2Sam. 15 - BUKO SIPUNENAN

Si Absalom masibarake pukerekat baga sikatai

¹ Lepa nenda tarekakenangan sara kereta samba kuronia si Absalom samba leu lima pulu sia sipasijajagonia.

² Senen gogoi si Absalom tusurunia simanseman lepa purionangan ka bebet enungan ka bebet matatbaliu gugurukat ka uma purimataat. Senen sirimanua sioi masisegeake pakaroatda katubut rimata, sogainangan samba rerenangan sia si Absalom, kuanangan, “Kaipa laggai kabaraiatnu? Ke ialegi sirimanua nenda, “Aku sibara ka talagat sara suku Israel.”

³ Oto kuanangan si Absalom, “Siripot surukat, sineseat le ekeu, tapoi taanai punu tubut rimata sioba masiarepi pakaroatnu.”

⁴ Lepa kuanangan minca, “Ke aku bai ibailiu sipasiukum ka laggai nene, senen sirimanua sibara pakaroat ele paukelat momoi raoi katubukku samba kugalaiake le simaroipo katubutda.”

⁵ Ke ai silegreake tubunia katubut Absalom rapurekkuk rasurunia, totoiakenangan kabeinia, lakkaiakenangan sia samba sigguknangan sia.

⁶ Kisedda te aigalaiake si Absalom katubutda tai Israel siei masisegeake pakaroatda katubut rimata, samba kele kisedda te enungan iala patuatda tai Israel.

⁷ Kele aitusabau epat ngarura, parerenangan si Absalom katubut rimata, “Ukkui, obaake kuei ka Hebron kugalaiake siripot sipalelekku katubut Tuhan.

⁸ Kalulut kateteret aipeile aku mukuddu ka laggai Gesur ka Aram, akugalai palelengan kuei manindou katubut Tuhan ka Hebron ke iobaake aku si Tuhan kutoili ka Jerusalem.”

⁹ Aleginangannia rimata, “Kenannan ka angkat baga.” Lepa patareknangan tubunia si Absalom samba einia ka Hebron.

¹⁰ Tapoi kepei meinia ka Hebron, aikoiniakean pakoinien si Absalom ka sangamberi suku Israel, masisegeake patonekat, kise “Ke nuarep kam ipunau pipiau, sogaake kam, “Si Absalom aibailiuannia rimata ka Hebron!” ”

¹¹ Ai rua ngotu sia sibara ka Jerusalem sipasitutut si Absalom araei ka Hebron. Ta raagai kababarania mungkuat sipukekere baga ka sikatai nenda samba sangamberitda ei sia simakere taanai suksuk bagatda.

¹² Kateteret aipangunguruatake buluakenen si Absalom, aikoiniakean leuet pakoiniennia kai Ahitofel tai Gilo bule rasogainia, iate sara sipangantoman Rimata David. Kisedda te aimaron mungkuatda sipukere baga ka sikatai nenda, samba leu maiginangan leu sirimanua sipasitutut si Absalom.

Si David masikaddiuake Jerusalem

¹³ Iageti oi sara sirimanua masisegeake katubut David, kuanangan, “Tai Israel aratutnakean si Absalom.”

¹⁴ Lepa kuanangan si David ka sangamberi sipugagalai ka uma purimataatnia ka Jerusalem, “Sita kam tatuitui. Nene le enungan ioi tabela ka kabei Absalom. Taan mabuburu ioi. Olaake kam, bule bui iaili ikukru sita, imamateiake sita sangamberitta ka laggai nene!”

¹⁵ Alegirangan sipugagalai ka uma purimataatnia, “Matarek kai masigalaiake sangamberi siteuakenennu.”

¹⁶ Lepa geti tuitui rimata samba sangamberi sangalalepnia samba leu sipugagalai ka uma purimataatnia, tapoi pulu sia sinanalepnia kabebe ta aiambit sia, bule rajago uma purimataat.

¹⁷ Kateteret aibela rimata samba sangamberi sipasitututnia rakaddiuake laggai, puarirangan ka bebet lalep sikuddu ka pangampulat,

¹⁸ oto sangamberi sipugagalai ka uma purimataatnia muenung kabebenia masisabaunia, kisedda leuet sangamberi tai Kreti samba tai Pleti. Kisedda leuet sangamberi tai Gat, enem ngotu sia igitda, sipasitutut si David baratda peile ka Gat, muenung ka matat rimata.

¹⁹ Iageti parerenangan rimata katubut Itai, tai Gat nenda, “Angoi moi ekeu masitut kai? Toiliake ekeu samba kuddungan pasamba rimata sibau! Kalulut siooiake le ekeu, samba leu sirimanua sikekle le ekeu ka laggainu.

²⁰ Ta'pei maburu anukuddu sene, kipa ioi kuambit ekeu mueppak pasambamai? Beringan kaku ta kuagai kaipa kuei kai. Toiliake ekeu samba ambit saaleinu, bule si Tuhan masipatoila nuntut bagaNia simariuriu katubum.”

²¹ Tapoi aleginangannia si Itai, “Ka onin Tuhan sipuririmanua, samba purimanuaiatnu, kenanen kaipa nuei, momoi le aku, kenanen ka kamateiat.”

²² Lepa kuanangan si David katubut Itai, “Kauan sitangan.” Iageti puenungnangan si Itai, tai Gat nenda pasamba sangamberi sipasitututnia samba sangamberi tatoga sipasitututnia.

²³ Pusourangan sangamberi siberikabaga kateteret arakaddiuake laggai saladdut David. Iageti rimata samba sangamberi siberikabaga talipokirangan bagat oinan Kidron, lepa puenungrangan ka enungan siei ka kudduat simatangeu.

²⁴ Imam Zadok samba Imam Abyatar ai leuet sia sedda pasamba sangamberi tai Lewi sipasiambit Peti Pakerekat Baga. Galakakerangan Peti nenda samba ta raakkatake ke ta'pei rakaddiuake laggai nenda.

²⁵ Lepa kuanangan rimata katubut Zadok, “Toiliake kam minca Peti nenda ka laggai. Ke ai nuntut bagaNia si Tuhan katubukku, obaakenangan leu kutoili samba kuitco minca Peti Pakerekat Baga ka kudduatnia.

²⁶ Tapoi ke si Tuhan masikua, kise, “Ta manuntu bagaKu katubum, oto matarek aku, eddangan igalaiake siripot obaket bagaNia katubukku!”

²⁷ Kuanangan minca rimata katubut Zadok, “Sogai si Ahimaas togam samba si Jonatan togat Abyatar; toiliake kam ka laggai.

²⁸ Aile kupangena ka putalipokat ka oinan ka kudduat simatangeu teret nuake katuareman katubukku.”

²⁹ Lepa si Zadok samba si Abyatar masiambit Peti Pakerekat Baga nenda ratoiliakenia ka Jerusalem samba leu kuddua sia sedda.

³⁰ Panatranangan ka leleu Zaitun si David ainia musosou, tabbonangan utenia samba puenungnangan sita kasu. Kisedda leuet sangamberi siberikabaga tabborangan utera samba panatrarangan aisia musosou.

³¹ Kele arapaagainia katubut David, si Ahitofel ainia ka mungkuat Absalom, panindounangan si David, “Ale Tuhan, galai le bule ta ipuriuriu ngantoman Ahitofel!”

³² Kateteret aisege si David ka uddut leleu ka kudduat panindogat katubut Taikamanua, oi si Husai, tai Arki, masiailiake si David. Leppei Husai amabiritnan samba ai abu ka utenia.

³³ Kuanangan si David katubunia, “Ke noba masitut aku, ibailiu le ekeu pugejaat bagaku.

³⁴ Tapoi ke toili ekeu ka laggai samba nukua katubut Absalom, kise, “Aku nene paguguletnu, ale rimata, barania siburu peile aku nene pagugulet ukkuinu, tapoi kineneiget ibailiu le aku paguguletnu. Oto kisedda te nugalaiake ta ipuriuriu sangamberi ngantoman Ahitofel.

³⁵ Imam Zadok samba si Abyatar ai sia sedda. Paagaiake katubutda sangamberi siarepnu ka uma purimataat.

³⁶ Si Ahimaas togat Zadok samba si Jonatan togat Abyatar ai sia sedda pasamba saukkkuira. Oto tatoga nenda nukokoiniake raoi kaku rasegeake sangamberi siarepnu.”

³⁷ Oto toili si Husai, suruak David nenda ka Jerusalem, makere gogoi ka segekat Absalom ka laggai nenda.