2Sam. 2 - BUKO SIPUNENAN

Si David ibailiu rimata ka Jehuda

¹ Lepa nenda parerenangan si David katubut Tuhan, “Taleu memei le aku ka sara laggai ka Jehuda?” Kuanangan si Tuhan katubut David: “Kenannan.” Lepa kuanangan si David: “Kaipa kueei?” Kuanangan si Tuhan: “Ka Hebron.”

² Iageti ei si David ka Hebron pasamba ka rua sinanalepnia iate si Ahinoam sibara ka Jizreel samba si Abigail silumangakenen Nabal iate sinanalep sibara ka Karmel.

³ Kisedda leuet sipasitututnia pasamba sangalalepda sangamberitda masitut si David, lepa pulaggairangan leu ka Hebron.

⁴ Iageti oi tai Jehuda, lepa uddetakerangannia sibailiu rimata ka Jehuda. Kele aiarepnia si David ararateiake si Saul tai Jabesh ka Gilead.

⁵ Koiniakenangan pakoinien ka Jabesh-Gilead masikua katubutda kise “Bule si Tuhan masisukatake kam, kalulut anuipatoila nuntut bagamui ka rimatamui si Saul, nurateiake kam nia.

⁶ Kalulut nenda, bule si Tuhan masipatoila nuntut bagaNia katubumui. Kisedda leuet kaku kugalai le geti simaeru katubumui kalulut sigalaiakenenmui nenda.

⁷ Ronake kam patuatmui kineneiget samba kau ibailiu kam simagege, kenanen atataan rimatamui si Saul; samba aku leu arauddetakean tai Jehuda sibailiu rimatatda.”

Si Isyboset tubailiuake rimata ka Israel

⁸ Utet saladdut Saul iate si Abner togat Ner, amutuituiannia pasamba si Isyboset togat Saul ka Mahanaim ka silat bagat oinan Jordan.

⁹ Sedda si Abner uddetakenangan si Isyboset sibailiu rimata ka Gilead, ka Asyuri, Jizreel, Efraim samba Benjamin, samba leu ka sangaliot Israel.

¹⁰ Beunannia si Isyboset ainia epat pulu ngarura kateteret tubailiakenia rimata ka Israel, samba rua ngarura burunia aipuparenta. Tapoi muntogat Jehuda mariuriu le sia katubut David.

¹¹ Samba burunia aipuparenta si David ka Hebron ka tai Jehuda, pitu ngarura enem ngalaggo burunia.

¹² Ka sara gogoi tuitui si Abner barania ka Mahanaim iei ka Gibeon sambatda saladdut Isyboset.

¹³ Kisedda leuet si Joab, togat Zeruya, sambatda saladdut David ei sia ka laggai nenda. Ka rua mungkuat nenda paaili sia ka paot Gibeon, lepa kuddu sia sedda, mungkuat sara mukuddu ka bebet pao saigit sene samba mungkuat sikarua ka bebet pao saigit sedda.

¹⁴ Lepa kuanangan si Abner katubut Joab: “Eddangan takoiniake sapaguguletta sibau tubu rapalaba.” Aleginangannia si Joab, “Kauan.”

¹⁵ Lepa bela sia pulu rua sibara ka suku Benjamin sibailiu punutubut Isyboset, samba leu pulu rua sia saladdut David.

¹⁶ Iageti senesenenda patakeprangan ute samba papunurangan balugut palabaakenenda, bailiu matei sia sangamberitda. Kalulut nenda, oniakerangan kudduat ka Gibeon nenda “Monen Lanjau.”

¹⁷ Lepa nenda bara pasaggangan sabeu, si Abner samba leu saladdutda tai Israel kalaakerangan sia saladdut David.

¹⁸ Katelutda tatogat Zeruya ai sia sedda, iate si Joab, Abisai samba si Asael. Si Asael bulat makope nangkania mubalau kele simatsura,

¹⁹ oto kukrunangan leu si Abner.

²⁰ Lepa pitsanangan kateitei si Abner, kuanangan, “Ekeu leu nenda Asael?” Aleginangannia si Asael, “Oo.”

²¹ Lepa kuanangan si Abner katubut Asael, “Ba kukukru aku! Laba le sara katalagat sara saladdu samba alanungan lanjaunia!” Tapoi si Asael iriuriuake le ikukru si Abner.

²² Kuanangan minca si Abner katubut Asael, “Ariake nukukru aku! Babara kumamateiake ekeu. Kipa ioi kumattai matat kebbunu si Joab?”

²³ Tapoi ta iariake si Asael ikukru si Abner. Lepa ainia ka teitei Abner si Asael soatnangan si Asael samba oraknangan balugut Asael pat bela kateiteinia. Bele si Asael samba mateinia sedda. Sangamberi sirimanua siooi ka kudduat kamateiat Asael, puarirangan luet sedda.

²⁴ Tapoi si Joab samba si Abisai masiriuriuake masikukru si Abner. Kele aibele sulu, sege sia ka bebet leleu Ama, ka isit kabelaiat sulu Giah, ipot ka simatangeu Gibeon.

²⁵ Sedda parururangan minca sibara ka suku Benjamin pasamba si Abner, samba patarekrangan tubutda ka sara uddut leleu.

²⁶ Iageti ai sia ka uddut leleu nenda pusoganangan si Abner katubut Joab, “Taleu bulat pasaggak le sita teret buruburu? Ta pa nuagai pasaggangan nene iate sibaraake pangoringan le? Kai nene iate sasarainam. Kipangan le burunia siobanu, nuparentaake saladdum bule raariake rakukru kai?”

²⁷ Aleginangannia si Joab, “Ka onin Taikamanua sipuririmanua, ke ta bai nutekaakenia, kukrurangan leu sasarainanda pat aili simanseman.”

²⁸ Lepa nauakenangan pipiau si Joab sibailiu toggaiat ka sipasitututnia bule raariake masikukru tai Israel, iageti ariakerangan leu masikukru tai Israel samba taan apasaggak sia.

²⁹ Sangasoibo si Abner samba sipasitututnia masienungi su'sut Jordan, ratalipoki bagat oinan Jordan, riuriuakerangan leu muenung malegre tugge sulu, lepa sege sia ka Mahanaim.

³⁰ Kele aiariake si Joab masikukru si Abner, ruruakenangan sangamberi sipasitututnia si Joab, ai sia pulu siba taanai, ta tuaddeake si Asael.

³¹ Saladdut David masimateiake telu ngotu enem pulu sia saladdut Abner sibara ka suku Benjamin.

³² Lepa nenda si Joab sambatda sipasitututnia masirateiake si Asael ka puariat ukkuinia ka Betlehem. Lepa nenda pusilarangan sangasoibo samba simansep sege sia ka Hebron.