2Sam. 10 - BUKO SIPUNENAN

Si David masikalaake tai Amon samba tai Aram

¹ Lepa nenda matei si Nahas Rimata Amon, samba si Hanun togania ibailiu rimata masisailiakenia.

² Lepa kuanangan rimata David, “Si Nahas iate suruakku simatopit, oto buita kisedda leuet aku katubut Hanun togania.” Kalulut nenda si David masikoiniake pakoinietnia ka laggai Amon bule rapusuibi bagat Hanun kalulut kamateiat ukkuinia.

³ Kele arasege ka Amon, sangamberi sikebbukat laggai nenda masikua ka Rimata Hanun, “Bui' te nupaatu, si David masiake pakoinietnia nenda kalulut ioba masiabeuake ukkuinu! Aiakoiniake sangamberi sirimanua nenda raoi sene masilelekake laggaita le, bule ioi ioppunia!”

⁴ Lepa koiniakenangan sia si Hanun masilaba' sangamberi sikoiniakenen David nenda, samba koiniakenangan rakirit bulut ngungunda sapakoinien David nenda sangasila samba leu ratippu leppeira teret koddokra, lepa koniakenangan sapakoinien David nenda bule ratoili.

⁵ Paagairangan pagalaiat nene katubut David, lepa koiniakenangan sirimanua raailiake sia, kalulut arapakaila sia sirimanua nenda. Kuanangan rimata, “Kuddungan kam ka Jerikho teret iputu'tu minca bulut ngungumui, lepa geti toili kam.”

⁶ Iageti agairangannia tai Amon sigalaira nenda iate sibaraake golut David. Kalulut nenda sakirangan rua pulu ribu saladdut Aram sikuddu ka laggai Bet ka Rehob samba ka Zoba, pulu rua ngaribu saladdu sibara ka Tob, samba leu rimata laggai Maakha pasamba sangaribu sipasitututnia.

⁷ Kateteret aiarep pagalaiat nenda si David koiniakenangan si Joab pasamba sangamberi sipasitututnia raei masisagganngi sia.

⁸ Iageti oi saladdut Amon, samba patareknangan saladdutda kamatat matatbaliu gugurukat laggai Raba. Oto ka sia tai Aram, tai Zoba, tai Rehob, tai Tob samba tai Maakha airapatatarek saladdutda ka polak simalio.

⁹ Kele aiitconia si Joab, araokkipannia tai saggak kamata samba ka teitei. Kalulut nenda pilinangan saladdut Israel simagege samba pagalaknangan sia sipamamatai ka saladdut Aram.

¹⁰ Saladdut Israel sipulelegei, kaunangan sia katubut Abisai baginia, ipatarek sia rapamatai ka saladdut Amon.

¹¹ Kuanangan si Joab kabaginia nenda, “Ke ta'an amoi tubukku kusaggangi saladdut Aram, konan simaola nuropake aku. Kisedda leuet, ke taan amoi katubum nusaggangi tai Amon, aile kuoi kuropake ekeu.

¹² Ronnake patuatnu, kau tamagege pasaggak addeat laggai samba laggai Taikamanuanta. Bule si Tuhan masigalaiake apa siteuakenenNia.”

¹³ Lepa geti ei si Joab samba sipasitututnia pasaggak rasaggangi tai Aram, pat putuituirangan leuet tai Amon.

¹⁴ Kateteret araitconia tai Amon araputuitui saladdu Aram, putuituirangan leuet ka sia samba tugururangan ka laggai. Lepat arasaggangi tai Amon, toili si Joab ka Jerusalem.

¹⁵ Kele araitconia tai Aram, amakalangan sia ka tai Israel, sogairangan sangamberi saladdutda bule raparuru.

¹⁶ Lepa geti Rimata Hadadezer masikoiniake bule rasogai tai Aram sikuddu ka isit kabelaiat sulu Oinan Efrat. Iageti oi sia ka Helam, iuteake sia iate si Sobakh, ute saladdu Rimata Hadadezer sibara ka Zoba.

¹⁷ Masiarep pagalaiat nenda, si David masiruruake sangamberi saladdut Israel, lepa putaliporangan ka bagat oinan Jordan samba ei sia ka Helam. Patarekrangan saladdut sedda tai Aram, lepa ei sia masisaggangi saladdut Israel.

¹⁸ Tapoi kalaakerangan sia saladdut Israel. Si David samba sipasitututnia masimateiake pitu ngotu sia simuriake kereta pasaggak, samba epat pulu ribu sia saladdu sipueenung rere. Si Sobakh leuet utet saladdut Aram nenda matei leuetnia.

¹⁹ Kateteret aiitconia si Hadadezer, sangamberi rimata kabagat kupkumennia arakalaakean sia saladdut Israel, tiddourangan paaban katubut David, samba bailiunangan sia kupkumen David. Barania kateteret nenda, tai Aram ta'an raoba minca masiropake tai Amon.