2Rim. 2 - BUKO SIPUNENAN

Si Elia tusakai ka manua

¹ Ailinangan teterenia si Tuhan iakkatnake si Elia ka manua ka bagat rusa talabari. Kateteret nenda si Elia samba si Elisa amutuituian sia baratda ka Gilgal,

² samba kateteret ai sia ka tengan enungan, kuanangan si Elia katubut Elisa, “Kuddungan sene, kalulut aikoiniake aku si Tuhan kuei ka Betel.” Tapoi aleginangan si Elisa, “Ka onin Tuhan sipuririmanua samba purimanuaiatnu, ta kukakaddiuake ekeu.” Oto ei sia simakere ka Betel.

³ Sangamungkuat nabi sikukuddu sedda ei sia masiailiake si Elisa samba parererangan, “Anuagaian leu, kakaddiuakena ekeu tuanu iakkatnakenia si Tuhan ka manua ka gogoi nene?” Aleginangan si Elisa, “Oo, akuagaian. Tapoi paat leu, tattutitiboi pagalaiat nene.”

⁴ Iageti kuanangan si Elia katubut Elisa, “Kuddungan sene, kalulut aikoiniake aku si Tuhan kuei ka Jerikho.”

⁵ Sangamungkuat nabi sikukuddu sedda ei sia masiailiake si Elisa samba parererangan, “Anuagaian leu, kakaddiuakena ekeu tuannu iakkatnakenia si Tuhan ka manua ka gogo nene?” Aleginangan si Elisa, “Oo, akuagaian. Tapoi paat leu, tattutitiboi pagalaiat nene.”

⁶ Iageti kuanangan si Elia katubut Elisa, “Kuddungan sene, kalulut aikoiniake aku si Tuhan kuei ka Oinan Jordan.” Tapoi aleginanngan si Elisa, “ka onin Tuhan sipuririmanua samba purimanuaiatnu, ta kukakaddiuake ekeu.” Iageti riuriuakerangan puenungananda pat sege ka Oinan Jordan,

⁷ samba airatutut sia si lima pulu tai nabi nenda. Lepa puarinangan si Elia samba si Elisa ka bebet oinan, samba si lima pulu tai nabi nenda murio ta areunia ka kuddut nenda.

⁸ Goloknangan jubania si Elia, lepa purutnakenangannia samba bo'boakenangannia ka uddut oinan nenda. Iageti masilanangan oinan nenda rubei rua, bailiu oinangan rapuenung ka polak simagarak.

⁹ Kele arasege ka sila, kuanangan si Elia katubut Elisa, “Tiddouan apa siobat bagam katubukku kepei iakkatnake aku si Tuhan kukaddiuake ekeu!” Aleginangan si Elisa, “Eddangan kusilo rua ngarubeiat ketsatnu.”

¹⁰ Kuanangan si Elia, “Ta' malabbei tiddogetnu nenda. Tapoi ke nuinco kateteret iakkatnake aku si Tuhan, puailinangan kele sitiddounu. Tapoi ke ta nuinco, ta muaaili kele sitiddounu.”

¹¹ Ai sia mueenung, ai sia patitibo. Sinulut oi sara kereta sibara obengan pasamba kuro sibara obengan sipasaraake sia, lepa tuakkatnangan si Elia ka manua ka bagat rusa talabari.

¹² Itconangannia si Elisa, lepa kuanangannia, “Elia, Ukkuiku, Ukkuiku! Sipasijago Israel simagege! Ta'an anai ekeu!” Iageti taitconangannia si Elisa. Ka bagat reureu baga biritnakenangan jubania si Elisa bailiu rua,

¹³ lepa alanangan jubah Elia sibebele. Lepa nenda toilinia samba purionangan ka bebet Oinan Jodan,

¹⁴ lepa bo'boakenangan jubah Elia nenda ka uddut oinan samba masikua, “Kaipa si Tuhan, Taikamanuan Elia nenda?” Kele aibo'boake jubah nenda ka uddut oinan, rubeinangan rua oinan nenda samba putaliponangan.

¹⁵ Itcorangannia si lima pulu tai nabi sibara Jerikho nenda, lepa kuarangan, “Ketsat Elia ameian katubut Elisa!” Ailiakerangannia, lepa purekkukrangan ka matania

¹⁶ samba kuarangan, “Ai kai lima pulu igimai, sangamberimai simaron tubu. Kalulut nenda, sita kam masigaba tuannu si Elia. Ele aiambitnia Ketsat Tuhan ka leleu ele ka su'su, samba galaknangannia sedda.” Aleginangannia si Elisa, “Pa'an leu.”

¹⁷ Tapoi mariuriu le ratubbuinia bailiu obanangannia. Iageti tuitui sia si lima pulu nabi nenda masigaba si Elia telu ngagogoi burunia, tapoi ta arasesenia.

¹⁸ Lepa geti toili sia kai Elisa aingengena sia ka Jerikho. Kuanangan si Elisa, “Ta' pa akukuangan katubumui, bui' nuei kam?”

Pukerengan sigalaiakenen Elisa

¹⁹ Kuarangan sipulalagai ka Jerikho katubut Elisa, “Itco pei! Bulat maeru kudduat laggai nene, kele siitconu, tapoi ta maeru oinannia samba mareirei imakatai suruketda ka laggai nene.

²⁰ Kuanangan si Elisa, “Ala kam sara mangkok sibau samba kau kam garam ka bagania.” Iageti ambitrangannia katubunia kele sitiddounia.

²¹ Lepa ei si Elisa ka bubuakat oinan, iageti ribbaiakenangan garam nenda ka bagat oinan samba kuanangan, “Kise te sikuat Tuhan: “Kulatsatnake oinan nene bule ta ibara kamateiat ele imakatai suruket!”

²² Barania teteret nenda malatcatnangan oinan nenda kele sikuat Elisa.

²³ Lepa geti tuitui si Elisa barania ka Jerikho iei ka Betel. Ka tengan enungan bela sangamungkuat tatoga baratda ka laggai samba geigeirangannia. Gereiakerangan, “Hei guluk, kenan katuitui sene!”

²⁴ Lepa pitcanangan samba itconangan sia si Elisa, lepa pateleijinangan sia ka bagat onin Tuhan. Teteret nenda leu et bela rua ngamuneng beruang sinanalep sibara ka leleu, lepa pasabbanginangan epat pulu rua sia katalagatda tatoga nenda.

²⁵ Riuriuakenangan puenunganannia si Elisa ka leleu Karmel, lepa geti toilinia ka Samaria.