2Rim. 19 - BUKO SIPUNENAN

Rimata masitiddou nganturat katubut nabi Jesaya

¹ Kateteret aiarep si Hizkia sisegeakenenda nenda, biritakenangan leppeinia samba kaunangan komaknia goni toggaiat sou baga, lepa einia ka Uman Tuhan.

² Iageti koiniakenangan si Elyakim, ute ka uma purimataat, Sebna panitera negara samba simabajak katalagatda tai imam, raei masiailiake nabi Jesaya togat Amos. Sia leu et masipakei komak goni.

³ Kuarangan katubunia “Kise aikua si Hizkia, gogoi nene iate gogoi reureu baga, ukuman samba paloloiat. Sita nene makere le kele sinanalep situtuake matat togania tapoi ta anai ron tubunia.

⁴ Rimata Asyur masikoniake sara saladdu masipaloloi Taikamanua sipuririmanua. Bule aiarepan Tuhan Taikamanuam paloloiat nenda, samba ukumnangan sia sipasikukua nenda! Oto panindou le ka Taikamanua addeatda sipuririmanua peile.”

⁵ Kele aisilo patonekat sibara ka Rimata Hizkia,

⁶ kunangan si Jesaya katubutda “Kise nukukua kam katubut Tuanmui: Kise te aikua si Tuhan, bui numaloto ka tiboiet siarepnu sikuatda sapagugulet rimata Asyur rapaloloi Aku.

⁷ Bulatnia, aile Kukau sara ketsat katubunia, bailiu arepnangan sara katuareman samba toilinangan leu et ka laggainia samba mateinangan leu ka lanjau ka laggainia.

Tai Asyur masikau pulotokat bagei

⁸ Arepnangan katuareman saladdut Asyur nenda, atoilingan rimatania barania ka Lakhis samba ainia pasasaggak masisaggangi laggai Libna. Lepa tuitui saladdu nenda masiailiake rimatania.

⁹ Rimata Asyur aisiloan katuareman saladdut Misir ai sia momoi masisaggangi sia, iuteake sia iate si Tirhaka rimata Sudan. Kalulut nenda, rimata Asyur masikau surat kai Hizkia rimata Jehuda.

¹⁰ Kise le' ngangan surat nenda, “Bui Taikamanuam katonemiennu nenda ipajo ekeu pasamba palelenganNia: Jerusalem ta' ikakau ka kabei rimata Asyur.

¹¹ Anuarepan te, senen laggai sisagganginda tai rimata Asyur, bui ta tupakatai. Bui nukua tubebelaake ekeu!

¹² Kateteret aipakatai Laggai Gozan, Haran samba Rezef taikebbukatku samba leu imateiake tai Eden sikuddu ka Telasar, ta anai berisara sabulunganda sioi sibelaake sia.

¹³ Kaipa sia tai rimata laggai Hamat, Arpad, Sefarwaim, Hena samba Iwa?”

¹⁴ Silonangan surat nenda si Hizkia sibara ka kabeira sipasiabbit surat nenda, lepa basanangannia. Iageti einia ka Uman Tuhan samba ngangaakenangan surat nenda ka matat Tuhan,

¹⁵ Lepa panindounanan, “Tuhan, Taikamanuan Israel, sikuddu ka uddut kerub, Ekeu le saram Taikamanua ka sangamberi purimataat ka polak. Ekeu le aibaraake manua samba polak.

¹⁶ Tuhan, itco pei sipuaaili katubumai. Arepake sangamberi paloloiat Sanherib katubum, Taikamanua sipuririmanua!

¹⁷ Kuagai kai sangamberimai, Tuhan, amaigingan arasubuake tai bangsa samba arapakatai laggaira.

¹⁸ Pakatairangan samba laborangan leu sabulunganda, kalulut bulat ta anai gegetda sabulunganda. Sia nene tularat sigalai sibara ka loina samba sibara ka bukku sigalai kabei sirimanua le.

¹⁹ Ale Tuhan, Taikamanuamai belaake kai ka kabeira tai Asyur, bule raagainia sangamberi bangsa kapolak, sarat Ekeu le saram Taikamanua.”

Patonekat Jesaya katubut rimata

²⁰ Iageti kaunangan patonekat si Jesaya katubut Rimata Hizkia sibailiu alegiat panindogat rimata,

²¹ kise aikua si Tuhan, “Laggai Jerusalem masigagati samba masipaloloi ekeu, Sanherib.

²² Nuagai leu kasei anupaloloi? Aku, Taikamanuan Israel, Taikamanua Sipunenan! Bulat mabuak patuatnu katubukKu.

²³ Koiniakenungan pakoinietnu bule ikua, kalulut iginia kereta pasaggaknu kupkuakenungan paleleu leleu simabuak ka Libanon. Pataddeijinungan loina pinilok simabuak samba simakope lainge samba gurukinungan leleu sibara loina simalibbut.

²⁴ Gaigainungan uggungan samba lonungan oinan ka laggaira sabagei, samba paperakirangan saladdum bagat oinan Nil pat garak.

²⁵ Ta' pei pa anuarep, sangamberinia nenda akupaatungan barania siburu peile? Kineneiget Akugalaiakean. Aku te amasiake gege katubum masipakatai palaggai-laggai sibara irip bukku ibailiunia karagatat.

²⁶ Taioinangan ragalai tubudda sirimanu sikuddu sedda, tugegerangan samba muloto. Kele sese ka polak simalio samba sese siputututu ka tobat lalep le sia, simagagarak ke iboroinia rusa sikalaut simaoloi.

²⁷ Tapoi Kuagai sangamberi galai tubum. Kuagai apa nugagalai samba kaipa eijatnu.

²⁸ Kuagai bulat magolu ekeu katubukKu samba akuarepan pagalaiat pubuangan patuatnu. Kineneiget Kuake susuilak ka asaknu samba babairat ka ngungum, bule Kutoiliake ekeu ka enungan kabaraiatnu.

²⁹ Kaunangan leu si Jesaya patonekat kai Hizkia, “Nene te sibailiu toggaiat kekeu. Ka rura nene samba ka rura ka mata, rakokom te gandum siputututu sarania. Tapoi lepa nenda oinangan rapangurep gandum samba anggur samba leu nanamrangan buania.

³⁰ Tai Jehuda sipulelegei peile, maerunangan puririmanuanda kele siureman sipuungat simakeru samba sipububua.

³¹ Babara te sirimanua simaarau ka Jerusalem samba ka uddut leleu Sion, kalulut aiteuakean si Tuhan ipuaili pagalaiat nene.

³² Nene te sikuat Tuhan pagalaiat rimata Asyur, “Ta iguguruki Jerusalem ele ipapanaake silogui ka saigit laggai nenda. Ta anai saladdu sipukokorabbi silegeri laggai nenda, samba ka sangalionia ta ragagalai kekre pasialougat.

³³ Enunginangan te geti rimata Asyur enungan kabaraiatnia kateteret aioi, ta iguguruki laggai nenda. Kise te ngangan Tuhan.

³⁴ Jagokungan te geti laggai Jerusalem kalulut pubebeunanku samba kalulut pelelenganKu ka paguguletKu si David.”

³⁵ Ka soibo nenda leu et ei Malaikat Tuhan ka pusapougatda tai Asyur, samba mateiakenangan saladdu sangotu balu pulu lima ribu igitda. Ka mansepnia simanseman masaragainangan leu tubutda simamatei.

³⁶ Iageti soksoknangannia si Sanherib rimata Asyur samba toilinia ka Niniwe.

³⁷ Ka sara gogoi, ainia maninindou ka bagat uman sabulungan Nisrokh, mateiakerangannia si Adramelekh samba si Sarezer, tatogania pasamba lanjau. Lepa nenda tuitui sia ka mulaggai Ararat. Iageti si Esarhadon, togania, ibailiu rimata masisaliakenia.