2Rim. 25 - BUKO SIPUNENAN

Katukataikat Jerusalem

¹ Iageti ka rura sikasiba puparentaat Zedekia, ka laggo pulu, gogoi sikapulu ka laggo nenda, oi si Nebukadnezar, rimata Babel sambatda sangamberi saladdunia masisaggangi Jerusalem. Galairangan kemanda ka ujat laggai samba galairangan kekre simabuak pasialougat ka sangaliot laggai nenda.

² Kisedda te araalou laggai nenda pat aili sikapulusara ngarura puparentaat Zedekia.

³ Ka gogoi sikapulu sara laggo epat ka rura nenda leu et, kateteret aibara pulajeat sabeu, bailiu ta'an anai komenda siberikabaga,

⁴ tukkluakerangan irip laggai tai saggak. Ka soibo nenda, kenanen airaalou laggai nenda tai Babel, putuituirangan sinoibo sangamberit saladdut Jehuda raei ka Susut Jordan. Enungirangan enungan ka monen uma purimataat, lepa bela sia ka matatbaliu sabeu patabbarat ka rua irip kudduat nenda.

⁵ Tapoi kukrurangan Rimata Zedekia saladdut Babel samba labarangannia ka Jerikho. Sangamberi saladdunia kaddiuakerangannia.

⁶ Iageti abbitrangan Rimata Zedekia katubut Rimata Nebukadnezar ka laggai Ribla, lepa ukumrangannia.

⁷ Mateiakerangan tatogania ka matania. Lepa nenda kiokrangan matania, apprarangannia samba abbitrangannia ka Babel.

Rapakatai Uman Tuhan

⁸ Ka gogoi sikapitu laggo lima ka rura sikapulu siba puparentaat Nebukadnezar rimata Babel, ei si Nebuzaradan ka Jerusalem. Nia iate utera saladdu sipujajago samba sipugagalai ka uma purimataat rimata Babel.

⁹ Labonangan Uman Tuhan si Nebukadnezar, uma purimataat samba leu lalepda siabeu tiboi tubu ka Jerusalem.

¹⁰ Lepa bukkatakerangan irip laggai sangamberitda saladdunia.

¹¹ Iageti siberikabaga sipulelegei peile ka laggai, simageba, samba siei musara ka tai Babel, abbitrangan sia sangamberitda si Nebuzaradan ka Babel.

¹² Sarat piga pa sia simageba ka laggai nenda galakrangan sia ka Jehuda samba koiniakerangan sia masigalai monen anggur samba mone.

¹³ Arigi perunggu samba kereta pasitukke ka Uman Tuhan samba leu bejana perunggunia ragatakerangannia tai Babel, lepa abbitrangan sangamberi perunggu ka laggaira.

¹⁴ Abbitrangan leu koali, sodok, pisau, pulokat samba leu pugalai sibara ka tembaga pakeiet ka bagat pumengguiat.

¹⁵ Bibilet sibara mas samba perak, mangkok sigoiso samba piring kudduat bo, alanangannia si Nebuzaradan.

¹⁶ Bibilet perunggu sigalai Rimata Salomo ka Uman Tuhan, iate ruania arigi, kereta samba bejana sabeu, sangamberinia bulat masane bailiu tamomoi itukilo.

¹⁷ Ka ruania arigi nenda makere buaknia, sara arigi buania bulu balu eto samba sara utet arigi sigalai sibara ka perunggu nantania telu eto. Ka senen sangaliot utet arigi ai tutikai samba pulaingean buat delima sigalai ka perunggu.

¹⁸ Lepa labanangan Imam Sabeu Seraya si Nebuzaradan, samba leu si Zefanya sipasirop imam, telu sia sipasijago matatbaliu Uman Tuhan,

¹⁹ kalima sipasikeli rimata sikukuddu peile ka laggai nenda, utet saladdu, utet saladdu sipasikeli pasurat-suratda saladdu samba leu enem pulu sia siberkabaga sikuddu ka laggai nenda.

²⁰ Sangamberitda nenda abbitnangan sia Rimata Nebukadnezar ka laggai Ribla ka kupkumen laggai Hamat.

²¹ Paoreijirangan sia sedda samba mateiakerangan leu sia. Kisedda te araabbit tai Jehuda ka kudduat katuribbaiatda.

Gedalya utet laggai Jehuda

²² Lepa nenda Rimata Nebukadnezar masiuddetake si Gedalya togat Ahikam punuteteu Safan sibailiu gubernur ka Jehuda masiuteake sangamberi sirimanua sikukuddu peiel sedda.

²³ Kele araarepnia sautet saladdu Jehuda sitaioba masitut rimata Babel pagalaiat uuddetakena si Gedalya sibailiu rimata, ailiakerangan si Gedalya sia sautet saladdu, iate si Ismael togat Natanya, Johanan togat Kareah, Seraya togat Tanhumet sibara ka laggai Netofa samba si Jazanya sibara ka laggai Maakha.

²⁴ Kuanangan si Gedalya katubutda, “Bui numaloto kam katubutda siabeu tiboi tubu ka puparentaat Babel. Kuddungan kam ka laggaita nene sibailiu pagugulet rimata Babel, maeeru le purimanuaiatmui.”

²⁵ Tapoi ka laggo sikapitunia ei si Ismael togat Elisama sibara ka muntogat rimata ka Mizpa samba leu pulu sia pasambania, mateiakerangan si Gedalya samba leu tai Jehuda samba leu tai Babel sibabara sedda.

²⁶ Iageti putuituirangan sangamberitda tai Jehuda, simakayo, simageba samba leu sautet saladdu ka Misir, kalulut lotora ka taio Babel.

Si Joyakhin tubelaake ka tangsi

²⁷ Ka gogoi sikarua pulu pitu laggo pulu rua ka laggo sikatelu pulu pitu kalepat aituabbit si Joyakhin ka kudduat katuribbaiat, si Ewil-Merodakh ibailiu rimata Babel. Ka rura nenda pakoinongnangan katet bagania kai Joyakhin samba belaakenangannia ka tangsi,

²⁸ samba leu galaiakenangan simaeru katubunia. Kaunangan pangkat katubunia simabuak bele peile pangkatda tai rimata bagei siribbaiakenen ka Babel.

²⁹ Silinangan leppeinia sibara ka tangsi samba momoi ipukom roti simariuriu ka matat rimata ka burut purimanuaiatnia.

³⁰ Pagalaiat pubulaganannia, mariuriu ikaunia rimata sememet pakeietnia senen gogoi ka burut purimanuaiatnia.