2Rim. 24 - BUKO SIPUNENAN

¹ Kateteret puparentaat Rimata Joyakim, sagganginangan samba kalaakenangan Jehuda si Nebukadnezar rimata Babilonia. Telu ngarura burunia si Joyakim aikupkupakenia si Nebukadnezar, lepa geti sagganginangan si Nebukadnezar.

² Koiniakenangan mungkuat sirimanua sikatai si Tuhan sibara ka bangsa Babel, Aram, Moab samba Amon masilawan si Joyakim samba masisubuake Jehuda, kele sikuat Tuhan ka sapaguguletnia.

³ Kirenangan buita muaili le nenda, kalulut aikuangan si Tuhan tutuituiakena sia bangsa Jehuda ka laggai sikau Tuhan katubutda. Aitutuituiake sia geti kalulut sangamberi jo sigalaiakenen rimata Manasye,

⁴ bulat siboiki iate kalulut mamateiakena sirimanua sitaimasele. Ta ioba si Tuhan masiappeake jot Manasye kalulut katai sigalainia.

⁵ Iageti matei si Joyakim samba rateiakerangannia ka rateira taikebbukatnia, lepa si Joyakhin, togania, ibailiu rimata masisailiakenia.

⁶ Rimata Misir ta'an abelania ka laggainia iei pasaggak, kalulut aikupkupakean sangamberi kupkumen laggai rimata Misir rimata Babel, barania ka oinan Misir pat aili ka oinan Efrat.

⁷ Pumumuan bagei pagalaiat Rimata Joyakim tusuratake ka Buko Pumumuan rimata Jehuda.

⁸ Pulu balu ngarura beunannia si Joyakhin kateteret aibailiunia rimata Jehuda, samba telu ngalaggo burunia aipuparenta ka Jerusalem.

⁹ Si Joyakhin masigalaiake sikatai ka matat Tuhan, kele sigalaiakenen ukkuinia.

¹⁰ Kateteret puparentaat Joyakhin, rimata Babel masisaggangi Jerusalem samba alourangan leu laggai nenda.

¹¹ Airaalou laggai nenda saladdunia, sagganginangan Jerusalem rimata Babel.

¹² Iageti Rimata Joyakhin einia masiailiake rimata Babel sambatda inania, tatogania, sautet saladdunia samba leu sipugagalai ka uma purimataatnia. Lepa tangsiakenangan si Joyakhin. Aipuaili nene, kateteret sikabalu ngarura burunia puparentaat Nebukatnezar.

¹³ Sangamberi pugalai sibara ka mas sigalai Rimata Salomo pukayoat Uman Tuhan, pakatainangannia si Nebukadnezar. Lepa sangamberi bibilet simakeppu saki sikuddu ka Uman Tuhan samba uma purimataat abbitnangannia ka Babel. Aipuaili sangamberi nene, kele siripot sikuat Tuhan.

¹⁴ Abbitnangan sangamberi sipulalaggai ka Jerusalem ka kudduat katuribbaiatda, sangamberi sautet saladdu, sangamberi saladdu simagege, pulu ngaribu sitangsiakenen samba leu simaagai mugalai, siagai mugalai laba. Sarat sirimanua simakope geba le amulegei.

¹⁵ Abbitnangan leu si Joyakhin ka kudduat katuribbaiat ka Babel, kisedda leu et inania, tainanalep rimata, sipugagalai ka uma purimataatnia samba siabeu tiboi tubu ka laggai nenda abbitnangan leu sia sibailiu ribbaiakenen ka Babel.

¹⁶ Sangamberi sirimanua simagege pitu ngaribu sia igitda, simaagai mugalai samba siagai masipaddai laba sangaribu sia igitda, saladdu simagege pasaggak, abbitnangan sia rimata Babel sibailiu ribbaiakenen ka Babel.

¹⁷ Iageti rimata Babel masiuddetake si Matanya, kamman Joyakhin, sibailiu rimata masisailiakenia samba silinangan oninia bailiu Zedekia.

Zedekia rimata Jehuda

¹⁸ Rua pulu ngarura beunannia si Zedekia kateteret aibailiunia rimata Jehuda samba pulusara ngarura burunia aipuparenta ka Jerusalem. Onin inania iate Hamutal, togat Jeremia sibara ka laggai Libna.

¹⁹ Si Zedekia masigalaiake sikatai ka matat Tuhan kele sigalaiakenen Joyakim.

²⁰ Bulat goluNia simakope katubutda sipulaggai ka Jerusalem samba ka Jehuda bailiu taipuletseinangan sia.