2Sam. 17 - BUKO SIPUNENAN

Si Husai masigalai ta ipuriuriu siisiakenen Ahitofel

¹ Kuanangan si Ahitofel katubut Absalom, “Obaake kupili pulurua ribu sirimanua, bule ka soibo nene mei aku masikukru si David.

² Kusagganginia kateteret ainia kabagat saggot tubu samba gulai patuat. Kugege'geake te nia, bailiu putuituirangan sangamberi sipasitututnia. Oto sarat si David le kumamateiake.

³ Kisedda te kuambit samba kutoiliake sangamberi sipasitututnia katubum kele sara talimouakenen sinanalep sitotoili ka simanteunia. Oto sara le noba tumateiake, tapoi sangamberi sipasitututnia ta tumamateiake sia.”

⁴ Nganturat nenda iaddeake le simaeru si Absalom samba sangamberi sikebbukat laggai ka Israel.

⁵ Tapoi kuanangan si Absalom, “Sogai si Husai tai Arki nenda, bule taarep aponia kuanennia.”

⁶ Kele aisege si Husai katubut Absalom, paagainangan katubut Husai siripot siisiakenen Ahitofel, lepa kuanangan katubut Husai, “Kipa tarereddet pa nganturat nenda? Ke ta, kua kipa tagagalai.”

⁷ Aleginangannia si Husai, “Nganturat Ahitofel nene ta maeru.”

⁸ Anuagaian, ukkuinu si David samba sipasitututnia bulat magege sia, kele beruang sinanalep simapepepe toga. Kisedda leu ukkuinu simagege pasaggak le nia, ta iobaake raperep sipasitututnia.

⁹ Kineneiget ele ainia mulipput kabagat sara ngaliu ele ka kudduat bagei. Oto, ke muali pasaggangan samba matei sia piga pa samba ai sipasiarep pagalaiat nenda, kuarangan leu sirimanua, arakalaakean sipasitutut Absalom.

¹⁰ Oto beringan sirimanua simakope gege kele singa leu malotorangan. Kalulut araagaian sangamberitda tai Israel, ukkuinu iate sara simagege samba sipasitututnia iate sirimanua simagege.

¹¹ Oto kalulut nenda, nganturatku iate, “Ruruake sangamberi tai Israel barania ka Dan pat aili ka Bersyeba, bailiu igitda kele igit ngai kabebet koat. Lepa uteakenungan sia kabagat pasaggangan.

¹² Ailittangan te geti si David kenanen kaipapa kudduatnia, samba saggangitangannia taiagaietnia, bailiu mateiaketangan sia sangamberitda taanai berisara sia sibebela.

¹³ Ke mutuituinia iei ka sara laggai, sangamberi sirimanua sipasitutut sita alarangan appra samba girittangannia pat aili kabagat oinan, bailiu beringan sara bukku sigoiso ta babara ka kudduat nenda.

¹⁴ Iageti kuanangan si Absalom samba sangamberi tai Israel, “Nganturat Husai peile maeru ka nganturat Ahitofel.” Kalulut aiteuakean si Tuhan ta ipuriuriu singantruakenen Ahitofel nenda, bule ibaraake kamateiat Absalom.

Si David ka Mahanaim

¹⁵ Lepa nenda segeakenangan si Husai katubut Imam Zadok samba Imam Abyatar pagalaiat nganturat Ahitofel samba nganturatnia katubut Absalom samba ka sangamberi sikebbukat laggai ka Israel.

¹⁶ Kuanangan si Husai, “Olaake kam! Paagai kam katubut David bule bui ipugogoi ka putalipokat oinan ka kudduat simatangeu. Tapoi kau le italipoki simaola bagat oinan Jordan. Ke ta, mateirangan leuet sangamberitda.”

¹⁷ Si Jonatan togat Abyatar samba si Ahimaas togat Zadok aisia pangengena kabebet bubuakat oinan ka laggai En ka Rogel, kabebet laggai Jerusalem. Ta magege sia tuguru' kabagat laggai, kalulut maloto sia babara raitco sia sirimanua. Kele simatukle, sara pagugulet sinanalep masisegeake katuareman katubutda samba segeakerangannia leu kai Rimata David.

¹⁸ Tapoi itconangan sia sara toga simanteu, lepa segeakenangannia katubut Absalom. Oto tuitui sia simaola samba pulipputrangan ka lalep sara sirimanua ka Bahurim. Kabebet lalepnia ai uggungan samba eirangan leuet kabagat uggungan nenda.

¹⁹ Iageti sinanalep ukkui sibakkat lalep nenda nga'ngaakenangan sara komak ka uddut uggungan nenda samba kaunangan gandum ka uddutnia, bailiu taimatoilanangan uggungan nenda.

²⁰ Lepa ei saladdut Absalom ka lalep nenda samba rererangan sinanalep nenda, “Kaipa si Ahimaas samba si Jonatan?” Aleginangan sinanalep nenda, “Simaruei le aratalipoki oinan nenda.” Gabarangan ka rua sirimanua nenda, tapoi ta arasese sia, lepa toili sia ka Jerusalem.

²¹ Kele aratuitui saladdut Absalom, bela si Ahimaas samba si Jonatan kabagat sumur nenda, lepa olaakerangan mei masiailiake Rimata David samba kuarangan katubunia, “Patarek tubum simaola samba talipoki bagat oinan nenda simaruei, kalulut aikau nganturat si Ahitofel bule rasaggangi ekeu.”

²² Lepa talipokinangan bagat oinan Jordan si David samba sangamberi sipasitututnia, samba kapatokat sege sia ka sila.

²³ Kele aiagainia si Ahitofel tairereddetda nganturatnia, kaunangan apo ka kalideinia, lepa toilinia ka lalepnia ka Gilo. Pasikelinangan sangamberi ka lalepnia, lepa tiggotnangan lolokkatnia. Kisedda te aimatei, samba rateiakerangannia ka puariat muntogatnia.

²⁴ Iageti sege si David ka Mahanaim, kateteret aitatalipoki bagat oinan Jordan si Absalom pasamba sangamberi tai Israel. (

²⁵ Si Absalom aiuddetakean si Amasa sibailiu utet saladdunia silit Joab. Si Amasa iate togat Jitra tai Ismael; inania sipuoni Abigail togat Nahas, sarainan Zeruya inan Joab.)

²⁶ Iageti pusapourangan tai Israel samba leu si Absalom ka laggai Gilead.

²⁷ Kele aisege si David ka Mahanaim, roroirangannia iate si Sobi togat Nahas sibara ka laggai Raba ka Amon, si Makhir togat Amiel sibara ka Lodebar, si Barzilai sibara ka laggai Rogelim ka Gilead.

²⁸ Samba kaurangan leu katubut David samba ka sangamberi sipasitututnia, pereman, koali sabeu, mangkok, tapung, gandum, kacang sabeu, kacang simabonan sabeu, kacang simabonan sigoiso,

²⁹ suat mani, keju, biribiri. Kalulut araagaian, amalajengan samba amaonggouan samba leu amasaggongan si David samba sipasitututnia kalulut puenungananda ka kudduat simatangeu.