2Rim. 3 - BUKO SIPUNENAN

Pasagganganda tai Israel samba tai Moab

¹ Ka rura sikapulu balu ka bagat puparentaat Josafat rimata ka Jehuda, si Joram togat Ahab ibailiu rimata ka Israel samba puparentanangan ka Samaria pulurua ngarura burunia.

² Galaiakenangan sikatai ka matat Tuhan, tapoi ta kele katai Ahab ukkuinia samba si Izebel, inania.

³ Tapoi kenanen kisedda, kele Rimata Jerobeam togat Nebat sipupaparenta kepei nia, nia leu et sibaraake pujoatda tai Israel samba ta raariake masigalai pukakatai.

⁴ Rimata Mesa sibara ka Moab iate siputatarimeu biribiri, sibailiu kaunennia ka rimata Israel senen rura iate sangotu ribu togat biribiri samba leu bulut biribiri sibara ka talagat biribiri simanteu.

⁵ Tapoi kele aimatei Rimata Ahab, taimareddetnangan si Mesa katubut rimata Israel.

⁶ Kalulut nenda kaddiuakenangan Samaria Rimata Joram samba einia masipatarek sangamberi saladdunia.

⁷ Lepa koiniakenangan sirimanua kai Rimata Josafat, rimatatda tai Jehuda, kise tiboietnia, “Ta'an amareddet Rimatatda tai Moab katubukku, noba leu tapasaggak simakere tasagganginia?” Aleginangan si Josafat, “Kuoba. Mei sita simakere, rakyatku samba rakyatnu, kuro'ku samba kuro'nu.”

⁸ Parerenangan minca, “Kaipa taenungi tasaggangi sia.” Aleginangannia si Joram, “Ka enungan sisabau simatangeu.”

⁹ Iageti eiranga leu simakere Rimata Joram samba rimatatda tai Jehuda samba leu rimatatda tai Edom. Tapoi kele aiaili pitu ngagogoi burunia arapuenung, ta arasese oinan lo'ra saladdu samba leu tarimeu siabbit bibiletda.

¹⁰ Lepa kuanangan Rimata Joram, “Aipaatungan si Tuhan bule isegeake sita telutta katubut rimata Moab!”

¹¹ Tapoi parerenangan Rimata Josafat, “Ta' pa anai sene sara nabit Tuhan, bule itiddou enungan kai Tuhan?” Aleginangannia sara ute saladdut Rimata Joram, “Ai si Elisa togat Safat! Nia siburu sipasisirorop si Elia.”

¹² Kunangangan si Josafat, “Bulatnia, kirenangan amanibo si Tuhan katubunia.” Iageti ei sia telutda rimata nenda kai Elisa.

¹³ Kuanangan si Elisa katubut rimata Israel, “Angoi nutiddou paroman katubukku? Kenan ka tai nabit ukkui samba inam!” Kuanangan si Joram, “Ta' kisedda! Kalulut aisogaian telu rimata nene si Tuhan isegeake sia ka kabeira tai Moab.”

¹⁴ Aleginangan si Elisa, “Ka onin Tuhan sipuririmanua, puukuketku, ke ta kalulut si Josafat, rimata Jehuda, ta kupasisikeli kam.

¹⁵ Oto kineneiget, ambit kam sara sirimanua sinauake kecapi.” Ainanauake kecapinia nenda sirimanua, sopsopnangan si Elisa Ketsat Tuhan.

¹⁶ Iageti kuanangannia, “Kisene te aikua si Tuhan, “Galai kam puo ka su'su' nene.

¹⁷ Kenanen ta nuinco kam ibele urat ele ipuboroi rusa, tapoi masusun te geti oinan ka su'su' nene, bailiu oinangan ipulotarimeu ja'ja'ketmui samba tarimeu siambit bibiletmui.

¹⁸ Nene iate galajet sigoiso le ka matat Tuhan. Iaake te geti kamanangan katubumui nusagganngi kam tai Moab.

¹⁹ Subuakemuian te geti irip laggai simaron samba sangamberi laggai sikokoiakenen, patatdeijimuian sangamberi loinat buat kaju, petpetmuian sangamberi bubuakat oinan, samba paribbaimuan bukku ka sangamberi mone simaeru.”

²⁰ Ka mansepnia kateteret airapangunguruatnake buluakenen, puguruknangan oinan sege'ge sibara ka saigit Edom pat masunnangan oinan ka laggai.

²¹ Kele araarepnia sangamberi tai Moab, rimata sitelu nene amoian sia masisaggangi sia, kaurangan sangamberi sirimanua sioi masipakei lanjau, beringan leu simakope baja', lepa geti pagalakrangan sia ka bebet pasongan.

²² Ka mansepnia simanseman, kateteret aiputoro sulu itoroiji uddut oinan nenda, itcorangannia tai Moab, oinan saigit ka uddut mabonan kele logau.

²³ Pugereirangan, “Logau! Apalabaan samba apamateian sia katubu tai rimata nenda.

²⁴ Tapoi kateteret arasege tai Moab ka pusapougat nenda, tusururangan tai Israel, lepa bo'borangan tai Moab, pat putuituirangan sedda. Samba makopenangan reunanda raguruki laggai Moab ai sia masimateiake tai Moab.

²⁵ Pakatairangan sangamberi laggai samba kaurangan bukku pasipetpet senen mone simaeru, kalulut sene-senenda masibaijukngake bukku ka uddutnia. Petpetrangan sangamberi bubuakat oinan samba patatdeijirangan sangamberi loina simaeru, pat sarat laggai Kir-Haraset le aralegeiake. Kalepakatnia alourangan laggai nenda samba pabaijungirangannia bukku sia sipasipipingping.

²⁶ Kele ailelekngakenia rimata Moab, pasaggangan nene bulat mabesik tubunia, ambitnangan pitu ngotu saladdu sipasiukka lanjau pasambania bule rabesiake rakalaake rimata Edom, tapoi ta amoi.

²⁷ Lepa geti alanangan togania sikebbukat sibailiu geti rimata masisailiakenia, lepa panguruatnakenangannia sibailiu buluakenen ka uddut kekret irip laggai. Iageti malotorangan tai Israel, bailiu tuitui sia rakaddiuakenia samba toili sia ka laggaira.