2Rim. 20 - BUKO SIPUNENAN

Mabesik si Hizkia samba tualeake

¹ Ka bagat gogoi nenda bara besiknia si Hizkia samba malegre imatei. Lepa oi nabi Jesaya samba kuanangan, “Aikua si Tuhan bule nulepaake sangamberi pasikeliet, kalulut ta mamale ekeu. Taan mabuburu numatei.”

² Matainangan ka rupi si Hizkia, lepa panindounangan,

³ “Tuhan, repdep le akupaguguletakean tubukku katubum ka bagat riuriu topit samba ka linat patuat. Kubesiake masireddet obaket bagam.” Lepa pusounangan simakope si Hizkia.

⁴ Tapoi kepei bela si Jesaya barania ka kudduat ka tenga uma purimataat, koiniakenangannia si Tuhan

⁵ itoili kai Hizkia, rimata paamian Tuhan, samba segeakenangan patonekat nene, “Aku, Tuhan, Taikamanua panindogiet David taikebbukatnu, Akuarepan panidogatnu samba Akuitcoan elum. Aileu Kualeake ekeu, ka gogoi siketelu oi ekeu ka umangKu.

⁶ Aile kutuppai minca ruram pulu lima ngarura. Kubebelaake te geti ekeu samba laggai Jerusalem ka kabei rimata Asyur. Pasikelikkungan ngeti laggai nene kalulut pubebeunanKu samba kalulut palelenganKu pasamba paguguletKu si David.”

⁷ Lepa koiniakenangan sirimanua si Jesaya masiailitake buat ara samba raposaiakenia ka besit rimata bule imale.

⁸ Parerenangan Rimata Hizkia, “Aponia toggaiat aaleakena aku si Tuhan samba ooinia kuei ka Uman Tuhan ka gogoi sikatelu?”

⁹ Aleginangannia si Jesaya, “Aile iake toggaiat si Tuhan katubum igalaiake siripot palelenganNia. Kineneiget, kipa siobanu: Tuolaake pa ailiggou nenda pulu ngagorot ele tusoksokake pulu ngagorot?”

¹⁰ Kuanangan si Hizkia, “Malabbei le itugalai ituolaake ailiggou ka pulu ngagorot. Kalulut nenda galai le itusoksok pulu ngagorot.”

¹¹ Iageti panindounangan si Jesaya kai Tuhan, lepa galainangan si Tuhan itusoksok ailiggou nenda pulu ngagorot, silepa ienungi ailiggou nenda ka sausau matat sulu sigalai Ahas.

Hizkia samba pakoinien sibara ka Babel

¹² Kateteret nenda rimata Babel, iate si Merodakh-Baladan togat Baladan, masiarep simaruei le aimale si Hizkia ka besiknia. Kalulut nenda koiniakenangan sirimanua masiabbit surat samba panguruat kai Hizkia.

¹³ Silonanangan sia sooi nenda si Hizkia samba pakoinongnangnan katubutda sangamberi pukayoatnia, iate mas samba perak, pusinginan samba leu tula pusinginan simakeppu saki samba leu sangamberi pakeietda saladdunia. Ta anai berisara sibabara ka uma purimataatnia ta aipakoinong katubutda.

¹⁴ Iageti ei si Jesaya kai Rimata Hizkia samba parerenangan, “Kaipa arabara sirimanua nenda? Aponia arakua?” Aleginangannia si Hizkia, “Sibara ka Babel, laggai simareunan.”

¹⁵ Parerenangan minca si Jesaya, “Aponia araitco ka uma purimataat?” “Aleginangannia si Hizkia, “Sangamberinia!’ Ta anai berisara ka uma purimataat ta akupakoinong katubutda.”

¹⁶ Lepa kuanangan si Jesaya katubut rimata, “Aikua si Tuhan

¹⁷ iaaili te gogoinia sangamberi pukayoat ka bagat uma purimataatnu samba siruruakenenda taikebbukatnu teret kineneiget, tuabbit ka Babel. Ta anai sipulelegei.

¹⁸ Babara te raala katalagatda sapunuteteunu samba bailiunangannia sipugagalai ka uma purimataat masipasikeli rimata Babel.”

¹⁹ Aleginangan Rimata Hizkia, “Bulat maeru patonekat Tuhan sisegeakenennu katubukku.” Aialeginia kisedda, aipaatu poi: Bara le pusanangan samba aban ka purimataatku buruku murimanua lepa.”

Pangampulat puparentaat Hizkia

²⁰ Pumumuan bagei pagalaiat Rimata Hizkia, pagalaiat gegenia ka pasaggangan samba kipa aigalai kolam samba enungan oinan ioi ipuguruk ka laggai, sangamberinia tusuratake ka buko Pumumuan sangamberi rimata Jehuda.

²¹ Iageti matei si Hizkia, lepa togania si Manasye ibailiu rimata masisailiakenia.