2Sam. 16 - BUKO SIPUNENAN

Si David samba si Ziba

¹ Kateteret simaruei le aisabau uddut leleu si David, sigege oi si Ziba pagugulet Mefiboset masiailiake si David samba aiaambit rua ngamuneng kalidei siambit rua ngotu ngambua roti, sangotu ngasosolabbit anggur simagarak, sangotu ngaampra buat kaju sibau samba sangakudduat oinan suat anggur.

² Parerenangan Rimata David katubut Ziba, “Apananta sangamberinia nene?” Aleginangannia si Ziba, “Kalidei nene iate pakeietnu samba sangalalepnu, roti samba buat kaju nene komenda sapaguguletnu samba oinan nene lo'ra simasaggo tubu sikuddu ka kudduat simatangeu.”

³ Lepa parerenangan rimata katubunia, “Kaipa si Mefiboset, punuteteu Saul?” Aleginangannia si Ziba, “Ainia ka Jerusalem, kalulut matonem bagania, kineneiget ratotoiliake te tai israel purimataat Saul, sibbuania, katubunia.”

⁴ Lepa kuanangan rimata katubut Ziba, “Barania kineneiget sangamberi bakkat Mefiboset ekeu sibakkatnia.” Aleginangannia si Ziba, “Sangamberinia kusilo le, ale rimata.”

Si David samba si Simei

⁵ Kele aisege si David ka Bahurim, oi sara sirimanua sibara sedda, ailelegreake tubunia ka mungkuat rimata, pateleijinangan si David. Onin sirimanua nenda iate Simei togat Gera, sibara ka muntogat Saul.

⁶ Si Simei masibaijuk si David bukku samba sipugagalai ka uma purimataatnia, kenanen ainia katalagatda saladdu samba sautet sipasitututnia.

⁷ Pateleijinangannia si Simei, kise, “Tuituiake ekeu! Sipapamatei, sirimanua sikatai!

⁸ Ailumunakean si Tuhan katubum kamateiatda sangamberi muntogat Saul. Anusailiakenia ibailiu ekeu rimata, aikauan si Tuhan purimataat katubut togam kai Absalom. Kineneiget matei le ekeu, kalulut sipamamatei le ekeu.”

⁹ Lepa kuanangan si Abisai, togat Zeruya katubut rimata, “Angoi ipateleiji ekeu jojo simamatei nene? Obaake kuputalipo kutippu lolokkatnia.”

¹⁰ Tapoi kuanangan rimata, “Angoi nupuuku kam aku, taanai tiboi tubukku katubumui, kam togat Zeruya le” Eddangan ipateleiji aku! Kalulut ke si Tuhan le amasikoiniakenia, kasei momoi masirerenia angoi aigalaiake kele nene?”

¹¹ Lepa kuanangan minca si David katubut Abisai samba ka sipugagalai ka purimataatnia, “Beringan togaku ibesiake le imateiake aku; angoi makisei bagamui kasigalaiakenen tai Benjamin nene? Si Tuhan le amasikoiniakenia ipateleiji aku; oto bui nupuuku kamnia, eddangan ipatelei.

¹² Buleu iitco le si Tuhan pangoringanku nene samba isukatnake aku sibailiu silit pateleijat nenda.”

¹³ Lepa riuriuakenangan puenungannia si David sambatda sipasitututnia, ka sia si Simei muenung leuetnia simaola itut sia ka uddut leleu, ainia muenung ainia patetelei samba leu aibabajukake bukku samba polak katubutda.

¹⁴ Rimata samba sangamberi sapaguguletnia bulat amasaggongan sia kateteret arasege ka bagat oinan Jordan, lepa puarirangan sedda.

Si Absalom ka Jerusalem

¹⁵ Iageti sege si Absalom samba sangamberi tai Israel ka Jerusalem, samba si Ahitofel ai leuetnia pasamba si Absalom.

¹⁶ Kele aisege si Husai, tai Arki saruak David katubut absalom, kuanangan si Husai katubut Absalom, “Rimata! Rimata!”

¹⁷ Parerenangan si Absalom katubut Husai, “Kaipa riuriunia pasitututnu suruaknu si David? Angoi ta anutut suruaknu nenda?”

¹⁸ Aleginangannia si Husai, “Kipa ioi kututnia! Tutakenenku geti iate sirimanua sipilit Tuhan samba sipilitda siberikabaga.

¹⁹ Samba leu katubut kaseian le kupaguguletake tubuku? Ta pa katubut togania? Kele kupaguguletake tubuku ka ukkuinu, kisedda te kupaguguletake tubuku katubum.”

²⁰ Iageti kuanangan si Absalom katubut Ahitofel, “Pangantoman le kai, aponia galaiakenenta.”

²¹ Aleginangannia si Ahitofel, “Kenan ka tainanalep ukkuinu kabe'be sigalakakenennia sipasijago uma purimataat, samba paperepake sia. Raagai te tai Israel, kalulut sigalaiekenennu nene, bailiunangan ekeu saggak ukkuinu. Oto magegerangan leuet sangamberi sirimanua sipasitutut ekeu.”

²² Iageti galairangan sapou Absalom ka uddut uma purimataat ka simagaktuk. Lepa airaiitco sangamberitda tai Israel guru'nia ka sapou nenda samba paperepakenangan tainanalep ukkuinia kabebe.

²³ Kateteret nenda nganturat sikau Ahitofel raadeake le kele enungan galaiakenen sitiddou sibara ka Taikamanua; kisedda te aiaddeake simaeru nganturat Ahitofel si David samba leu si Absalom.