2Sam. 19 - BUKO SIPUNENAN

Si Joab masipoiliat puseleat David

¹ Lepa paagairangannia katubut Joab purereureu baga samba pusososunia Rimata David kalulut si Absalom.

² Oto ka gogoi nenda te kamanangan aibailiu pureureugat baga ka sangamberi saladdut Israel kalulut pusosou rimata isoibi togania.

³ Kalulut nenda toili saladdu ka laggai ka gogoi nenda taiagaiet, kele saladdu simaila kalulut araputuitui ka pasaggangan.

⁴ Tabbonangan matania rimata samba pusounangan simakope, “Togaku! Togaku Absalom! Absalom, togaku!”

⁵ Lepa ei si Joab masiailiake rimata samba kuanangan, “Ka gogoi nene anupakailangan sangamberi saladdum sibelaake ekeu, tatogam taimanteu, tainanalep, tainanalepnu samba leu tainanalepnu kabebe ka kabeira tai saggaknu.

⁶ Nupununtuki sia baga simalaga baga katubum samba nupulagaki sia baga simanuntu baga katubum! Kalulut anupatoilaan kineneiget taipuletseinu sangamberi sautet saladdu samba saladdum. Oto akuagaian kineneiget, bulat simakope sanangnu le ke aipeile muririmanua si Absalom kineiget samba kumatei kai sangamberimai!

⁷ Oto kalulut nenda, suruake ekeu, kenan nubela samba panibo nupasanang patuatda saladdum. Aipoi musuppa le aku ka onin Tuhan, ke ta bela ekeu, ka soibo nene leuet taanai berisara sirimanua sipasitutut ekeu. Samba nene sibailiu pangoringannu burunu murimanua.”

⁸ Iageti suru rimata samba belania iei ka kamatatbaliu gugurukat. Lepa paagairangannia ka siberikabaga, kise, “Si Rimata aiatnia mukukuddu ka matatbaliu gugurukat.” Iageti oi sangamberi siberikabaga nenda masiailiake rimata. Katetere nenda leuet sangamberi saladdut Israel putuituirangan raei ka lalepda.

Si David toili ka Jerusalem

⁹ Iageti bara paukelat katalagatda sangamberi suku Israel. Kuarangannia, “Aibelaakean sita Rimata David kakabeira tai Filistin. Kineneiget amutuituiannia ikaddiuake laggai kalulut si Absalom.

¹⁰ Tapoi si Absalom siuddetakenenta sibailiu uteta amateiannia ka pasaggangan. Oto kineneiget, angoi taanai berisara sirimanua sibesiake bule itoili Rimata David?”

¹¹ Againangan leu tiboietda nenda si David. Kalulut nenda koiniakenangan Imam Zadok samba Imam Abyatar masiparereake ka sikebbukat laggai ka Jehuda, kise, “Angoi ibailiu kam sikateitei sipasiambit rimata ka uma purimataatnia?

¹² Ta pa sisangaakkula samba muntogatku le kam? Angoi sikateitei le ibailiu kam masiambit rimata itoili?”

¹³ Samba si David leu masikoiniake bule rakua katubut Amasa, kise, “Ta pa sisangaakula le sita? Barania kineneiget kuuddetake ekeu ibailiu ute'ra saladduku masisailiake si Joab. Bule Taikamanua masiukum aku ke ta kugalaiake nene!”

¹⁴ Kisedda te aiala patuatda si David sangamberi tai Jehuda, bailiu kaurangan patonekat katubut rimata bule itoili ka uma purimataat sambatda sipugagalai ka uma purimataatnia.

¹⁵ Lepa tuitui rimata itoili samba segenia ka bagat oinan Jordan. Oto tai Jehuda asegean sia ka Gilgal masiamiake rimata rajagonia italipoki bagat oinan Jordan nenda.

¹⁶ Kisedda leuet si Simei togat Gera, tai Benjamin sibara ka Bahurim, olaakenangan ioi sambatda tai Jehuda raamiake Rimata David.

¹⁷ Ai leuet sangaribu sia pasambania sibara ka kupkumen laggai Benjamin. Samba si Ziba, pagugulet muntogat Saul, pulu lima sia tatogania, rua pulu sia sapaguguletnia ei sia simaola sambatda ka bagat oinan Jordan muboiki kai rimata.

¹⁸ Lepa ropakerangan rimata samba sangalalepnia ka putalipokat samba galaiakerangan sangamberi siripot siparentaakenen rimata. Kateteret aimutatalipo rimata, purekkuknangan si Simei kamatat rimata samba kuanangan,

Si David masipukateki baga si Simei

¹⁹ “Panindogatku, bule ta nuaddeake aku simasele katubum. Kalipogingan le sigalaiku kateteret anukaddiuake Jerusalem.

²⁰ Akuseseakean joku, oto kalulut nenda ka gogoi nene aku le amoi muboiki ka sangamberi muntogat Josep masiailiake ekeu.”

²¹ Tapoi kuanangan si Abisai, togat Zeruya, “Mateu tuorakake ukum simateiakenen katubut Simei kalulut aipateleiji sirimanua sipilit Tuhan.”

²² Tapoi kuanangan si David katubut Abisai samba katubut Joab kebbunia, “Ba puuku kam aku, taanai tiboi tubukku katubumui. Angoi nugejaake kam bagaku? Ka gogoi nene aku ibailiu rimata ka Israel, samba bui ibara sara sirimanua ka Israel tuukumake simateiakenen.”

²³ Iageti pusuppanangan rimata katubut Simei, “Ta tumamateiake ekeu.”

Si David masipukateki baga si Mefiboset

²⁴ Kisedda leuet si Mefiboset punuteteu Saul, moi leuetnia masiamiake rimata. Ta aipalina rerenia samba ta aikirit bulut ngungunia samba leu ta aitaptap leppeinia barania peileu kateteret aikaddiuake Jerusalem si David pat aili katoiliatnia.

²⁵ Kateteret aioi si Mefiboset barania ka Jerusalem, ioi masiamiake rimata, kuanangan rimata katubunia, “Angoi ta amoi ekeu tatuitui simakere?”

²⁶ Aleginangannia, “Anuagaian sijegeu le aku. Koiniakekungan paguguletku itarekake kalidei pakeietku kutut ekeu, tapoi aipajo le aku pagugulet nenda.

²⁷ Samba aipakatai peile nganga katubum. Tapoi kele malaikat le ekeu. Kalulut nenda, galaiakean simaeru siripot sipaatum.

²⁸ Sangamberi muntogatku mateu le nuukumake simateiakenen, tapoi anuobaake kupukom ka uma purimataat. Apangan le puteukatku kutiddou apapa katubum?”

²⁹ Aleginangannia rimata, “Apangan le lulunia nutitiboi pagalaiat tubum. Akuteuakean kuake sangamberi pukayoat Saul katubum samba katubut Ziba.”

³⁰ Lepa aleginangannia si Mefiboset, “Eddangan ialania si Ziba sangamberinia, kalulut atoilingan ekeu kabagat angkat baga.”

Si David masipukateki baga si Barzilai

³¹ Kisedda leuet si Barzilai tai Gilead, moinia barania ka Rogelim samba mei leuetnia masitut rimata masitalipoki bagat oinan Jordan.

³² Si Barzilai nenda bulat amabajaannia, balu pulu ngarurangannia. Si Barzilai masipatarek komen rimata burunia aikuddu rimata ka Mahanaim, kalulut bulat simakope kayo le nia.

³³ Kuanangan rimata katubut Barzilai, “Sita taei ka Jerusalem, aile kupasikeli ekeu sedda.”

³⁴ Tapoi aleginangannia si Barzilai, “Taan mabuburu kupurimanua. Oto apangan lulunia kuoi kutut ekeu ka Jerusalem?

³⁵ Kineneiget balu pulu ngarurangan aku, samba taan anai siangkaake bagaku. Taan iagai ngangangku kukom komen samba lo', samba leu taan kuarep nganganda sipuurai. Ibailiu le aku pugejaat bagam.

³⁶ Piga ngabakkou le pa akupuenung kutut ekeu ka silat bagat oinan Jordan. Ta mateu kusilo upa bulat sabeu nene.

³⁷ Eddangan kutoili, bule kumatei ka laggaiku, kabebet puariat ukkui samba inangku. Tapoi aikoi paguguletku si Kimham, eddangan ioi itut ekeu samba galaiakean katubunia simaeru siripot sipaatum.”

³⁸ Aleginangannia si David, “Kauan, eddangan itut aku si Kimham, aile kugalai katubunia simaeru siripot kiddiet bagam, samba aile kuake katubum sangamberi kiddiet bagam.

³⁹ Iageti talipokinangan bagat oinan Jordan si David samba sangamberi sipasitututnia. Lepa sigguknangan si Barzilai isegeake katutuituinnia. Lepa nenda toili si Barzilai ka lalepnia.

Paukelatda tai Jehuda samba tai Israel pagalaiat rimata

⁴⁰ Sangamberi saladdut Jehuda samba iletalaga saladdut Israel masitut rimata masitalipoki bagat oinan. Lepa nenda riuriuakenangan puenunganannia rimata ka Gilgal, samba leu si Kimham ainia masitut rimata.

⁴¹ Iageti oi sangamberi tai Israel kamatat rimata samba kuarangan, “Angoi sasarainamai tai Jehuda masikua, sia le mateu masiala samba masijago ekeu, sangalalepnu samba leu saladdum ka putalipokat bagat oinan Jordan?”

⁴² Lepa alegirangannia tai Jehuda, “Aisesengan, kalulut si rimata iate saeppumai. Angoian le nupugogolu kam? Aipa isasaki komenmai rimata? ele iake panguruat katubumai?”

⁴³ Lepa alegirangannia tai Israel, “Kai peile sipulu nene bulat mateu katubut rimata. Sibailiu toga sikebbukat kai peile mabeu. Angoi nupabele kam kai? Ta pa kai le bulat siboiki masiambit rimata itoili? Tapoi tiboietda tai Jehuda peile maron ka tai Israel.