2Sam. 11 - BUKO SIPUNENAN

Si David samba si Betsyeba

¹ Ka pasailiat rura, tetere simatukle raei pasaggak tai rimata, si David masikoiniake si Joab sambatda sangamberi saladdu Israel raei pasaggak. Subuakerangan tai Amon samba alourangan laggai Raba. Tapoi si David ainia ka Jerusalem.

² Ka sara tetere kasoibokat, kele aitusuru si David merep, puenungnangan ka uddut uma purimataat ka simagaktuk. Iageti ainia sedda itconangan sara sinanalep sipurarau, samba sinanalep nenda bulat malainge tubunia.

³ Lepa koiniakenangan sia si David bule raparereake kasei sinanalep nenda, samba paagairangan katubunia, sinanalep nenda iate si Betsyeba; ukkuinia sipuoni Eliam samba simanteunia iate si Uria tai Het.

⁴ Lepa nenda koiniakenangan sia si David bule raala sinanalep nenda. Kele aisege sinanalep nenda ka uma purimataat, paperepakenangannia si David. (Si Betsyeba simaruei le aipalina tubunia ka lolit tubunia siripot katukelatda tai Jehudi). Lepa toilinia ka lalepnia.

⁵ Lepa geti pusuruketnangan sinanalep nenda, samba koiniakenangan sirimanua rapaagainia katubut David pagalaiat pususuruketnia.

⁶ Lepa koiniakenangan sirimanua si David raei ka Joab, masikua, “Koiniake si Uria tai Het nenda ioi katubukku.” Iageti si Joab masikoiniake si Uria iei masiailiake si David.

⁷ Kele aisege si Uria kamatat Rimata David, rereakenangan rimata pagalaiat si Joab samba tai Israel samba leu pagalaiat pasaggangan.

⁸ Iageti kuanangan si David katubut Uria, “Toiliake ekeu ka lalepnu samba puari boiki goiso.” Kele aibela ka purimataat si Uria, koiniakenangan sirimanua rimata raailiake si Uria bule rakau panguruat sibara ka Rimata David.

⁹ Tapoi si Uria ta atoilinia ka lalepnia, amerep le nia ka matatbaliu gugurukat uma purimataat sambatda sipasijajago rimata.

¹⁰ Paagairangannia pagalaiat nenda katubut David. Iageti rerenangan si Uria, “Simaruei le anutoili baram ka sareunan, angoi ta anutoili ka lalepnu?”

¹¹ Aleginangannia si Uria, “Peti Pakerekat Baga, tai Israel samba tai Jehuda ai sia mukuddu ka sapou, kisedda leuet si Joab samba saladdut tuanku aisia musasapou ka polak simalio; angoian le kutotoili kaku ka lalepku, mukom, mulo samba merep ka sinanalepku? Kalulut purimanuaiatnu samba engam, ta kugagalaiake kele nenda!”

¹² Kuanangan si David katubut Uria, “Kuddungan sene gogoi nene, samba simanseman momoi nutuitui.” Oto ka gogoi nenda kuddu si Uria ka Jerusalem. Ka mansepnia

¹³ sogainangannia si David bule rapukom simakere, samba si David masikau lot Uria simigi bailiu puinengnangan leu si Uria. Ka soibo nenda ta atoili si Uria ka lalepnia, tapoi amerep le nia kabagat bilikra sipasijajago uma purimataat.

¹⁴ Ka mansepnia galainangan patonekat si David ka bagat karate kaunennia katubut Joab samba ambitnangannia si Uria.

¹⁵ Kise ngangan patonekat nenda, “Kau si Uria ka mungkuat bulat kamata, kabagat pasaggangan sabeu, lepa soksokakemuian tubumui katubunia, bule ramateiakenia.”

¹⁶ Oto aiaalou laggai si Joab, koiniakenangan si Uria ka kudduat siagainia iate kudduatda tai saggak simagege.

¹⁷ Kele arabela tai saggak baratda ka laggai raei masisaggangi saladdut Joab, matei piga pa sia saladdut Joab; kisedda leuet si Uria tai Het nenda amatei leuet nia.

¹⁸ Iageti koiniakenangan pakoinien si Joab raei masisegeake katubut David pueenungnia pasaggangan nenda.

¹⁹ Kise ngangan parentat Joab segeakenen pakoinien nenda, “Ke alepaan nupaagai pueenungnnia pasaggangan nenda katubut rimata,

²⁰ samba ke mugolu rimata samba ikua katubum: Angoi makope legremui ka laggai nenda nupasaggak kam? Ta pa nuagai kam, rapapana te kam sikuddu ka uddut irip?

²¹ Kasei amasimateiake si Abimelekh togat Gideon? Ta pa sara sinanalep sikuddu ka uddut irip amasisaksakake ka utenia bukku pasigulutut, pat mateinia ka Tebes? Angoi makope legremui ka irip laggai nenda? – oto kua katubunia: Kisedda leuet paguguletnu si Uria tai Het nenda, amateiannia.”

²² Lepa tuitui pakoinien nenda masiailiake si David samba segeakenangan leu kele siparentaakenen Joab katubunia.

²³ Kuanangan pakoinien nenda katubut David, “Saggakmai peile maron kakai arabela ka laggai arasaggangi kai ka kudduat simalio. Tapoi okkipmaian sia minca pat aili ka matatbaliu gugurukat laggai.

²⁴ Kateteret nenda panarangan kai sikuddu ka uddut irip, bailiu piga pa amatei saladdu katalagamai; kisedda leuet paguguletnu si Uria, tai Het nenda amateiannia.”

²⁵ Iageti kuanangan si David ka pakoinien nenda, “Kise nukukua katubut Joab: Bui imatete patuatnu kalulut sangamberinia nene, kalulut matuklengan ramatei sirimanua ka lanjau. Kalulut nenda kau makope nusaggangi laggai nenda samba pakatainungannia. Kise te nuronake patuatnia!”

²⁶ Kele aiarepnia sinanalep Uria, simanteunia si Uria amateiannia, iageti pusounangan simakope kalulut kamateiat simanteunia nenda.

²⁷ Kele aitusabau gogoi pureureugat baga, koiniakenangan sia raala sinanalep nenda raambitnia ka uma purimataat David. Sinanalep nenda bailiunangannia sinanalep David samba tu'tuakenangan sara toga simanteu. Tapoi sigalaiakenen David nene iate makatai kamatat Tuhan.