2Rim. 8 - BUKO SIPUNENAN

Sinanalep sibara ka Sunem toili ka laggai Israel

¹ Aikuangan si Elisa katubut sinanalep, sirimanuaakenennia togania, kise aikua, “Patarek tubum samba putuitui kam sambamui sangalelapmui, samba kudduake kam ka laggai bagei, kalulut ibabaraake te si Tuhan pulajeat ka laggai nene pitu ngarura burunia.”

² Galaiakenangannia sinanalep nenda sikuat Elisa, samba ei sia mukuddu ka laggai Filistin.

³ Kele aitusabau pitu ngarura toilinia ka Israel. Lepa einia sambatda tatogania kai rimata masitiddou bule ratoiliake lalep samba monenia katubunia.

⁴ Kateteret nenda si Gehazi pagugulet Elisa, aitiddou rimata katubunia bule itiboi pagalaiat pukerengan sigalaiakenen Elisa.

⁵ Kateteret aititiboi si Gehazi katubut rimata pagalaiat airimanuaake sara toga simamatei si Elisa, oi sinanalep sibara ka Sunem nenda kai rimata masisegeake tiddogetnia. Lepa kuanangan si Gehazi, “Tuaku! Nene te sinanalep nenda samba nene te togania sirimanuakenen Elisa!”

⁶ Lepa rerenangan sinanalep nenda si rimata, samba tiboinangan sinanalep nenda sangamberi sipuaaili katubut togania nenda. Lepa nenda sogainangan sara sipugagalai katubunia si rimata samba koiniakenangannia bule tutoiliake sangamberi bakkatnia samba sangamberi buat monenia burunia aikaddiuake laggai.

Si Elisa ka Damsyik

⁷ Ka sara tetere si Elisa mei ka Damsyik. Ka ipot gogoi nenda leu et aimabebesi' Rimata Benhadad. Kele aiarepnia rimata ka babarat Elisa ka Damsyik,

⁸ kuanangan kai Hazael, “Kau panguruat katubut nabi nenda, samba tiddou katubunia bule irereake kai Tuhan mamale leu pa aku ele ta.”

⁹ Alanangan epat pulu unta si Hazael samba kaunangan ka uddut unta senengamata pukayaot laggai Damsyik, lepa tuituinia iailiake si Elisa. Kele aisege kai Elisa, kuanangan si Hazael, “Aikoiniake aku paguguletnu si Benhadat, masiparereake katubum, mamale leu pa nia ele ta.”

¹⁰ Aleginangannia si Elisa, “Kenan kua katubunia: Bulat mamale le ekeu. Tapoi kenanen kisedda, aipoiliatnan si Tuhan katubukku, ramamateiake te nia.”

¹¹ Iageti kinerenangan si Hazael si Elisa simaburu, lepa pusounangan si Elisa.

¹² Kuanangan si Hazael, “Angoi le nupusosou Tuan.” Aleginangannia si Elisa, “Kalulut kuagai galaiakenennu sikatai katubutda tai Israel. Labonungan geti palaggai-laggai sibara irip bukku, mateiakenungan tailainge samba petcutnungan lolokkatda tatoga sigoiso samba leu sausaunungan balugura tainanalep sibara suruket.”

¹³ Lepa kuanangan si Hazael, “Aku nene kele sara jo'jo le, bailiu oinangan kugalaiake sisaliu katai! Aleginangannia si Elisa, “Aipoiliatnan si Tuhan katubukku, aipoi ekeu te ibabailiu rimata ka Siria.

¹⁴ Kele aitoili si Hazael ka uma purimataat, rerenangannia si Benhadat, “Aponia aikua si Elisa?” Aleginangannia si Hazael, “Aikua katubukku, mamale le ekeu.”

¹⁵ Tapoi ka mansepnia alanangan sara sobbe si Hazael, samba sopsopmakenangannia ka bagat oinan, lepa neineiakenangannia ka matat rimata bailiu matei si rimata. Bailiunangan si Hazael rimata ka Siria masisailiake si Benhadat.

Joram rimata Jehuda

¹⁶ Si Jehoram togat Josafat ibailiu rimata ka Jehuda kateteret ailepa aiparentaake Israel lima ngarura si Joram togat Ahab.

¹⁷ Kateteret nenda si Joram telu pulungan rurania samba aipuparenta ka Jerusalem balu ngarura burunia.

¹⁸ Paraboatnia makere paraboatda tai rimata Israel kele sigalaiakenen keluargat Ahab, kalulut sinanalepnia iate togat Ahab. Galaiakenangan sikatai ka matat Tuhan.

¹⁹ Tapoi si Tuhan ta ioba isubuake Jehuda kalulut ai palelenganNia ka David, paguguletNia, iate muntogatnia bui' ta mariuriu ibailiu rimata.

²⁰ Ka bagat puparentaat Jehoram, taimareddetnangan si Edom ka purimataat Jehuda samba uddetnakerangan sara rimatatda.

²¹ Kalulut nenda, ei si Jehoram pasamba sangamberi kereta pasaggaknia ka Zair. Kateteret sinoibo surunia, lepa ei sia simakere sambatda sangamberi sautet saladdu sipukekereta masiterobos mungkuatda tai Edom sipasialou sia, tapoi tuitui sia saladdunia ratoili ka lalepda.

²² Barania kateteret nenda mareddetnangan minca si Edom ka purimataat Jehuda. Kateteret nenda leu et tai mareddetdrangan sipulaggai ka Libna.

²³ Pumumuannia bagei pagalaiat si Jehoram tusuratnake ka buko Pagalaiat Tai Rimata Jehuda.

²⁴ Iageti matei si Joram samba rateiakerangannia ka bebet taikebbukatnia ka laggai David. Oto si Ahazia, togania, ibailiu rimata masisailiakenia.

Ahazia rimata Jehuda

²⁵ Si Ahazia togat Jehoram ibailiu rimata Jehuda kateteret ailepa aiparentaake Israel pulurua ngarura si Joram togat Ahab.

²⁶ Kateteret nenda si Ahazia rua pulungan rurania, samba puparentanangan ka Jerusalem sangarura burunia. Onin inania Atalya, togat Rimata Ahab, punuteteu Omri rimata Israel.

²⁷ Paraboatnia makere paraboat keluargat Ahab samba masigalaiake sikatai ka matat Tuhan kele keluargat Ahab, kalulut nia taliku ka bagat keluarga nenda.

²⁸ Rimata Ahazia mei pasaggak sambatda si Joram rimata Israel masisaggangi si Hazael rimata Siria. Pasaggakdrangan ka Ramot, ka kupkumen laggai Gilead. Tapoi bara siorangan katubunia si Joram ka bagat pasaggangan nenda.

²⁹ Iageti toili Rimata Joram ka Jizreel, bule itulaggek siorangan katubunia kalulut pasaggangan ka Ramot arasaggangi si Hazael, rimata Siria. Samba ei leu sedda si Ahazia, togat Joram rimata Jehuda masibalou si Joram.