2Sam. 12 - BUKO SIPUNENAN

Patonekat Natan samba olei bagat David

¹ Lepa nenda, koiniakenangan Nabi Natan si Tuhan iei katubut David. Iageti ei si Natan katubut David samba kuanangannia, “Ai rua sirimanua kabagat sara laggai; sara simakayo samba sara simageba.

² Simakayo maigi tarimeu samba biribirinia;

³ tapoi simageba sangamuneng togat biribiri sigoiso le ai ka sia, sisakinia samba uraugetnia. Uraunangan togat biribiri nenda pat mabeunanangan ka lalepnia pasamba togania. Kaunangan komen togat biribiri nenda sibara ka komennia, lo sibara kapulokatnia samba merep ka kupkupnia, kele sara togania sinanalep.

⁴ Ka sara gogoi oi tairauma ka lalep simakayo nenda; samba bulat makope nuntut bagania iala sangamuneng biribirinia ele jauinia bule iseunia komenda tai raumania. Oto alanangan sara togat biribiri sinanalep bakkat simageba nenda, samba seunangannia komenda tairaumania.”

⁵ Masiarep nenda pugolunangan simakope si David kalulut sigalaiakenen simakayo nenda samba kuanangan katubut Natan, “Ka onin Tuhan sipuririmamnua: sirimanua sigalaiake nenda buita tuukumnia simateiakenen!”

⁶ Samba togat biribiri sinanalep nenda buita tulului silinia epat ngaminca epat, kalulut aigalaiake nenda samba ta iagai nuntut baga.”

⁷ Iageti kuanangan si Natan katubut David, “Ekeu te sirimanua nenda! Kise te aikua si Tuhan, Taikamanuan Israel: Aku te aisukatake ekeu sibailiu rimata ka Israel samba Aku te aibelaake ekeu ka kabei Saul.

⁸ Akuakean katubum sibabara kabagat lalep tuannu samba leu tainanalepnia. Akuakean katubum tai Israel samba tai Jehuda; samba ke tapei iaili nenda, akekungan leu minca katubum simakope igi.

⁹ Angoi nupaloloi si Tuhan nugalaiake sikatai ka mataNia? Si Uria tai Het nenda obaakenungan imatei ka lanjau; alanungan sinanalepnia samba bailiuakenungannia sinanalepnu, samba obaakenungannia imatei ka lanjaura tai Amon.

¹⁰ Kalulut nenda, ta tuaareu lanjau ka muntogatnu teret buruburu, kalulut anupaloloi Aku samba anuala sinanalep Uria, tai Het nenda nubailiuakenia sinanalepnu.

¹¹ Kise te aikua si Tuhan: Kuake te kamateiat katubum sibara ka muntogatnu. Kuaala te tainanalepnu kamatam samba Kukau sia ka sirimanua sabagei; samba sirimanua nenda masipaperepake tainanalepnu sinago.

¹² Kalulut anugalaiakenia nene sipinakele, oto Kugalaiake le pagalaiat nenda kamatatda sangamberi tai Israel.”

¹³ Lepa kuanangan si David katubut Natan, “Amajongan aku katubut Tuhan.” Aleginangannia si Natan, “Aiappeakean ekeu si Tuhan; oto taan mamatei ekeu.

¹⁴ Kenanen kisedda, kalulut anupaloloian poi si Tuhan kasigalaiakenennu nenda, oto matei le geti togam sipututu'tu mata sibau nenda.”

¹⁵ Lepa nenda toili si Natan ka lalepnia. Samba si Tuhan masikau besit togat David situtuakenen Betsyeba, silumangakenen Uria nenda.

Kamateiat togat David

¹⁶ Lepa panindounangan si David katubut Tuhan bule ialeake toga nenda. Taipukomnangan si David, samba ke tugurunia ka bilik purapponangan sangasoibo kabagat biliknia.

¹⁷ Lepa geti ei sikebbukat laggai masina'nania bule itusuru, tapoi ta ioba; samba leu ta ioba rapukom simakere.

¹⁸ Ka gogoi sikapitunia matei toga nenda. Samba sapagugulet David maloto sia rapaagainia katubut David kamamatei toga nenda. Aipoi rakua, “Kateteret aipeile muririmanua toga nenda, amanibongan sita katubunia, tapoi ta aipuuku tiboietta. Sarapei kineneiget amateian togania! Babara ibebesiki tubunia!”

¹⁹ Kele aiitco paguguletnia si David rapamoile nganganda, againangannia kamamatei toga nenda. Lepa parerenangan ka sapaguguletnia, “Taleu amateian toga nenda?” Alegirangannia, “Amateiannia.”

²⁰ Iageti suru si David kabagat lalep, lepa puraunangan, linggrunangan alainia samba leu silinangan leppeinia. Iageti einia manindou ka Uman Tuhan. Lepa nenda toilinia ka uma purimataat, samba tiddounangan bule rapatarek komennia, lepa pukomnangan.

²¹ Kuarangan sapaguguletnia, “Aponia katukolobat sigalainu nene? Kateteret aipeile muririmanua toga nenda, taipukomnungan samba musou, tapoi kele aimatei, tusurunungan samba mukom!”

²² Aleginangannia si David, “Kirenangan kateteret aipeile muririmanua toga nenda ta amukom aku samba musou, kalulut akupaatu poi: bule manuntu leu bagaNia si Tuhan katubukku, samba obanangan si Tuhan ipurimanua toga nenda.

²³ Tapoi kineneiget, kele aimatei, apangan le lulunia ta kupukom? Momoi pa kurimanuaakenia minca? Aku le memei ka kudduatnia, tapoi kineneiget taan totoilinia katubukku.”

Pututukat matat Salomo

²⁴ Iageti si David masipusuibi patuat Betsyeba, sinanalepnia, lepa perep sia ruatda. Lepa tutuakenangan matat sara toga simanteu si Betsyeba samba kaunangan oninia Salomo. Si Tuhan manuntu bagaNia katubut toga nenda

²⁵ samba si Tuhan masikoiniake Nabi Natan masikau onin toga nenda iate Jedija, kalulut manuntu bagaNia si Tuhan.”

Kalepakat pasaggangan masisaggangi tai Amon

²⁶ Kateteret nenda leuet aipeile pasasaggak si Joab isaggangi Raba laggaira tai Amon, samba oinangan aikupkupake laggai nenda.

²⁷ Lepa koiniakenangan sara pakoinien si Joab iei masiailiake si David masisegeake, kise, “Akusaggangingan laggai Raba, samba akukupkupakean oinan laggai nenda.

²⁸ Kineneiget, bule nururuake saladdutta sipulelegei, lepa uteakerangan pasaggangan bule tukupkupake laggai nenda. Bule bui rakuania sirimanua aku le amasikupkupake laggai nenda.”

²⁹ Lepa ruruakenangan sangamberi sipasitututnia si David, samba einia ka laggai Raba samba sagganginangan laggai Raba, samba leu kupkupakenangannia.

³⁰ Alanangan leu si David kirit purimataat ka utet rimatatda sipuoni Milkom, samba kaunangan ka utenia si David. Kirit purimataat nenda sane'nia telu pulu lima ngakilo samba sibara pulaingean bukku simalainge simakirisau. Samba maigi leu aiambit si David bibilet sirauraunia ka laggai nenda.

³¹ Kisedda leu sipulalagai ka laggai nenda ambitrangan sia samba koiniakenangan sia si David mugalai ragalaiake gagaji, papakkru, kampak samba kaunangan sia mugalai ka pasigalaiat batu bata. Kisedda leuet aigalaiake si David ka tai Amon. Lepa nenda toili si David ka Jerusalem sambatda sangamberi sipasitututnia.