2Rim. 9 - BUKO SIPUNENAN

Si Jehu tusukatnake ibailiu rimata Israel

¹ Iageti sogainangan sara katalagatda tai nabi si Elisa samba kuanangan katubunia, “Patarek tubum nuei ka Ramot ka Gilead samba ambitnungan buli-buli nene sibara ka baga tulat zaitun.

² Ke asegean ekeu sedda gabanungan si Jehu togat Josafat punuteteu Nimsi. Sogainungannia sarania samba ambitnia ka bagat sara bilik.

³ Lepa geti uruakenungan tula nene ka utenia samba kua katubunia, “Kise te aikua si Tuhan, Kusukatnake ekeu ibailiu ekeu rimata Israel.” Lepa nugalaiake nenda, kaddiuakenunga ukudduat nenda simaola.”

⁴ Lepa ei nabi sibau tubu nenda ka Ramot.

⁵ Kele aisege sedda itconangan si Jehu aisia parururu sambatda sautet saladdu. Lepa kuanangan nabi nenda, “Tuan, ai patonekat segeakenenku katubum.” Aleginangannia si Jehu, “Kasei katubu kasegekat patonekat nenda.” Aleginangannia Nabi nenda, “Katubum Tuan.”

⁶ Iageti guru' sia ruatda ka lalep, lepa geti uruakenangan tulat zaitun nenda ka utet Jehu samba kuanangan, “Kise te aikua si Tuhan Taikamanuan Israel, “Kusukatnake ekeu ibailiu ekeu rimata ka paamianKu Israel.

⁷ Subuakenungan te geti keluargat tuannu si Ahab. Kisedda te Kuukum si Izebel simateiake tai nabiKu samba sapaguguletKu sabagei.

⁸ Sangamberi keluarga samba sapunuteteu Ahab bui' ta matei sia. Senen taimanteu simabaja' samba sibau tubu bui' ta Kusubuake sia.

⁹ Kugagalaiake te geti katubut keluargat Ahab kele sigalaiakenenKu ka keluargat Jerobeam togat Nebat samba ka keluargat Baesa togat Ahia.

¹⁰ Komnangan te geti si Izebel jo'jo ka mone kakupkumen laggai Jizreel samba ta'anai sirateiakenia.” Iageti bela nabi nenda, lepa tuituinia.

¹¹ Toili si Jehu ka saaleinia, lepa rererangannia, “Aponia sibabara? Angoian le aioi sirimanua siroro' nenda katubum?” Aleginangannia si Jehu, “Anuagaian kam.”

¹² Tapoi alegirangannia, “Ta' kuagai kai, kua pei katubumai!” Aleginangannia si Jehu, “Aisegeake patonekat Tuhan, tuudetnake aku ibailiu rimata Israel.”

¹³ Olaakerangan rabuka leppeira saaleinia samba apoakerangannia ka orat ka matat Jehu. Lepa nauakerangan trompet samba pusogarangan, “Si Jehu rimata!”

¹⁴ Kisedda te ibaraake pukerekat baga si Jehu togat Josafat masisaggangi Rimata Joram kateteret nenda ainia ka Jizreel.

¹⁵ Tapoi ka sia si Joram atoilingannia ka Jizreel, bule itulaggek siorangan katubunia, kalulut pasaggangan arasaggangi si Hazael rimatatda tai Siria. Kuanangan si Jehu ka saaleinia, “Ke noba kam ibailiu aku rimata, bui' ibara sara sirimanua sibebela ka Ramot siei masisegeake ka tai Jizreel.”

¹⁶ Lepa nenda sakai si Jehu ka kereta pasaggaknia samba einia ka Jizreel. Kateteret nenda ta'pei amale si Joram samba si Ahazia ainia sedda ibalou si Joram.

¹⁷ Kele araitco aioi si Jehu samba saladdunia sia sipujajago ka kudduat pujagoat, pusogarangan, “Akuitco mungkuat saladdu siooi sene!” Kuanangan si Joram, “Koiniake sara saladdu sipukukuro iei masilelekngake, saalei leu pa sia ele saggak.”

¹⁸ Lepa ei sipukukuro nenda masiailiake si Jehu samba kuanangan, “Makiddi ka bagat rimata iagainia, ka bagat paaleijat pa nuoi nene.” Aleginangannia si Jehu, “Ta' galajetnu nene, konan paruru ka tubuku.” Sipujajago nenda aiitcoan aisege saladdu nenda ka mungkuat Jehu, tapoi ta'an atoilinia.”

¹⁹ Lepa koiniakenangan saladdu sabagei. Saladdu nene kisedda leu et aiparere kai Jehu samba aleginangannia si Jehu, “Ta' galajetnu nene! Konan paruru katubukku!”

²⁰ Segeakenangannia minca sipujajago nenda kasesegenia saladdu nenda ka mungkuat Jehu, tapoi ta'an atoilinia. Lepa kuanangannia minca, “Ele si Jehu le utera mungkuat nenda, kalulut iabbit kereta pasaggaknia kele sirimanua siroro'.”

²¹ Lepa nenda kuanangan si Joram, “Tarekngake keretakku!” Iageti tarekngakerangan keretania. Lepa tuitui sia ruadda si Ahazia ka kuro'ra pasasaratda masiailiake si Jehu. Ailirangan si Jehu ka monen Nabot, tai Jizreel nenda.

²² Kele aiitco si Jehu si Joram, rerenangannia, “Ka bagat paabanan pa nuoi nene? Aleginangannia si Jehu, “Kipa ioi ibara paabanan, ke ai peile sene pasibubuluiji sabulungan samba tai kerei sibaraakenen inam si Izebel?”

²³ Olaakenangan ibiluake keretania si Joram, lepa tuituinia samba pugereinangan, “Pabokoat le nenda, Ahazia!”

²⁴ Tapoi raiknangan rourounia si Jehu kaseget ronnia, lepa pananangan Joram oraknangan teiteinia pat bela kateinungnia, iageti bele si Joram samba mateinia ka bagat keretania.

²⁵ Iageti kuanangan si Jehu kai Bidkar, sipasijajagonia, “Aipeile nurerepdem, kateteret atapukuro tatut si Ahab, ukkui Joram?

²⁶ Kateteret nenda aikua si Tuhan katubut Ahab, “Akuagaian kasei amasimateiake si Nabot samba tatogania sokat, oto musuppa Aku, Kuukum te ekeu geti ka mone nene leu et. Kuanangan minca si Jehu, ka sipasijajagonia, “Kalulu nenda, ribbaiake tubut Joram nene ka monen Nabot, bule ipuaili kele sikuat Tuhan.”

Kamateiat Ahazia, rimata Jehuda

²⁷ Kele aiitconia si Ahazia sipuaaili nene, putuituinangan iailiake laggai Bet-Hagan, tapoi kukrunangannia si Jehu samba pugereinangan ka saladdunia, “Mateiake leu et kamnia!” Iageti panarangannnia ka uddut keretania ka panatarat siei ka Gur kabebet laggai Jibleam. Tapoi amoi peile aiputuitui pat segenia ka Megido, samba mateinia sedda.

²⁸ Alarangan tubunia tai pegawainia samba abbitrangannia ka Jerusalem, lepa rateiakerangannia ka bebet taikebbukatnia ka laggai David.

²⁹ Bailiunangan si Ahazia rimata ka Jehuda kateteret si Joram togat Ahab aiparentaake Israel pulusara ngarura.

Kamateiat Ratu Izebel

³⁰ Sege si Jehu ka Jizreel. Kele aiarep sibabara si Izebel, palaingenangan alainia samba leu matania, lepa paloggounangan ka jandela.

³¹ Kele aituguru' si Jehu ka matat baliu laggai, pusoganangan si Izebel, “Hei Zimri, sipamamatei, aponia nuala sene?

³² Pitcaakenangan matania si Jehu ka saigit jandela, samba kuanangan, “Kasei mare're katubukku? Kele araarepnia rua ele telu sia sipugagalai ka uma purimataat, loggouakerangan ka repe.

³³ Kuanangan si Jehu katubutda, “Ribbaiake kamnia ka repe!” Iageti ribbaiakerangannia ka repe, pat pukitcinangnan logaunia ka rupi samba ka kuro, paperakirangan leu tubunia.

³⁴ Tugurunangan si Jehu ka baga, lepa pukomnangan samba mulo. Iageti kuanangannia, “Pasikeli kam tubut sirimanua sikatai nenda samba rateiakemuiannia, kalulut togat rimata le nia.

³⁵ Tapoi kele araei rarateiakenia, ta arasese tubunia, sarat ute samba ruangasilat rere samba takepnia le arasese.

³⁶ Lepa nenda toili sia masisegeake kai Jehu, kuanangannia, “Kirenangan kisedda aikua si Tuhan, katubut Elia paguguletNia: Ikokom te tubut Izebel jo'jo ka kupkumen laggai Jizreel,

³⁷ samba legei tubunia nenda masaragainangan kele tanai tarimeu, bailiu berisara sirimanua siagainia kasei tubu simamatei nenda.”