2Rim. 5 - BUKO SIPUNENAN

Tualeake si Naaman

¹ Si Namaan iate utet saladdutda tai Siria, bulat abeukanen samba manuntu bagat rimata Siria katubunia. Aipoi kalulut si Naaman, kaunangan si Tuhan kamanangan ka saladdutda tai Siria. Si Naaman iate utet saladdu simagege, Tapoi ai bokbongnia.

² Ka sara gogoi saggangirangan laggai Israel tai Siria. Ka bagat pasaggangan nenda labarangan sara sinanalep tai Israel samba ambitrangannia sibailiu tangsiakenen, lepa geti bailiunangannia pagugulet sinanalep Naaman.

³ Ka sara gogoi kuanangan pagugulet nenda ka tuannia, “Ina, Ke mei bai ekeu masiailiake nabi sikukuddu ka Samaria, bulat iaaleake te si tuan.”

⁴ Kele aiarep nenda si Naaman, einia kai rimata samba tiboinangan apa sikuat sinanalep nenda.

⁵ Kuanangannia Rimata, “Kauan, kenannan kai rimata Israel. Aile kugalai surat katubunia.” Lepa geti einia si Naaman, ambitnangan telu pulu ribu bulagat perak, enem ngaribu bulagat mas samba pulu leppei simalainge.

⁶ Kise ngangan surat siambitnia nenda, “Ka bagat surat nene, kukoiniake si Naaman, ute'ra saladduku, bule nualeakenia besi'nia.”

⁷ Kele aibasa surat nenda rimata Israel, biritnakenangan leppeinia, samba kuanangan, “Taikamanua pa aku nene sioi masimateiake samba masirimanuaake, pat akenangan patonekat sirimanua nene katubukku, bule kualeake sirimanua nene? Bulatnia rimata Siria nene masigaba pajoggolat katubukku le!

⁸ Arepnangannia si Elisa pagalaiat nenda, samba kaunangan patonekat nene kai rimata Israel, “Angoi nubiritnake leppeinu? Koiniake le nia ioi katubukku, bule iagainia ka Israel nene ai sara nabi!”

⁹ Iageti tuitui si Naaman iei ka lalep Elisa, samba puarinangan ka matat matabaliu lalep Elisa.

¹⁰ Koiniakenangan sara pagugulet si Elisa masikua kai Naaman kise, “Kenan murau pitu ngaminca ka bagat oinan Jordan, maalenangan leu besi'nu!

¹¹ Tapoi einia si Naaman pagalu ingo samba kuanangan, “Kukua te momoinia ibela samba murio manindou katubut Tuhan, Taikamanuania, lepa rapeakenangan kabeinia ka rubeiat tubuku simabesi' lepa maalekkungan.

¹² Bagat oinan Abana samba Parpar ka Damsyik peile maeru ka bagat oinan bagei ka Israel! Momoi kupurau sedda kumale!”

¹³ Tapoi legreakerangan tubutda sapaguguletnia samba kuarangan, “Tuan, ke ikoiniake bai ekeu masigalai sara galajet sitaimalabbei, galaiakenungannia. Sarapei murau le aikoniake ekeu bule numale!”

¹⁴ Kalulut nenda ei si Naaman ka bagat oinan Jordan, lepa lelepmakenanngan tubunia ka bagat oinan nenda pitu ngaminca kele sikuat Elisa. Iageti maalenangan si Naaman. Maaraunangan tubunia minca kele tubutda sibau tubu.

¹⁵ Lepa toilinia sambatda saladdunia katubut Elisa. Kuanangan si Naaman kai Elisa, “Kineneiget akuagaian, ka sangaliot polak sara le Taikamanua, iate Taikamanua panindogietda tai Israel. Oto bule nusilo siakeku nene!”

¹⁶ Aleginangannia si Elisa, “Ka onin Taikamanua sipuririmanua, puukuketku, ta kusisilo apapa.” Tubbuinangan si Elisa si Naaman bule isilo kaunennia, tapoi ta ioba isilonia si Elisa.

¹⁷ Lepa kuanangan si Naaman, “Ke ta leu et nuoba masisilo akenenku, obaake kuambit polak siripot igit sioi iambit sangapasang bagal. Kalulut, barania kineneiget ta'an kupangunguruatnake buluakenen ka buluijiet bagei, tapoi sarat kai Tuhan le.

¹⁸ Ke mei aku masipaalei rimata manindou ka uman Rimon sabulunganda tai Siria, bule si Tuhan masiappeake aku.”

¹⁹ Kuanangan si Elisa, “Kenannan ka angkat baga.” Iageti tuitui si Naaman. Simaruei le aituitui si Naaman,

²⁰ paatunangannia si Gehazi, pagugulet Elisa, “Angoi tuobaakenia ituitui ta anai ailului? Siripokatnia buita isilo le tuanku siaket Naaman nenda! Ka onin Tuhan sipurimanua, buita kukuru le nia bule kusilo apapa bagei sibara ka sia!”

²¹ Iageti kukrunangan si Naaman si Gehazi. Kele aiitconia si Naaman ai si sirimanua siooi, tugorosotnangan ka keretania samba parerenangan, “Aponia sibabara?”

²² Aleginangannia si Gehazi, “Bojoi Tuan, aikoiniake aku si Elisa masikua katubum, simaruei le araoi rua tai nabi sibau tubu sibara ka pulaggaijat leleu Efraim, aitiddou Tuanku bule nuake telu ngaribu bulagat perak samba rua ngapasang bibilet bule tukau ka tai nabi nenda.”

²³ Kuanangannia si Naaman, “Kauan.” Tubbuinangan leu si Gehazi bule iambit enem ngaribu bulagat perak. Tabutnakenangan bulagat nenda si Naaman ka bagat rua suppit, samba alanangan rua ngapasang bibilet simakope lainge. Kaunangan sangamberinia nenda katubut rua paguguletnnia, ambitrangannia ka matat Gehazi.

²⁴ Kele arasege ka leleu ka kudduat Elisa, alanangan bulagat samba leppei nenda si Gehazi katubutda sapagugulet Naaman, lepa geti koiriakenangannia ka lalep samba koiniakenangan sapagugulet nenda ratoili,

²⁵ lepa guru'nia minca ka lalep. Rerenangannia si Elisa, “Kaipa anubara?” Aleginangannia, “Ta' amei aku kipapa.”

²⁶ Tapoi Kuanangan si Elisa, “Ai sedda patuatku kateteret aitugorosot si Naaman ka keretania iailiake ekeu. Ta' nene teterenia tusese bulagat samba tusaki monen zaitun, monen anggur, biribiri samba jaui samba leu sapagugulet!

²⁷ Kalulut anusilo poi siakera nenda, oraknangan te geti ekeu samba sapunuteteunu besit Naaman teret buru-buru! Kele aibela si Gehazi sedda, aiorakngannia besit kulit, bailiu makopenangan bulau kulitnia.