2Rim. 4 - BUKO SIPUNENAN

Si Elisa masiropmake sara silumang simageba

¹ Ka sara gogoi mei sara silumang sibara katalagat tainanalepda tai nabi kai Elisa samba kuanangan, “Ukkui, simanteuku amateiannia! Samba nuagai simareddet ka Taikamanua le nia, tapoi ai utaknia ka sara sirimanua. Kineneiget sirimanua nenda amoiannia masiala ka rua togaku samba ibailiuake sia pagugulet, sibailiu pasilului utak simanteuku.”

² Aleginangannia si Elisa, “Kipa ioi kuropmake ekeu? Apa sibabara ka lalepnu?” Aleginangannia sinanalep nenda, “Ta' anai sibabara, sarat sara buli-buli sibara ka bagania tula le.”

³ Kuanangan si Elisa, “Kenan nubale botol simigi sita' kabaga ka pabebeakenennu lalep.

⁴ Lepa nenda guru' kam ka lalep sambamui tatogam samba patpatnakemuian lalep, lepa uruakenungan tula sibara ka botol sigoiso ka bagat sangamberi botol nenda, samba saraakenungan simasun ka baga.”

⁵ Iageti toili sinanalep nenda ka lalepnia. Kele aratuguru' ka sambatda tatogania samba patpatnakerangan matatbaliu lalep, alanangan buli-buli sigoiso sibara ka baga tulat zaitun, lepa uruakenangan tula nenda ka bagat buli-buli sikaura tatogania katubunia.

⁶ Kele aimasun ka bagat sangamberi buli-buli nenda, tiddounangan minca sara buli-buli. Aleginangannia sara togania, “Ta'an anai buli-buli. Lepa puarinangan ipuguruk tula nenda.

⁷ Iageti ei minca sinanalep nenda kai Nabi Elisa, samba kuanangan si Elisa, “Sakiake tula nenda bule nulului sangamberi utaknu, samba legeinia metnangan ipurimanuaiji ekeu sambat tatogam.”

Si Elisa samba sinanalep simakayo ka Sunem

⁸ Ka sara gogoi ei si Elisa ka Sunem. Sara sinanalep simakayo sikuddu sedda masisogainia mukom. Samba ka senen puenungannia iei ka Sunem, ei nia ka lalep sinanalep nenda mukom.

⁹ Iageti kuanangan sinanalep nenda ka simanteunia, “Bulatnia akuagaian sirimanua simareirei moi sene iate pagugulet Taikamanua.

¹⁰ Kauan tagalai sara bilik sigoiso ka rubeiat lalepta ka pata, samba patarektangan pereman, kudduat, korosi samba alito bule moinia sene pugogoinangan sedda.

¹¹ Ka sara gogoi ei minca si Elisa ka Sunem, lepa guru'nia ka bilik ka pata samba perepnia sedda.

¹² Iageti koiniakenangan si Gehazi, paguguletnia, masisogai sinanalep. Kele aioi sinanalep nenda,

¹³ kuanangan si Elisa kai Gehazi, “Rereake katubunia kipa ioi kusiliake besit tubunia katubutta. Bule ioba kuei kai rimata ele ka utet saladdu samba kutiboi kiddiet bagania.” Aleginangannia sinanalep nenda, “Aile aku mukukuddu katalagatda samuntogatku samba ta anai simagulai.”

¹⁴ Iageti parerenangan si Elisa kai Gehazi, “Ke kisedda, aponia kugagalai katubunia?” Aleginangannia si Gehazi, “Ta' anai togania, samba amabaja'an simanteunia.”

¹⁵ Kuanangannia si Elisa, “Sogai pei sinanalep nenda.” Kele ailepa aisogainia, purionangan sinanalep nenda ka matatbaliu.

¹⁶ Lepa kuanangan si Elisa katubunia, “Ka rura kamata, kele kateteret nene leu, nubebeila te sara toga simanteu. Tapoi aleginangan sinanalep nenda, “Ta' tuanku, pagugulet Taikamanua, bui' nupaboko ka paguguletnu nene!”

¹⁷ Pusureketnangan sinanalep nenda, lepa tu'tuakenangan sara toga simanteu kateteret kele nenda leu et, ka rura ka mata, kele sikuat Elisa katubunia.

¹⁸ Kele aimabeu toga nenda, ka sara gogoi ka gogoi pasimoneiat, ei toga nenda ka ukkuinia ainia ka mone sambatda sipasigegetai.

¹⁹ Sinulut pugereinangan toga nenda ka ukkuinia, “Ena! Mabesi' ute'ku!” Lepa kuanangan ukkuinia katubut sara pagugulet, “Ambit toga nenda ka ukkuinia.

²⁰ Ambitnangan toga nenda ka inania, lepa kupkupnangannia inania. Kasoibokat matei toga nenda.

²¹ Ambitnangannia inania ka pata, ka bilit Elisa, samba perepakenangannia ka pereman. Lepa nenda bela nia samba patpatnakenangan matatbaliu,

²² lepa einia masisogai simanteunia. Kuanangannia, “Koiniake sara pagugulet ioi sene pasamba sangamuneng kalidei, bule mei aku simaruei kai Nabi Elisa, samba toili aku simaruei.”

²³ Kuanangan simanteunia, “Angoi kineneiget nuei? Ta' gogoi Sabat kineneiget samba leu ta gogoi sabeu Laggo Sibau.” Aleginangannia, “Bui' makarat bagam.”

²⁴ Lepa aikau pelana ka kalideinia nenda, kuanangan ka paguguletnia, “Enungake kalidei nene bule ipubalau simakope ola, bui' nupaluluk pubabalaunia ke ta kukuoiniake ekeu.”

²⁵ Putuituinangan sinanalep nenda iei kai Elisa ka leleu Karmel. Ka sareunan peile aiitcoan si Elisa aioi sinanalep nenda. Kuanangan si Elisa kai Gehazi, “Itco, ai momoi sinanalep sibara ka Sunem sene!

²⁶ Olaake nuei nuamiakenia samba rere'nia kipa masanang leu nia, simanteunia samba togania nenda? Kuanangan sinanalep nenda kai Gehazi, “Masanang le!”

²⁷ Tapoi kele aisege ka matat Elisa, purapponangan samba lakkaiakenangan reret Elisa, tapoi legreakenangan tubunia si Gehazi ikaritnakenia. Lepa kuanangan si Elisa, “Eddangannia, masou bagania! Ailipputnake le nene katubukku si Tuhan, ta aipaagai katubukku.”

²⁸ Iageti kuanangan sinanalep nenda, “Ukkui, ta akutiddou toga katubum. Akukuangan leu katubum bui' nuake karonanku sita'paluluat katubukku.”

²⁹ Iageti kuanangan si Elisa kai Gehazi, “Olaake! Ala tuturaku samba riuriuake nuei ka lalep ina nene. Bui' nupuari nukau paroroiat katubut kasei pa siailim ka enungan. Ke raake paroroiat sirimanua katubum, bui' nualeginia. Sege ekeu sedda kaunungan tuturaku nene katubut toga nenda.”

³⁰ Kuanangan sinanalep nenda, “Ka onin Tuhan sipuririmanua samba purimanuaiatnu, bulat ta kukakadiuake ekeu.” Lepa suru si Elisa tutnangan sinanalep nenda.

³¹ Amuboikian si Gehazi ka sia masikau tuturat Elisa katubut toga nenda, tapoi ta anai abela ngangania samba ta anai toggaiat ipurimanua. Lepa toili si Gehazi masiailiake si Elisa samba kuanangan, “Ta' atusuru toga nenda.”

³² Kele arasege ka lalep sinanalep nenda, tugurunangan sarania si Elisa ka biliknia samba itconangan toga simamatei nenda ainia memerep ka pereman.

³³ Tugurunangan, patpatnakenangnan matatbaliu, lepa panindounangan katubut Tuhan.

³⁴ Lepa nenda purapponangan ka uddut toga nenda samba tabbraakenangan ngungunia ka ngungun toga nenda samba matania ka matat toga nenda samba leu kabeinia ka kabei toga nenda samba kalulut ainia murarappo ka uddut toga nenda, iageti maoloinangan tubut toga nenda.

³⁵ Suru si Elisa samba paolenangan tubunia ipuenung ka bilik nenda, lepa purapponangan minca katubut toga nenda. Kalepakatnia pupaisinanngan toga nenda pitu ngaminca samba bukanangan matania.

³⁶ Iageti koiniakenangan si Gehazi si Elisa masisogai inan toga nenda, samba kele aituguru ina nenda, kuanangan si Elisa katubunia, “Akkatnake togam nene.”

³⁷ Purapponangan ina nenda ka matat Elisa. Lepa akkatnakenangan togania, bela sia.

Kamateiat ka bagat koali

³⁸ Ka sara tetere bara pulajeat ka sangaliot laggai. Iageti toili si Elisa ka Gilgal. Kateteret aigegelaiake sangamungkuat tai nabi, koiniakenangan pagugulenia masiala koali sabeu samba seunangan komenda.

³⁹ Lepa bela sara katalagatda tai nabi, einia ka mone masigaba gulei, lepa sesenangan kele labu sipututu'tu ka bakkat loina. Getainangan buat loina nenda simigi. Kele aitoili, pajajakinangannia samba kaunangannia ka bagat koali nenda, kalulut ta iagai buat loina apa nenda.

⁴⁰ Kele aimarak, rubeiakenangannia ka tai nabi nenda. Tapoi simaruei le arananamnia komen nenda, pugereirangan kai Elisa, “Ukkui, tuba le nene!” Taiobarangannia masikom.

⁴¹ Lepa geti koiniakenangan sia si Elisa masiala goiso tapung, lepa garaiakenangannia ka bagat koali nenda. Lepa kuanangannia, “Rubeiake minca komen nenda.” Iageti tata' kalotoakenen ka bagat koali nenda.

⁴² Ka sara tetere, oi sara sirimanua sibara ka Baal-Salisa. Ambitnangan kai Elisa gandum sibau samba leu rua pulu roti sigalai sibara ka gandum buat pasimoneiat siboiki ka rura nenda. Koiniakenangan paguguletnia si Elisa irubeiake roti nenda ka tai nabi.

⁴³ Tapoi kuanangan pagugulet nenda, “Kipa ioi kutarekngake nene ka matat sangotu sirimanua.” Aleginangannia si Elisa, “Rubeiakean le bule rapukom, kalulut si Tuhan masikua mukom le sia samba lepat rapukom aipeile legeinia.”

⁴⁴ Lepa rubeiakenangan komen nenda pagugulet katubutda, iageti pukomrangan sangamberitda. Kele ailepa rapukom, aipeile legeinia kele sikuat Tuhan.