda masaggonangan si David.

¹⁶ Lepa oi sara sirimanua sabeu tubu sipuoni Jibish-Benob. Simuine bakkatnia sigalai sibara ka perunggu, sane'nia telu ngakilo sitenga. Ai leuet lanjaunia sibau samba matonem bagania momoi imateiake si David.

¹⁷ Tapoi oi si Abisai togat Zeruya masiropake si David. Sagganginangan sirimanua sabeu tubu nenda samba mateiakenangannia. Lepa nenda tiddourangan saladdut David katubunia bule taioi minca pasaggak, kuarangannia “Buian nuoi minca pasaggak pasambamai, bule bui numatei samba imasusu muntogat Israel.

¹⁸ Lepa nenda bara minca pasaggangan ka Gob rasaggangi tai Filistin. Kabagat pasaggangan nenda si Sibkhai tai Husa masimateiake sara sirimanua sabeu tubu sipuoni Saf.

¹⁹ Samba bara minca pasaggangan ka Gob rasaggangi tai Filistin, Kabagat pasaggangan nenda si Elhanan togat Jair tai Betlehem masimateiake si Goliat sibara ka Gat. Uman simuinebakkat Goliat nenda kele beunan pasigalai komak.

²⁰ Lepa bara minca pasaggangan ka Gat rasaggangi tai Filistin. Sedda ai sara sirimanua sabeu tubu bulat sioba pasaggak. Ka rua ngasilat kabeinia ai enem singongainia kisedda leuet ka rua ngasilat rerenia.

²¹ Paloloinangan tai Israel, kalulut nenda, mateiakenangannia si Jonatan togat Simea, kebbut David.

²² Ka epat sirimanua simateiakenen David samba simateiakenenda saladdunia nenda, iate muntogat sirimanua sabeu tubu ka Gat.