2Sam. 20 - BUKO SIPUNENAN

Pugaugaupat sibaraakenen Seba

¹ Ka laggai Gilgal ai sara sirimanua sikatai paraboat oninia Seba, togat Bikri, sibara ka suku Benjamin. Kateteret araoi mungkuat David, nauakenangan pipiau si Seba samba kuanangan, “Ta'anai tiboi tubutta katubut David. Apangan le lulunia tatututnia” Kam tai Israel, sita kam tatoili!”

² Lepa tuitui sangamberi tai Israel rakaddiuake si David samba tutrangan si Seba togat Bikri. Tapoi tai Jehuda mariuriu le ratut si David barania ka bagat oinan Jordan pat aili ka Jerusalem.

³ Kele aisege si David ka uma purimataatnia ka Jerusalem, alanangan sipulu tainanalepnia kabebe nenda sikaddiuakenennia sipasijago uma purimataat. Lepa kaunangan sia kabagat lalep airajajago sia sipujajago. Pasikelinangan purimanuaiatda, tapoi ta aipaperepake sia. Oto tusaraake le kudduatda kele tailumang pat matei sia.

⁴ Kuanangan rimata katubut Amasa, “Ruruake sangamberi tai Jehuda kabagat telu ngagogoi, lepa oi ekeu minca sene!”

⁵ Lepa ei si Amasa masiruruake tai Jehuda, tapoi ta atoilinia siripot gogoi sitetreakenen rimata.

⁶ Iageti kuanangan rimata katubut Amasa, “Kineneiget bulat sigejaake bagatta iate si Seba togat Bikri, bele peile katubut Absalom. Oto ambit saladduku samba kukru kam nia, bule bui ikudduiji laggai simaron samba babara mututuituinia.”

⁷ Iageti kabagat paneneieat Abisai, saladdut Joab samba saladdu sipasijago rimata samba leu sangamberi saladdu sabagei tuitui sia baratda ka Jerusalem raei masikukru si Seba togat Bikri.

⁸ Kele arasege ka bukku sabeu ka Gibeon, amuboikian si Amasa aisege sedda. Oto si Joab aipakeian leppei pasaggak samba lanjaunia aituappra katengania. Kele aipuenung si Joab iei kamata, bele lanjau nenda.

⁹ Kuanangan si Joab katubut Amasa, “Masanang leu ekeu, sarainangku?” Kabei Joab sikattoet masirape bulut ngungun Amasa bule isigguknia.

¹⁰ Ta aitco si Amasa kababarat lanjau ka kabei Joab kai katciu. Sigege punuakenangan lanjau nenda si Joab ka balugut Amasa, pat masaragainangan tinanainia ka polak. Kateteret nenda leuet matenia, oto taan aipununia minca si Joab. Lepa si Joab samba si Abisai baginia, riuriuakerangan rakukru si Seba togat Bikri.

¹¹ Purionanngan sara katalagat saladdut Joab kabebet tubut Amasa simamatei samba sogaakenangan, “Kasei sioba masitut si Joab samba si David, tut kam si Joab!”

¹² Tubut Amasa simigi logau nenda ai mutatagguilu ka tengan enungan. Saladdut Joab nenda masiitco, sangamberi sirimanua situsasabau sedda muari sedda. Kalulut nenda giritakenangan tubu simamatei nenda ka mone samba tabbonangannia sobbe.

¹³ Lepat araareuake tubu simamatei nenda ka enungan, riuriuakerangan puenungananda sangamberi sirimanua ratut si Joab bule rakukru si Seba togat Bikri.

¹⁴ Si Seba aienungingan sangamberi kupkumen laggai Israel, lepa segenia ka laggai Abel ka Maakha samba airatututnia saladdunia tai Bikri.

¹⁵ Areprangannia saladdut Joab, si Seba ainia ka laggai Abel ka Maakha, lepa alourangan laggai nenda. Tabbuirangan polak ka sangaliot irip ka uja samba taddakerangan masigaigai polak ka tei irip nenda bule rabukkatakenia.

¹⁶ Lepa pusoganangan sara sinanalep simasiku patuat sikuddu ka laggai nenda, “Arep kam! Arep kam! Kua katubut Joab ioi sene, bule kupatibo kai.”

¹⁷ Lepa ei Joab ka sinanalep nenda samba parerenangan sinanalep nenda, “Ekeu leu si Joab?” Aleginangannia si Joab, “Oo!” Kuanangan sinanalep nenda, “Arep sikuaku nene.” Aleginangannia si Joab, “Kauan!”

¹⁸ Kuanangan sinanalep nenda, “Siburu matukkle rakua sirimanua kise, “Ke noba masitiddou enungan, kenan ka laggai Abel. Kisedda te ragagalaiake.

¹⁹ Aku nene iate sara katalagat sirimanua ka Israel sioba paabanan samba simaeru. Tapoi nubesiake nupakatai sara laggai sabeu ka Israel. Angoi nuoba masipakatai polak bakkat Tuhan?”

²⁰ Lepa aleginangannia si Joab, “Ta! Ta! Ta'anai patuatku masipakatai samba masisubuake laggainu!

²¹ Ta kisedda sipinatumai. Tapoi sara sirimanua sipuoni Seba togat Bikri sibara ka leleu laggai Efraim, masibaraake pugaugaupat masisaggangi Rimata David. Akenia sene, iapeite kutuitui ka laggai nene.” Kuanangan sinanalep nenda, “Kauan, aile kuribbaiake kai utenia katubum sibara ka irip nene.”

²² Lepa tuitui sinanalep nenda samba kabagat sikut patuatnia patiboakenangan sikuddu ka laggai nenda. Lepa nenda tippurangan lolokkat Seba togat Bikri samba ribbaiakerangannia katubut Joab. Nauakenangan pipiau si Joab samba kaddiuakerangan laggai nenda sambatda saladddunia samba toili sia ka lalepda. Si Joab leu toilinia ka Jerusalem masiailiake rimata.

Sipugagalai ka uma purimataat David

²³ Si Joab ibailiu ute ka sangamberi saladdut Israel, samba si Benaya togat Joyada ibailiu ute ka tai Kreti samba ka tai Pleti.

²⁴ Si Adoram ibailiu ute ka sipugagalai simasane samba si Josafat togat Ahilud ibailiu sipasikeli pubulaganan ka uma purimataat.

²⁵ Si Seya ibailiu sipanunurat ka uma purimataat; si Zadok samba si Abyatar ibailiu imam.

²⁶ Kisedda leuet si Ira, tai Jair ibailiunia imam ka uma purimataat.