2Rim. 22 - BUKO SIPUNENAN

Josia rimata Jehuda

¹ Si Josia balu ngarurania beunannia kateteret aibailiunia rimata Jehuda, samba puparentanangan ka Jerusalem telu pulu sara ngarura burunia. Onin inania iate Jedida togat Adaya, sibara ka Bozkat.

² Si Josia masigalaiake simaeru ka matat Tuhan. Nia masitut kele purimanuaiat Rimata David taikebbukatnia, samba mareddetnia ka sangamberi surukat Taikamanua.

Buko surukat Tuhan tusese minca

³ Ka rura sikapulu balunia kateteret rimata Josia, rimata masikoiniake si Safan togat Azalya punuteteu Mesulam, sipanunuratnia, ka Uman Tuhan, masikua

⁴ “Kenan kai Imam sabeu Hilkia, koiniakenia iake sangamberi bulagat silepa tuabbit ka Uman Tuhan siruruakenenda tai imam sipugagalai ka matatbaliu Uman Tuhan.

⁵ Koiniakenia ikau bulagat nenda katubutda sipasijajago galajet masipaeru peruket ka Uman Tuhan. Bui ta rapakei bulagat nenda masilului upatda

⁶ sipugagalai loina, siagai mugalai lalep, sipasigagalai bukku samba leu masisaki loina samba bukku pakeiet'

⁷ Tapoi bui nugalaiake kam pangandeat pagalaiat bulagat sikau katubutda, kalulut makolou rapugalai.

⁸ Segeakenangan si Safan parentat rimata kai Hilkia, lepa tiboinangannia si Hilkia kai Safan sesena buko surukat Tuhan ka Uman Tuhan. Kaunangan buko nenda si Hilkia kai Safan samba basanangannia.

⁹ Lepa nenda toili si Safan kai rimata samba segeakenangannia bulagat sikoiriakenen ka Uman Tuhan araalaan samba arakauan sapagugulet rimata katubutda sipasijajago galajet masipaeru peruket ka Uman Tuhan.

¹⁰ Iageti kuanangan si Safan, “Si Hilkia masiake buko nene katubukku.” Lepa basaakenangan buko nenda si Safan katubut rimata.

¹¹ Kele aiarep aitubasaake bagat buko nenda, biritakenangan leppeinia rimata kalulut reureu baga.

¹² Lepa kaunangan parenta rimata katubut Imam Hilkia, Ahikam togat Safan, Akhbor togat Mikha, Safan sipanunurat ka negara, samba kai Asaya pakoiniet rimata:

¹³ “Kenan parereake enungan kaku kai Tuhan samba leu ka siberikabaga Jehuda pagalaiat bagat buko nene. Magolu si Tuhan katubutta kalulut ta aragalaiake taikebbukatta surukat sitususurat ka bagania.”

¹⁴ Iageti tuitui si Hilkia, Ahikam, Akhbor, Safan samba Asaya masitiddou enungan ka sara sinanalep sipuoni Hulda. Nia iate sara nabi sikuddu ka laggai sibau ka Jerusalem. Simanteunia sipuoni Salum togat Tiwa, punuteteu Harhas, galajetnia iate masipasikeli leppei panindou ka Uman Tuhan. Kele aiarepnia si Hulda sisegeakenenda,

¹⁵ koiniakenangan sia ratoili kai rimata samba masisegeake

¹⁶ sikuat Tuhan: Kuukum te geti Jerusalem samba sangamberi sikukuddu ka bagania kele sitususurat ka bagat buko sibasat rimata.

¹⁷ Kalulut arakaddiuakean Aku samba arapanguruatakean buluakenen katubutda taikamanua bagei. Sangamberi sigalaiakenenda nene sibaraake pugolukatKu. Magolu Aku katubut Jerusalem, samba ta tata goluKu.

¹⁸ Tapoi pagalaiat Rimata Josia, nene le patonekatKu, Tuhan Taikamanuan Israel, lepat anuarep aponia sitususurat ka bagat buko nenda,

¹⁹ oleinangan bagam samba repeakenungan patuatnu ka mataKu. Akuisiakean masiukum Jerusalem samba sirimanua sikuddu ka bagania. Kubabailiuake te laggai nenda sara itcoket kalotoakenen, samba onin Jerusalem bailiuakekungannia oni pateleiat. Tapoi kele anuarep pagalaiat palotokatKu nene, pusounungan samba biritakenungan leppeinu toggaiat reureu bagam. Akuarepan panindogatnu,

²⁰ kalulut nenda pasiukuman Jerusalem ta Kuririuriuake ka burut puririmanuam. Matei le ekeu geti ka bagat aban.” Iageti toili sia sapakoiniet nenda katubut rimata samba segeakerangan leu patonekat nenda.