2Sam. 13 - BUKO SIPUNENAN

Si Amnon samba si Tamar

¹ Si Absalom togat David, ai sara baginia sinanalep simalainge tubu, oninia si Tamar. Si Amnon iate togat David situtuakenen ka sinanalepnia bagei, samba si Amnon maala bagania katubut Tamar

² samba makiddi kabagania ipaperepakenia. Tapoi tamomoi, kalulut si Tamar siokko peilenia samba tamomoi ipaaleiake taimanteu. Oto sarat nenda le ipaatu si Amnon pat bara besi'nia.

³ Ai sara suruak Amnon simaagai sipuoni Jonadab, togat Simea kebbut David.

⁴ Kuanangan si Jonadab kai Amnon, “Ale togat rimata, angoi makope reureu bagam senen gogoi? Aponia sibabara?” Aleginangannia si Amnon, “Maala bagaku katubut Tamar, bagit Absalom sarainangku.”

⁵ Iageti kuanangan si Jonadab katubut Amnon, “Perepake ekeu ka peremannu, samba kau le tubum kele simabesi. Ke moi ukkuinu masiitco ekeu, kuanungannia, “Ukkui, obaake ioi si Tamar bule iake komenku. Ke kuitconia iseu komen sene, akenangannia komkungannia.

⁶ Iageti ei merep si Amnon ka pereman samba galainangan tubunia kele simabesi'. Kele aioi Rimata David masiitconia, kuanangan si Amnon, “Ukkui, obaake si Tamar iseu rua kue sene kamatakku, kupukom.”

⁷ Iageti si David masikoiniake pakoinien katubut Tamar ka uma purimataat, bule isegeake patonekatnia, kise, “Kenan ka lalep kebbunu kai Amnon samba galainungan komennia.”

⁸ Lepa geti ei si Tamar sedda samba ailinangan si Amnon ainia memerep ka pereman. Iageti alanangan galajet kue si Tamar, lepa patareknangan kue kamatat Amnon bule iseunia.

⁹ Lepa nenda alanangan kue kabagat koali samba patareknangannia. Tapoi ta ioba mukom si Amnon. Kuanangannia, “Koiniake sia rabela sene sangamberitda!”

¹⁰ Kele arabela sangamberitda kabagat bilik nenda, kuanangan si Amnon katubut Tamar, “Ambit kue nenda ka bilik peremanku, samba pakomnungan aku!” Alanangan kue nenda si Tamar samba ambitnangannia ka bilit Amnon.

¹¹ Tapoi kele aitotoiake kue nenda si Tamar katubut Amnon, labanangan si Tamar samba kuanangan, “Konan taperep simakere, bagikku.”

¹² Tapoi kuanangan siokko nenda, “Ta kebbu, bui nupajo aku! Kalulut taanai aragalaiake kele nene ka Israel. Bui nugalaiake jo kele nene.

¹³ Ke muaili kele nene, kaipa kukakau matakku, samba leu rapaloloi te ekeu sirimanua ka Israel. Maeru peile nutiboinia katubut rimata, ioobaake le ibailiu aku sinanalepnu.”

¹⁴ Tapoi ta aireddet si Amnon, samba kalulut si Amnon peile maron tubu katubut Tamar, bailiu oinangan ipajo baginia.

¹⁵ Tapoi lepa nenda, makopenangan lagat bagat Amnon katubut Tamar bele peile alat bagania siboiki katubut Tamar. Lepa kuanangan si Amnon ka baginia, “Belaake ekeu!”

¹⁶ Tapoi aleginangannia si Tamar, “Ta kebbu, kalulut masikoiniake aku kutuitui peile makope katai ka sigalainu katubukku simaruei nene!” Tapoi ta aipuletsei si Amnon.

¹⁷ Iageti sogainangan paguguletnia samba kuanangan, “Ambit sinanalep nene ibela sene samba patpatake matatbaliu!”

¹⁸ Galaiakenangan pagugulet nenda kele siparentaakenen Amnon. Si Tamar masipakei leppei simananta samba siata para simalainge; kalulut kisedda te rapuleppei tatogat rimata tainanalep sita'pei mutalimou.

¹⁹ Iageti kaunangan abu ka utenia si Tamar, biritakenangan leppeinia samba tuituinia aitatatabbo matania ruangasilat kabeinia, samba leu ainia musosou simakope.

²⁰ Kele aiitconia si Absalom, kuanangannia, “Taleu aipajo ekeu kebbunu si Amnon? Oto kineneiget, mengmengake ekeu. Kebbunu le nia, oto bui nupaagainia kaipapa.” Lepa kuddu si Tamar sarania ka lalep Absalom, kebbunia.

²¹ Kele aiarep pagalaiat nenda si David pugolunangan simakope.

²² Samba si Absalom bulat makope lagat bagania katubut Amnon samba ta ioba patibo beri goiso katubut Amnon, kalulut aipajo si Tamar bagit Absalom.

Si Absalom masiala lumun

²³ Kele aitusabau rua ngarura, baraakenangan si Absalom punen pasisapuat bulut biribiri ka laggai Baal ka Hazor ka bebet laggai Efraim. Lepa sogainangan sangamberi tatogat rimata mupunen.

²⁴ Iageti ei si Absalom katubut Rimata David samba kuanangan, “Ukkui, kubaraake punen pasisapuat bulut biribiri. Oto bule moi ekeu sambamui siabeu tiboi tubu ka uma purimataat.”

²⁵ Tapoi aleginangannia si rimata, “Ta, togaku, ta sangamberimai momoi, babara magegeja bagam katubumai.” Lepa besiakenangan ina'nania si Absalom, tapoi ta ioba mei si rimata, sarat aiobaake le rimata igalaiake punen nenda si Absalom.

²⁶ Lepa kuanangan si Absalom, “Ke kisedda, obaake le ioi sarainangku si Amnon pasambamai.” Kuanangan rimata, “Apangan le lulunia ioi.”

²⁷ Tapoi kalulut ibesiake le ina'nania si Absalom, obaakenangan iei si Amnon samba sangamberi tatogat rimata ratut si Absalom. Lepa patareknangan si Absalom senengamata komen simakope eru.

²⁸ Lepa parentaakenangan sapaguguletnia si Absalom, “Lelekake kam simakolou, ke aipuinengan si Amnon ilo anggur, aile kukua kamatamui, “Mateiake kamnia. Bui numaloto kam. Aku le amasikoiniake kam. Oto ronake kam patuatmui samba patoila kam tubumui sibailiu sirimanua simagege!”

²⁹ Galaiakerangan leu sapagugulet nenda kele siparentaakenen Absalom ramateiake si Amnon. Kalulut raitco nenda tatogat rimata sabagei, ei sia ka kuro'ra samba putuituirangan.

³⁰ Kateteret aipeile sia katalagat enungan ratoili, sege katuareman katubut David, kise, “Sangamberi tatogat rimata aimateiakean sia Si Absalom, taanai sia berisara sipuririmanua!”

³¹ Lepa suru si rimata, “Biritakenangan leppeinia samba purapponangan kabagat lalep. Kisedda leuet sangamberi sipugagalai ka uma purimataat biritakerangan leu leppeira.

³² Tapoi kuanangan si Jonadab, togat Simea, kebbut David, “Bui makarat bagam samba bui nupaatu, amateian sangamberi tatogam. Sarat si Amnon le amatei, kalulut amakoinongan kapumataat Absalom kateteret aigalaiake jo si Amnon katubut baginia si Tamar.

³³ Oto bui imatonem bagam kamamateira sangamberi tatogam, aipoi sarat si Amnon le amatei.”

³⁴ Oto si Absalom amutuituiannia. Kateteret arapaingo matatda sipasijajago uma purimataat itcorangan sirimanua siooi situgogorosot sibara ka leleu ka ipot Horonaim.

³⁵ Kuanangan si Jonadab katubut rimata, “Itco pei, ai sia momoi tatogam! Aisesengan kele sikuaku.”

³⁶ Simaruei le ailepa aipanibo, sege tatogat rimata nenda. Pusourangan simakope. Kisedda leuet rimata samba sangamberi sipugagalai ka uma purimataat pusaourangan simakope.

³⁷ Si Absalom amutuituiannia samba aiannia katubut Talmai togat Amihur, rimata laggai Gesur. Samba si David maburu aipureureu baga kalulut si Amnon, togania.

³⁸ Kuddu si Absalom ka Gesur telu ngarura burunia.

³⁹ Iageti tata golunia rimata katubut Absalom, kalulut taan amareureu bagania kalulut kamamatei Amnon, samba marepdepnangan kabagania katubut si Absalom.