2Rim. 7 - BUKO SIPUNENAN

¹ Kuanangan si Elisa, “Arepmake sikuat Tuhan! Mansep kele ka gogoi kele nene, sara bulagat perak momoi rasaki telu ngakilo gandum simaeru samba enem ngakilo gandum ka matat baliu laggai Samaria.”

² Aleginangannia sara sipasijago rimata, “Ta' momoi! Ta' muaaili, kenanen ibeleake urat simatirit si Tuhan sibara ka manua. Aleginangannia si Elisa, “Aile nuinconia ipuaili, tapoi ta te nunanam beri goiso komen nenda.

Mutuitui saladdutda tai Siria

³ Ka gogoi nenda ai epat sirimanua simalubbe ka matatbaliu laggai Samaria. Kuanangan sara sirimanua katalagatda, “Apangan le lulunia takukuddu sene tangena matei?

⁴ Ke tuguru' sita ka laggai, matei sita kalulut laje, samba ke mukuddu sita sene, matei leu et sita. Maeru peile mei sita ka pusapougatda tai Siria. Ele ramamateiake le sita. Tapoi ele ta ragagalai apapa katubutta.”

⁵ Kele aimasoibo ei sia ka pusapougatda tai Siria, tapoi ta araitco berisara sirimanua sedda.

⁶ Kalulut aigalai si Tuhan raarep tai Siria kele sara pasaggangan sara saladdu sabeu sipukukuro samba sipukekereta. Rakua poi tai Siria, tai Israel masibulagani rimata Het samba tai Misir samba leu saladdunia rasaggangi sia.

⁷ Kalulut nenda soibo nenda leu et tuitui sia, kaddiuakerangan leu et sapou, kuro samba leu kalidei ka pusapougatda.

⁸ Sege sia siepat simalubbe nenda ka bebet pusaupogat nenda, samba guru' sia ka sara sapou. Pukomrangan samba mulo sedda samba alarangan mas, perak samba leu bibilet, lepa ei sia masilipputnake. Lepa nenda ei sia minca ka bagat sapou bagei, alarangan leu bibilet samba ambitrangannia, lepa ei sia masilipputnake.

⁹ Lepa kuanangan sara katalagatda, “Ta' maeru sigalaita nene. Gogoi nene iate katuagaiat simaeru samba siripokatnia bui' ta tupaagai le! Ke tangena teret mansep, oraknangan leu sita ukuman. Maeru peile mei sita kineneiget masipaagai ka lalep purimataat rimata.”

¹⁰ Kalulut nenda, toili sia ka Samaria samba pusogarangan ka sipasijajago matatbaliu laggai, “Ameian kai ka pusapougatda tai Siria, ta anai sia sedda. Kuro samba kalideira aipeile tuaappra ka kudduatnia, samba sapoura tenan le sia kaddiuake.”

¹¹ Sogaakeranga leu katuagaiat nenda sipujajago samba segeakerangannia ka lalep purimataat rimata.

¹² Kenanen masoibo peile, tusurunangan leu rimata samba kuanangan ka sipujajago, “Arepmake kam! Akuagaian pinaatutda tai Siria! Araagaian ai sita ka bagat pulajeat, kalulut nenda kaddiuakerangan sapoura samba ei sia mulipput ka simatangeu, arapaatu poi: ke bela sita ka bagat laggai, palabakirangan sita samba kudduijirangan laggai.”

¹³ Kuanangan sara sipugagalai ka rimata, “Tuan, sita sikukuddu ka bagat laggai nene makere le purimanuaitda sia simamatei. Kalulut nenda, eddangan takoiniake piga pa sia rapakei kuro sibabara nene, bule raei masiitco apa sipuaaili sedda.”

¹⁴ Iageti pilirangan piga pa sirimanua, lepa koiniakenangan sia rimata masipakei rua kereta pasaggak samba ei sia masiitco aponia sipuaaili ka saladdutda tai Siria.

¹⁵ Lepa ei sia samba sege sia ka Oinan Jordan. Kasanganantat puenungananda itcorangan bibilet samba pugalai siribbaiakenenda tai Siria kateteret araputuitui. Iageti toili sia sikoniakenen nenda samba segeakerangan kai rimata sangamberi siitcora.

¹⁶ Iageti bela sipulalaggai ka Samaria parauraugirangan pusapougatda tai Siria. Puailinangan leu kele sikuat Tuhan, telu ngakilo gandum simaeru ele enem ngakilo gandum bagei, sakinia sara bulagat perak le.

¹⁷ Aikau leu rimata sara sipasijajagonia mujago ka matatbaliu laggai, tapoi paperakirangannia sirimanua simigi ka matatbaliu laggai, lepa mateinia kele sikuat Elisa katubut rimata kateteret aiei rimata masiailiakenia.

¹⁸ Puailinangan leu kele sikuat Elisa katubut rimata, telu ngakilo gandum simaeru ele enem ngakilo gandum bagei sakinia ka Samaria sara bulagat perak.

¹⁹ Kateteret nenda aikua leu pagugulet rimata nenda, “Ta' momoi! Ta muaaili, kenanen ibeleake kineiget urat simatirit si Tuhan sibara ka manua!” Tapoi aleginangannia si Elisa, “Aile nuitconia ipuaili, tapoi ta te nunanam beri goiso komen nenda.”

²⁰ Kisedda te aipuaili katubut sirimanua nenda, mateinia aipaperakinia sirimanu simigi ka matatbaliu gugurukat.