2Sam. 14 - BUKO SIPUNENAN

Katoiliat Absalom

¹ Kele aiagainia si Joab, togat Zeruya, pasirerepdepna rimata irepdep si Absalom,

² koiniakenangan sirimanua raei ka Tekoa bule raala sara sinanalep simasiku patuat. Lepa kuanangan si Joab katubut sinanalep nenda, “Pakei leppei toggaiat pureureugat baga samba bui nukau tula ketubum. Galai le tubum kele sara sinanalep sipurereureu baga simaburu kalulut kamamatei sara sirimanua simanuntu bagania.

³ Iageti ei ekeu katubut rimata, kua katubunia kisene.” Lepa paagainangan si Joab katubut sinanalep nenda aponia bulat kuanennia.

⁴ Lepa ei sinanalep nenda katubut rimata samba purekkuknangan samba kuanangan, “Ropmake aku, ale rimata!”

⁵ Parerenangan rimata katubunia, “Aponia kuroropake?” Aleginangannia sinanalep nenda, “Aku nene silumang simageba, kalulut amateian simanteuku.

⁶ Ai rua tatogaku taimanteu, apalaba sia ka polak simalio, kalulut taanai sirimanua sipasisasaraake sia, bailiu matei sara togaku.

⁷ Samba kineneiget, sangamberi muntogatmai masisaggangi aku, samba rakua, “Akenia katubumai sirimanua simateiake sarainania nenda, bule kuukumake kainia simateiakenen silit engan sarainania simateiakenennia nenda. Ke kukau bai toga nenda katubutda, bailiu akungan le saraku mulelegei. Subuakerangan leu muntogatku samba tanai amulegei sibaliu siriuriuake muntogat simanteuku.”

⁸ Lepa kuanangan rimata ka sinanalep nenda, “Toiliakean ekeu ka lalepnu, aile kupasikeli pagalaiat nenda.”

⁹ Kuanangan sinanalep nenda katubut rimata, “Aku samba muntogatku le geti masibabairat siripot puseleat nenda, tapoi rimata samba purimataatnia ta iorak puseleat.”

¹⁰ Aleginangannia rimata, “Ke ai sipasikukua katubum apapa, ambit sirimanua nenda katubukku, oto taan igegeugeu ekeu minca.”

¹¹ Kuanangan sinanalep nenda, “Bule rimata masirepdep si Tuhan, Taikamanuam, bule sirmanua silumunake kamateiat togaku nenda ta igagalaiake minca bulat sikatai imateiake togaku sisara nene.” Aleginangannia si David, “Kalulut Tuhan sipuririmanua, beri sangantaili alai togam ta bebele'.”

¹² Lepa kuanangan sinanalep nenda, “Tuanku, ke momoi obaake kupanibo minca goiso.” Aleginangannia rimata, “Kauan.”

¹³ Panibonangan sinanalep nenda, “Kabagat sikuam nenda, anuseseakean puseleatnu kalulut ta anuobaake itoili togam sikuddu ka sareunan. Angoi anugalaiake puseleat kele nene ka paamian Taikamanua?

¹⁴ Sangamberitta mamatei le sita, sita nene kele oinan simapipili ka polak samba tamomoi tururuakenia minca. Tapoi Taikamanua ta iaala engan sirimanua, iate lulunia ibesiake bule itoili minca sirimanua siribbaiakenen nenda.

¹⁵ Akuoi kamatam kalulut arapalotoki aku sirimanua. Kalulut nenda akupaatu, kise: eddangan kupatiboake boiki rimata, bule pasese arepinangan tiddogetku;

¹⁶ kalulut iarepi samba ibebelaake aku rimata ka kabeira sioba masimateiake aku samba togaku. Rabesiake poi rakekle kai ka polak sikau Taikamanua ka paamianNia.

¹⁷ Matonem bagaku, palelengannu nenda bulat siarauake aku, kalulut rimata kele malaikat Taikamanua, siagai masibaggeiake simaeru samba sikatai. Bule si Tuhan Taikamanuam masipaalei ekeu!”

¹⁸ Aleginangannia rimata, “Ai sara parerekatku katubum, alegi bulat sibulatnia.” Aleginangan sinanalep nenda, “Kauan, kuangan.”

¹⁹ Kuanangan rimata, “Taleu si Joab le amasikoniake ekeu?” Aleginangan sinanalep nenda, “Kabagat purimanuaiatnu, tamomoi kupakele alegiat parerekatnu. Kirenangan si Joab le amasipaagai katubukku aponia galaiakenenku samba kuanenku.

²⁰ Tapoi aigalaiake nenda, bule ilepaake pakaroat nenda ka enungan simaeru. Simasiku patuat le ekeu kele malaikat Taikamanua bailiu nuagai sangamberi sipuaaili.”

²¹ Lepa nenda rimata masisogai si Joab samba kuanangan katubut Joab, “Kugagalaike le kiddiet bagam nenda. Kenan nuala si Absalom silainge nenda samba ambitnia sene.”

²² Purekkunangan si Joab kamatat rimata, lepa kuanangan, “Bule si Tuhan masisukatake ekeu! Kineneiget akuagaian, bulat nuoba aku kalulut anuarepingan tiddogetku.

²³ Lepa ei si Joab ka Gesur masiala si Absalom itoiliakenia ka Jerusalem.

²⁴ Tapoi kuanangan rimata, “Buita ka lalepnia le iei, bui ioi sene kamatakku.” Oto ei si Absalom ka lalepnia samba ta ameinia katubut rimata.

Si Absalom tupaabanake katubut David

²⁵ Ka sangaliot Israel taanai raumun laingen tubu kele laingen tubut Absalom. Barania ka bagat taddat rerenia pat aili buttet alainia taanai sikatai.

²⁶ Isapu alainia sangarura sangaminca, kalulut makokope le iagai tubunia sanet alainia. Sisapuat alainia nenda sanenia rua ngakilo siripot pasikilot rimata.

²⁷ Si Absalom ai telu tatogania taimanteu samba sara sinanalep simalainge tubu, sipuoni Tamar.

²⁸ Kele aikuddu si Absalom rua ngarura burunia ka Jerusalem, ta'pei leu ameinia katubut rimata.

²⁹ Iageti ka sara gogoi si Absalom masisogai si Joab ikoiniakenia iei katubut rimata, tapoi ta ioba si Joab mei katubut Absalom. Lepa sogainangan minca si Joab, ta leuet amei si Joab katubut Absalom.

³⁰ Iageti kuanangan si Absalom ka sapaguguletnia, “Nuagai kam monen Joab kabebet monengku samba sedda ai gandum. Labo kam mone nenda.” Lepa ei sapagugulet Absalom masilabo mone nenda.

³¹ Oto ei si Joab ka lalep Absalom samba kuanangan, “Angoi ralabo monengku sapaguguletnu?”

³² Aleginangannia si Absalom, “Kalulut ta amoi ekeu kateteret akusogai ekeu, bule kukoiniake ekeu mei katubut rimata nusegeake parerekatku katubunia, kise, “Aponia katukolobatnia akukaddiuake Gesur samba akuoi sene? Maeru peile mukuddu aku sedda.” Kuanangan minca si Absalom katubut Joab, “Oto besiake bule kuei masiailiake rimata, samba ke masele aku, eddangan iukum aku simateiakenen.”

³³ Iageti ei si Joab masiailiake Rimata David samba segeakenangan tiddoget Absalom. Lepa rimata masisogai si Absalom, samba ei si Absalom katubut rimata, purekkuknangan ka matat rimata samba sigguknangan si Absalom.