2Rim. 6 - BUKO SIPUNENAN

Kampak tusese minca

¹ Ka sara gogoi kuarangan tai nabi kai Elisa, “Makopean le okkip kudduatta!

² Eddangan kuei kai masitadde loina ka bebet oinan Jordan, bule kugalai kai kudduatta sedda. Aleginangannia si Elisa, “Kenannan kam.”

³ Sara katalagatda masibesiake bule itut sia si Elisa. Ioba leu et si Elisa,

⁴ lepa tuitui sia simakere. Kele arasege ka bebet oinan Jordan, taddaakerangan masitadde loina.

⁵ Sinulut, sara katalagatda bele sot kampaknia ka bagat oinan. Pugereinangan katubut Elisa, “Ale Tuanku, sibaleku le te kampak nenda!”

⁶ Aleginangannia si Elisa, “Kaipa aibele?” Sau'saunangan kabelekatnia, lepa geti saggrinangan sara loina si Elisa, samba ribbaiakenangannia sedda. Iageti tuottounangan sot kampak nenda ka uddut oinan.

⁷ Kuanangan si Elisa, “Alaan!” Totoiakenangan kabeinia sirimanua nenda samba alanangan sot kampak nenda.

Tukalaake saladdutda tai Siria

⁸ Ka sara tetere tai Siria masisaggangi tai Israel. Kele ailepa rapatibo sautet saladdunia, teuakenangan rimata Siria kaipa bulat rapusasapou.

⁹ Tapoi kaunangan katuagaiat si Elisa katubut rimata Israel, bule bui' raei ka kudduat nenda, kalulut tai Siria mareirei raenungi enungan nenda.

¹⁰ Oto koniakenangan sia rimata Israel sikukuddu simaleggre sedda bule rajago tubutda. Kisedda si Elisa masiparepmake rimata piga ngaminca pa.

¹¹ Kalulut nenda pugolunangan simakope rimata Siria, iageti sogainangan sautet saladdunia samba kuanangan katubutda, “Ta' momoi pa nupoiliat kamnia katubukku kasei katalagatta simare're ka rimata Israel?”

¹² Aleginangannia sara katalagatda sautet saladdu, “Ta' anai berisara sia, Tuanku, tapoi si Elisa le, nia te amasikua kai rimata Israel kele sikuat Tuan ka bili peremannu.”

¹³ Kuanangan rimata, “Kenan kam masiitconia, kaipa ikukuddu, bule kukoiniake sirimanua ralabania.” Lepa kuarangan katubut rimata, si Elisa ainia ka Dotan.

¹⁴ Iageti kaunangan rimata Siria sedda saladdu simigi samba leu kuro samba kereta pasaggak. Sege sia sedda sinoibo samba alourangan laggai nenda.

¹⁵ Kele aitusuru simanseman pagugulet Elisa samba belania ka uja, itconangan saladdutda tai Siria sibara kuro samba kereta pasaggak ai sia ka sangaliot laggai nenda. Lepa kuanangan pagugulet nenda kai Elisa, “Matei sita, Tuan! Kipa tagagalai?”

¹⁶ Aleginangannia si Elisa, “Bui' numaloto, sipasikeli sita peile maigi ka sia.”

¹⁷ Lepa panindounangan si Elisa, “Ale Tuhan, buka matania, bule ioi iitconia!” Iageti bukanangan si Tuhan matat pagugulet nenda, maitconangan matania. Itconangan leleu nenda sun le kuro samba kereta sipuobengan masibokko si Elisa.

¹⁸ Kele araei tai Siria masisagganginia, panindounangan si Elisa, “Tuhan, pesetnake matatda sirimanua nene!” Lepa geti pesetnakenangan matatda si Tuhan, kele panindogat Elisa.

¹⁹ Iageti kuanangan si Elisa katubuda, “Ta' nene enungan samba laggai gabaetmui. Tut le kam aku, aile kutaroake kam ka sirimanua gabaetmui.” Taroakenangan si Elisa ka Samaria.

²⁰ Kele arasege ka Samaria, panindounangan si Elisa, “Tuhan, bukaake matatda, bule raitco mata.” Lepa bukanangan matada si Tuhan, oinangan rapasiitco, tugegerangan kalulut ai sia ka laggai Samaria.

²¹ Kele aiitco sia rimata Israel tai Siria nenda, rerenangan si Elisa, “Elisa, kumateiake pa sia nene?”

²² Aleginangannia si Elisa, “Ta'! Beringan saladdu sitangsiakenennu ka bagat pasaggangan ta anumateiake sia, sarapei nene. Kau le kan samba lo'ra, lepa obaakenungan ratoili ka rimatatda.”

²³ Iageti baraakenangan punen sabeu rimata Israel katubutda. Kele ailepa rapukom samba mulo, koiniakenangan sia ratoili ka rimata Siria. Barania kateteret nenda ariakerangan tai Siria masisaggangi laggai Israel.

Pasialougat laggai Samaria

²⁴ Ka sara gogoi ruruakenangan saladdunia si Benhadat, rimata Aram, ei sia masisaggangi Israel. Alourangan laggai Samaria.

²⁵ Iageti bara pulajeat sabeu ka laggai nenda, bailiu sakit sara utet kalidei balupulu bulagat perak samba rua ngaons tanai ngorut lima bulagat perak.

²⁶ Ka sara tetere aimuenung rimata ka uddut irip laggai, pusoganangan sara sinanalep, “Tuan, ropmake pei aku!”

²⁷ Aleginangannia rimata, “Ke ta iropmake ekeu si Tuhan, kipa ioi kuropmake ekeu? Ta' anai kaku gandum ele suat anggur!

²⁸ Iageti parerenangan rimata katubunia, “Aponia.” Aleginangannia sinanalep nenda, “Aitubbui aku aleiku nene bule kukom kai boiki togaku simanteu, samba mancep geti kommaian togania simanteu.

²⁹ Kalulut nenda seumaian togaku, lepa kommaiannia. Tapoi ka mansepnia, kele akutiddou togania bule kukom kainia, lipputnakenangan togania!”

³⁰ Kele aiarep nenda rimata, biritnakenangan leppeinia kalulut reureu bagania. Itcorangannia sirimanua simigi sipuririo ka bebet irip laggai, aipakei leppeinia ka baga iate komak goni.

³¹ Pusoganangan rimata, “Gogoi nene leu et buita matei si Elisa. Eddangan iukum aku Taikamanua, ke ta kumateiake si Elisa!”

³² Lepa koiniakenangan sara sirimanua ipuboiki ka sia iei ka lalep Elisa. Kateteret nenda si Elisa ainia ka lalepnia, samba ai piga pa sikebbukat laggai sipurarauma ka lalepnia. Kepei sege sikoiniakenen rimata nenda, kuanangan si Elisa katubutda sikebbukat laggai nenda, “Itco pei kam! Aikoniakean sirimanua sipapamatei nenda bule imateiake aku. Ke asegean sirimanua nenda, patpatnakemuian matatbaliu samba bui' nuobaake kam ituguru'. Aimomoi rimata ka teiteinia.”

³³ Ta'pei alepa aipanibo si Elisa, sege rimata sedda samba kuanangan, “Pangoringan nene si Tuhan le aibaraakenia! Oto apangan le lulunia kukakaroni paromannia?”