2Rim. 23 - BUKO SIPUNENAN

Josia masitataake pasibubuluiji sabulungan

¹ Lepa nenda Rimata Josia masisogai sangamberi sikebbukat laggai ka Jehuda samba ka Jerusalem.

² Iageti ei rimata ka Uman Tuhan sambatda sangamberi tai Jehuda samba sangamberi sipulalaggai ka Jerusalem, tai imam tai nabi samba sangamberi simakayo samba leu simageba. Arepirangan ibasaakenia rimata sangamberi tiboiet ka buko palelenngan sinesetda ka Uman Tuhan.

³ Lepa nenda purionangan rimata ka bebet arigi samba galainangan palelengan ka matat Tuhan rapurimanua masitut sangamberi parenta samba surukatNia ka bagat buko nenda. Sangamberi siberikabaga leu mupalelengan masitut ka palelengan nenda.

⁴ Lepa nenda rimata masiparentaake Imam Sabeu Hilkia, sipasirorom tai imam samba sipujajago sipugagalai ka matatbaliu Uman Tuhan, bule rabelaake ka Uma nenda sangamberi bibilet pakeiet masibuluiji sabulungan, Dewi Asyera samba leu panyanyat. Sangamberi bibilet nenda laboakenangannia Rimata Josia ka ujat laggai Jerusalem legret Susut Kidro, lepa abbitnangan abunia ka Betel.

⁵ Ariakenangan tai imam siuddetakenenda tai rimata Jehuda sipugagalai ka kuduat pasibuluijiat sabulungan ka laggai Jehuda samba ka Jerusalem, kisedda leu et tai imam sipanguruatake buluakenen katubut sabulungan, matat sulu, laggo samba panyanyat.

⁶ Belaakenangan tularat Dewi Asyera sabulungan sinanalep ka bagat Uman Tuhan samba abbitrangannia ka ujat laggai Jerusalem ka oinan Kidron. Laborangan leu tularat ka kudduat nenda, lepa tuddurangan putcunia imaailit samba ribbaiakerangan abunia ka ratei sirimanua simigi.

⁷ Pakatainangann sangamberi bilik ka Uman Tuhan pakeietda sipuolop tubu, kudduatda tainanalep masigalai komak pakeiet masibuluiji Dewi Asyera sabulungan sinanalep.

⁸ Sangamberi tai imam sibara ka Jehuda koiniakenangan sia si Josia raoi ka Jerusalem. Lepa pakatainangan sangamberi leleu kudduat pasibuluat, kudduat pasilabokat buluakenen sipanguruatakenenda tai imam, barania ka Geba pat aili ka Besyeba; bukkatakenangan leu sangamberi leleu pasibuluat ka matatbaliu sabeu sikuddu ka bebet lobok matatbaliu Josua, siuteake laggai nenda. Kudduat matatbaliu nenda iate ka isit Matatbaliu Siboiki ka enungan matatbaliu gugurukat ka laggai.

⁹ Tapoi tai imam nenda ta momoi ragalaiake panindogat ka kudduat pasibuluat Tuhan ka Jerusalem, sarat roti sitasioman le momoi rakom katalagat sasarainanda.

¹⁰ Tofet, iate kudduat pasibuluat sabulungan ka Susut Hinom, tunajisake. Bailiunangan ta anai beri sia sara sioi masipanguruatake togatda sibailiu buluakenen katubut Dewa Molokh.

¹¹ Ribbaiakenangan sangamberi kuro sikokoiakenen rimata Jehuda pakeiet masibuluiji matat sulu, samba laboakenangan kereta pakeiet masibuluiji.

¹² Pakatainangan kudduat pasibuluat sigalai rimata Jehuda ka uddut lalep, kudduat purusaijat Rimata Ahas. Kisedda leu et kudduat pasibuluat sigalai Rimata Manasye ka rua bebet Uman Tuhan pakatainangannia si Josia, lepa ribbaiakenangannia ka Susut Kidron.

¹³ Najisakenangan leu kudduat pasibuluat saigit sikalaut ka Jerusalem, saigit kaiaman leleu Sikatai. Mezbah nenda iate sigalai Rimata Salomo pasibuluji sabulunngan kasitsitakenen iate Asytoret, sabulungan sinanalep sabulunganda tai Sidon, Kamos, Moab, Milkom samba tai Amon.

¹⁴ Ragatakenangan tugu sabulungan samba bukkatakenangan arigit tularat Dewi Asyera, sabulungan sinanalep, lepa labbunangan kudduat nenda si Josia pasamba sangamberi tolat sirimanua.

¹⁵ Pakatainangan leu kudduat pasibuluijiat ka Betel sigalai Rimata Jerobeam togat Nebat rimata siabbit tai Israel ka jo. Lepa ragatakenangan kudduat pasibuluat si Josia ka kudduat pasibuluijiat nenda samba labonangannia pasamba tularat Dewi Asyera.

¹⁶ Iageti pitsaakenangan matania si Josia, itconangan piga pa ratei ka uddut leleu. Lepa koiniakenangan sia masigaigai ratei nenda samba belaakerangan patolat tolat, lepa laboakenangnannia ka kudduat pasibuluat. Kiseda te enungannia aipakatai kudduat pasibuluat nenda. Oto puailinangan kele sikuat Tuhan sinegeakenen nabit Tuhan kateteret aimuririo Rimata Jerobeam ka bebet kudduat pasibuluat ka punen. Lepa nenda itconangan minca sara ratei si Rimata Josia.

¹⁷ Iageti parerenangan, “Kasei ratei nenda?” Alegirangannia tai Betel, “Nenda te ratei Nabit Tuhan sioi sene sibara ka Jehuda, sipasisegeake pagalaiat kele sigalaiakenennu ka kudduat pasibuluat nene.”

¹⁸ Kuanangan rimata, “Eddangan ikuddu seda ratei nenda, ta tupagegeugeu! Oto ta arapageugeu tolat nabi sibara ka Jehuda, kisedda leu et tolat nabi sibara ka Samaria sirateiakenen sedda.

¹⁹ Ka senen laggai ka Israel, si Josia masipakatai sangamberi kudduat pasibuluijiat sabulungan sigalaira tai rimata Israel, sibaraake golut Tuhan. Aponia sigalai Rimata Josia ka Betel, galaiakenangan leu et ka kudduat pasibuluat ka sangaliot Israel.

²⁰ Sangamberi tai imam sipugagalai ka kudduat pasibuluijiat sabulungan, mateiakenangan sia ka uddut kudduat pasibuluat nenda. Labonangan leu patolat tolat sirimanua si Josia ka senen kudduat pasibuluat. Lepa nenda toili si Josia ka Jerusalem.

Si Josia masipuneni punen Paskah

²¹ Iageti kaunangan parenta Rimata Josia bule rapunenake punen Paskah kele sitususurat ka bagat buko surukat Tuhan.

²² Kalulut ta'an arapuneni punen Paskah nene tai Israel, barania kateteret tai sipasiukum masiparenta Israel samba leu kateteret tai rimata samba leu tai rimata Jehuda.

²³ Tapoi teret ka rura sikapulu balu puparentaat Josia, punenakerangan minca punen Paskah ka Jerusalem rapasisuru si Tuhan.

Pasibaugat bagei sigalai Josia

²⁴ Bule ioi ragalaiake surukat sitususurat ka bagat buko sineset Imam Sabeu Hilkia ka Uman Tuhan, Rimata Josia masikekle sipasisogai ketsat sirimanua simamatei, peramal ka Jerusalem samba leu ka sangaliot Jehuda, lepa ribbaiakenangan sangamberi buluat ka lalep, sabulungan samba bibilet pakeiet masibuluiji sabulungan.

²⁵ Ta anai rimata kele si Josia sipaguguletake tubunia kai Tuhan ka muinet patuatnia, sipakoinong ka enungan purimanuaiat samba paraboatnia siripot sangamberi surukat sitususurat ka Bukot Mose. Lepat Rimata Josia leu, ta'an babara minca rimata kelenia.

²⁶ Tapoi si Tuhan ta aitataake goluNia simakope ka Jehuda, kalulut sibaraakenen Manasye.

²⁷ Kuanangan si Tuhan, “Aponia sigalaiakenenKu ka Israel, Kugagalaiake te geti ka Jehuda. Kuriribbaiake te tai Jehuda ka laggai sikauKu katubutda samba leu Jerusalem laggai kilibet bagaKu ribbaiakekungan leuetnia. Kisedda leuet UmangKu nene, kele sikuaKu ibailiunia kudduat panindogat katubukKu.”

Pangampulat puparentaat Josia

²⁸ Kateteret Josia, si Firaun Nekho, rimata Misir, mei masisaggangi rimata Asyur ka bebet oinan Efrat, si Josia leu mei pasaggak masiropake rimata Asyur, tapoi mateiakenangannia si Firaun ka Megido.

²⁹ Pumumuan bagei pagalaiat Josia samba sangamberi sigalaiakenennia, tusuratake ka buko Pumumuan sangamberi rimata Jehuda.

³⁰ Akkatakerangan tubut Josia sapaguguletnia kauarangannia ka kereta baratda ka Migido samba abbitrangannia ka Jerusalem, iageti rateiakerangannia ka puariatnia. Iageti si Joahas, togat Josia, uddetakerangannia tai Israel ibailiu rimata masisailiake ukkuinia.

Joahas rimata Jehuda

³¹ Rua pulu telu ngarura beunannia si Joahas kateteret aibailiunia rimata samba telu ngalaggo burunia aipuparenta ka Jerusalem. Onin inania iate Hamutal togat Jeremia, sibara ka Libna.

³² Si Joahas masigalaiake sikatai ka matat Tuhan kele sigalaiakenenda taikebbukatnia.

³³ Pangampulat puparentaat Joahas iate kateteret aitangsiakenia si Nekho rimata Misir ka Ribla, kupkumen laggai Hamat, bule ta ipuparenta ka Jerusalem. Kaunangan luluietda tai Jehuda si Nekho telu ribu epat ngotu ngakilo perak samba telu pulu epat ngakilo mas.

³⁴ Iageti Rimata Nekho masiuddetake si Elyakim, togat Josia, sibailiu rimata Jehuda samba silinangan onin Elyakim bailiu Joyakim. Tapoi si Josia abbitnangannia ka Misir samba mateinia sedda.

Joyakim rimata Jehuda

³⁵ Bule ioi ilului sitiddou rimata Misir, Rimata Joyakim masitiddou juran ka siberikabaga siripot sioi raake.

³⁶ Rua pulu lima ngarura beunannia si Joyakim kateteret aibailiunia rimata Jehuda samba pulu sara ngarura burunia aipuparenta ka Jerusalem. Onin inania iate Zebuda, togat Pedaya sibara ka Ruma.

³⁷ Si Joyakim masigalaiake sikatai ka matat Tuhan kele sigalaiakenenda taikebbukatnia.