2Rim. 21 - BUKO SIPUNENAN

Manasye rimata Jehuda

¹ Pulu rua ngarura beunannia si Manasye kateteret aibailiunia rimata Jehuda, samba puparentanangan ka Jerusalem rua pulu lima ngarura burunia. Onin inania iate Hefzibah.

² Si Manasye masigalaiake jo ka matat Tuhan, karena masitutake katukelat sikatai galaiakenenda tai bangsa sikeklet Tuhan sibara ka Kanaan kateteret araguruki laggai nenda tai Israel.

³ Kudduat pasibuluat sabulungan sipakatai Hizkia, ukkuinia, galainangannia minca. Galainangan kudduat pasibuluat panindogat kai sabulungan samba galainangan tularat Bulungan Asyera, kele sigalaiakenen Ahab rimata Israel. Si Manasye leu et masipanindogi panyanyat.

⁴ Aikuangan si Tuhan, Jerusalem iate kudduat kaoijananNia samba kudduat panindogat katubuNia, tapoi ka Uman Tuhan, si Manasye masigalai kudduat pasibuluat sabulungan.

⁵ Ka rua laibokat Uman Tuhan rioakenangan kudduat pasibuluat panyanyat.

⁶ Panguruatakenangan togania sibailiu buluakenen. Si Manasye leu et masigalaiake galajet pukekerei, putatawa, jagot tubu, samba masitiddou enungan ka ketsat sirimanua simamatei. Maigi aigalaiake jo ka matat Tuhan bailiu bara goluNia si Tuhan.

⁷ Kaunangan leu et tularat Bulungan Asyera ka bagat Uman Tuhan, kenanen aikuangan si Tuhan katubut David samba kai Salomo, togania, “Umangku samba laggai Jerusalem nene, sipilikKu katalagat sipulurua suku Israel, iate kudduat siteuakenenKu sibailiu kudduat panindogat katubukKu.

⁸ Ke mareddet tai Israel ka sangamberi parentaKu samba masitut surukat sikau Mose, paguguletKu, katubutda, ta Kuobaake sia rakekle sia ka laggai sikauKu ka taikebbukatda.”

⁹ Tapoi tai Jehuda ta mareddet sia kai Tuhan, samba si Manasye aibailiuake peile sia ramajo simakope, bele peile jo sigalaira tai bangsa sikeklet Tuhan sibara ka Kanaan kateteret araguruki laggai nenda tai Israel.

¹⁰ Kalulut nenda, kuanangan si Tuhan ka sapaguguletNia,

¹¹ “Bulat makatainia rimata Manasye, bele peile katai sigalaiakenenda tai Kanaan. Kalulut tularat sigalainia majorangan tai Jehuda.

¹² Kalulut nenda, Aku, Tuhan Taikamanua panindogietda sapaamian Israel, Kubaraake gejat baga sabeu ka Jerusalem samba ka Jehuda, bailiu senen sirimanua sipasiarep pagalaiat nenda tugegerangan.

¹³ Kuukum te geti Jerusalem kele akuukum Samaria samba si Ahab rimata Israel samba leu muntogatnia. Kusasabui te geti Jerusalem imalina kele piring silepa bui samba tulukkeake.

¹⁴ Sikuddu sipulelegei obaakekungan sia ibailiu mateiakenenda tai saggakda, bailiunangan sia rauraugetda tai saggakda.

¹⁵ Sangamberinia nenda Kugagalaiake katubutda sapaamianKu, kalulut majo sia katubukKu samba rabaraake goluKu barania peile arabela ka Misir taikebbukatda pat aili kineneiget.”

¹⁶ Ta sarat masiabbit sirimanua ramajo kai Tuhan rapanindogi sabulungan, si Manasye leu et masimateiake maigi sirimanua sitaimasele, bailiu puguruknangan logau ka senen kudduat ka Jersalem.

¹⁷ Pumumuan bagei pagalaiat rimata Manasye samba sangamberi jo sigalaiakenennia, tusuratake ka buko Pumumuan rimata Jehuda.

¹⁸ Iageti matei si Manasye samba rateiakerangannia ka mone uma purimataat, iate mone Uza. Iageti si Amon, togania ibailiu rimata masisailiakenia.

Amon rimata Jehuda

¹⁹ Si Amon rua pulu rua ngarura beunannia kateteret aibailiunia rimata Jehuda samba puparentanangan ka Jerusalem rua ngarura burunia. Onin inania iate Mesulemet togat Harus, tai Jotba.

²⁰ Si Manasye masigalaiake sikatai ka matat Tuhan kele sigalaiakenen Manasye, ukkuinia.

²¹ Si Manasye masiului sigalai ukkuinia, samba manindou ka sabulungan buluijiet ukkuinia.

²² Ta amurimanuania kele ka obaket bagat Tuhan, kaddiuakenangan leu si Tuhan, Taikamanua panindogiet taikebbukatnia.

²³ Sipugagalai kai rimata Amon masibaraake pusaraat masilawannia samba masimateiakenia ka uma purimataat.

²⁴ Tapoi siberikabaga Jehuda masimateiake sangamberi simateiake rimata Amon, lepa uddetakerangan si Josia, togania, sibailiu rimata.

²⁵ Pumumuan bagei pagalaiat si Amon tusurat ka buko Pumumuan rimata Jehuda.

²⁶ Iageti rateiakerangan si Amon ka ratei ka mone Uza. Iageti si Josia, togania ibailiu rimata masisailiakenia.