2Sam. 18 - BUKO SIPUNENAN

Katukalaat Absalom samba kamateiatnia

¹ Ruruakenangan sangamberi sipasitututnia si David, lepa uddetakenangan sara ute'ra sangaribu saladdu samba sara ute'ra sangotu saladdu.

² Lepa koiniakenangan sangamberi saladdunia si David raei pasaggak kabagat telu ngamungkuat, senen mungkuat ute'ra iate si Joab, si Abisai bagit Joab samba si Itai sibara ka Gat. Lepa kuanangan rimata ka sipasitututnia, “Momoi leuet aku kaku pasaggak pasambamui.”

³ Tapoi alegirangannia saladdu, “Eddangan ta nuoi pasaggak; aipoi babara ke taan amoi katubumai kabagat pasaggangan putuituimaian, ele matei iletalaga ka igimai nene, oto taan rapuuku kai. Tapoi ekeu geti makere le sakit pulu ngaribu sirmanua katalagamai. Oto maeru peile eddangan nuake paroman sibara ka laggai.

⁴ Iageti kuanangan si David, “Oto kauan, kipa simeru sipaatumui kiseddangan te kugagalaiake.” Lepa purionangan rimata kabebet matatbaliu gugurukat samba puenungrangan sangamberi saladdu rabela, mungkuat sangaribu samba sisangotu igitda.

⁵ Lepa rimata masiparentaake si Joab, “Bui numateiake samba nubesiki kam si Absalom.” Kateteret aikua nene rimata, airaarep sangamberitda saladdu samba sautet saladdu.

⁶ Lepa tuitui saladdut David raei masisaggangi saladdut Israel, samba pasaggakrangan ka leleu Efraim.

⁷ Makalarangan saladdu Israel arakalaake sia saladdut David, samba ka gogoi nenda puailinangan pasaggangan sabeu, rua pulu ribu sia igitda amatei.

⁸ Malionangan pasaggangan ka sangaliot laggai nenda, samba simamatei ka bakkat loina simapepepe peile maigi, bele peile igit simamatei ka lanjau kabagat pasaggangan.

⁹ Kateteret aimukukuro si Absalom, sige'ge ailinangan saladdut David. Kateteret aimuenung kuro nenda ka tei loina sabeu samba simaepe, sakkutnangan alai Absalom sara ran loina nenda, bailiu putoaknangan, tapoi kuronia nenda riuriu le iputuitui ikaddiuake si Absalom.

¹⁰ Sara katalagat saladdut David masiitco si Absalom samba segeakenangannia katubut Joab, “Akuitco si Absalom ainia mutotoak ka ran loina sabeu!”

¹¹ Aleginangannia si Joab, “Anuitco si Absalom? Angoi ta anumateiakenia? Kuake te katubum pulu bulagat perak samba sara akkik tenga.”

¹² Tapoi aleginangannia sirimanua nenda, “Kenanen tuake katubukku sangaribu bulagat perak, ta kubebesiki togat rimata nenda. Akuarepman kai sangamberimai sitoneakenen rimata katubum, katubut Abisai samba katubut Itai, bule bui tumateiake samba tubesiki si Absalom.

¹³ Samba ke kumateiake bai si Absalom, againangan leuetnia si rimata, aipoi iaagai te si rimata sangamberinia sipuaaili – samba leu ta nuroropake aku.”

¹⁴ Aleginangannia si Joab, “Ta koba masipasibbu tetere masipagoluake ekeu. Lepa alanangan si Joab telu simuinebakkat samba punuakenangannia ka udduk Absalom, kateteret nenda si Absalom aipeilenia muririmanua kenanen ainia mutotoak ka ran loina sabeu.

¹⁵ Iageti pulu sia saladdu sipasiabbit simuinebakkat Joab, mateiakerangan si Absalom.

¹⁶ Lepa nenda nauakenangan pipiau si Joab, bailiu ariakerangan saladdunia rakukru saladdut Israel.

¹⁷ Lepa alarangan tubut Absalom simamatei nenda samba ribbaiakerangannia kabagat lobok sabeu ka bakkat loina. Lepa kauarangan bukku sabeu pasitabbui lobok nenda pat buak. Sangamberi saladdut Israel, tuitui sia raei ka lalepda senesenenda.

¹⁸ Kateteret aipeilenia muririmanua si Absalom, ai aigalai ka sia sara arigi bukku ka Su'sut Rimata, kalulut taanai togania simanteu siriuriuake muntogatnia. Oniakenangan arigi bukku nenda kele oninia, samba teret kineneiget arigi bukku nenda aipeile raagai sirimanua: sibailiu Arigi Bukku Pasirepdep si Absalom.

Kamateiat Absalom tupaagai katubut David

¹⁹ Iageti kuanangan si Ahimaas samba si Zadok katubut Joab, “Obaake kai pabalau kuei kai masisegeake katuareman simeru nene katubut rimata, bebelaakenania si Tuhan kakabei saggaknia.

²⁰ Tapoi kuanangan si Joab, “Ka gogoi nene ta ekeu masisesegeake katuareman, kalulut amateian togat rimata. Ka gogoi bagei geti momoi nusegeake katuareman katubut rimata.

²¹ Iageti kuanangan si Joab ka paguguletnia tai Etiopia, “Kenan nusegeake katubut rimata aponia siitconu.” Lepa purekkuknangan tai Etiopia nenda kamatat Joab, lepa tuituinia.

²² Tapoi kuanangan minca si Ahimaas togat Zadok katubut Joab, “Kenanen aponia pa muaaili, obaake kuei kukru tai Etiopia nenda.” Tapoi aleginangannia si Joab, “Angoi nubesiake mei, togaku” Ta nusisilo upa ka katuareman sisegeakenennu nene!”

²³ Aleginangannia si Ahimaas, “Eddangannia, memei le aku.” Kuanangannia si Joab, “Ke kisedda, kenannan.” Iageti pubalaunangan si Ahimaas ienungi Su'sut Jordan, bailiu puboikinangan ka pagugulet tai Etiopia nenda.

²⁴ Si David ainia mukukuddu ka talagat rua matatbaliu gugurukat ka ujat laggai samba leu sipujajago einia ka uddut irip laggai samba purionangan ka uddut matatbaliu gugurukat nenda. Kateteret aipaingo matania, itconangan sara sirimanua siooi ainia pababalau.

²⁵ Pusoganangan sipujajago nenda ipaagaiakenia katubut rimata, samba kuanangan rimata, “Ke sarania le, katuareman simaeru le segeakenennia.” Kateteret aimalegre sirimanua nenda,

²⁶ itconangan minca sipujajago sara sirimanua siooi ainia pababalau, lepa pusoganangan sipujajago nenda katubutda sipasijajago matatbaliu gugurukat, “Itco, ai minca sara sirimanua siooi.” Aleginangannia rimata, “Katuareman simaeru leuet segeakenennia.”

²⁷ Kuanangan sipujajago nenda, “Sirimanua siooi siboiki nenda iate si Ahimaas togat Zadok, aipoi kuagai galai pubabalaunia.” Kuanangan rimata, “Sirimanua simatopit le nia, oto katuareman simaeru le segeakenennia.”

²⁸ Lepa pusoganangan si Ahimaas ikau paroroiat katubut rimata, lepa purekkuknangan samba kuanangan, “Tuumun le Tuhan Taikamanuam, sipasiake ka kabeinu, sirimanua sisaggangi ekeu!”

²⁹ Lepa parerenangan rimata, “Amurimanua leu si Absalom, silainge nenda?” Aleginangannia si Ahimaas, “Akuitco pulamaugat sabeu, kateteret aikoiniake aku si Joab, tapoi ta kuagai aponia sibabara.”

³⁰ Iageti kuanangan rimata, “Purio sedda.” Oto ei si Ahimaas kabebe samba purionangan.

³¹ Iageti sege tai Etiopia nenda, samba kuanangan katubut rimata, “Segekanenku iate katuareman simaeru, kalulut aiakean si Tuhan kamanangan katubum ka sangamberi sirimanua sisaggangi ekeu.”

³² Lepa parerenangan rimata, “Amurimanua leu si Absalom, silainge nenda?” Aleginangannia tai Etiopia nenda, “Bule sangamberi saggaknu makere kele uktuk silainge nenda.”

³³ Kalulut masiarep nenda, masounangan bagania rimata, lepa einia ka pata ka bilik ka ipot matatbaliu gugurukat samba pusounangan sedda. Samba kise ikua kabagat sounia, “Togaku Absalom, togaku, togaku Absalom! Maeru peile aku le matei masisailiake ekeu, togaku! Absalom, togaku!”