2Rim. 18 - BUKO SIPUNENAN

Hizkia rimata Jehuda

¹ Ka rura sikatelu puparentaat Rimata Hosea togat Ela ka Israel, si Hizkia togat Ahas ibailiu rimata ka Jehuda.

² Kateteret nenda rua pulu lima ngarurania beunannia aibailiunia rimata samba puparentanangan ka Jerusalem rua pulu siba ngarura burunia. Onin inania iate Abia togat Zakharia.

³ Si Hizkia masigalaiake obaket bagat Tuhan kele rimata David taikebbukatnia.

⁴ Pakatainangan kudduat pasibuluat sabulungan samba bukkatakenangan ariginia samba pakatainangan leu tularat Dewi Asyera. Pakatainangan leu ulou perunggu sigalai Mose oniakenen Nehustan. Kalulut, pat aili kateteret nenda tai Israel aipeile ralalabo kumanyang rapasisuru ulou perunggu nenda.

⁵ Katalagat sangamberi rimata Jehuda, sipuboboiki ele kalepat Hizkia, ta anai kele nia. Matonem bagania katubut Tuhan, Taikamauan Israel.

⁶ Mariuriu nia mutopit katubu Tuhan, ta aisaggangi si Tuhan. Sangamberi parentat Tuhan sisegeakenen Mose katubunia, galaiakenangannia sipulelek.

⁷ Iate lulunia imariuriu iropakenia si Tuhan, bailiu mariuriu isilo kamanangan kabagat pasaggangan samba uktuk ka sangamberi galajetnia. Makelanangan patuatnia ka rimata Asyur samba taiobanangan mureddet katubunia.

⁸ Kalaakenangan tai Filistin pat aili ka Gaza samba pakatainangan laggaira, kudduat pujagoat samba leu laggai sabeu sibara irip simaron.

⁹ Ka rura sikaepat puparentaat Hizkia, iate karura sikapitu puparentaat Rimata Hosea ka Israel, sagganginangan Israel samba alounangan Samaria rimata Asyur.

¹⁰ Kele aisabau telu ngarura burunia oinangan raala laggai Samaria. Aipuaili nenda iate ka rura sikaenem puparentaat Hizkia samba karura sikasiba puparentaat Hosea.

¹¹ Iageti rimata Asyur masiambit tai Israel ka Asyur sibailiu tangsiakenen samba kaunangan sia mukuddu ka laggai Halah, ka bebet oinan Habor ka kupkumen laggai Gozan samba leu ka laggaira tai Madai.

¹² Aramakala tai Samaria kalulut taimareddetda tai Israel katubut Tuhan, Taikamanuanda. Rapasabau palelengan sigalai Tuhan pasambatda samba rapasabau surukat Mose, paguguletNia. Ta roba masiarep samba masigalaiake.

Rimata Sanherib masialou laggai Jerusalem

¹³ Ka rura sikaepat puparentaat Hizkia rimata Jehuda, Sanherib rimata Asyur masisaggangi sangamberi laggai sabeu samba kupkupakenangan leu laggai nenda.

¹⁴ Iageti si Hizkia rimata Jehuda, masikoiniake sirimanua katubut rimata Asyur ka Lakhis masikua kise “Amaselengan aku. Kalulut nenda kutiddou bule nuariake masisaggangi kai, aile kuake sangamberi tiddogetnu.” Iageti kuanangan si Sanherib kai Hizkia kaunennia katubunia iate sangotu kilogram perak samba sangaribu kilogram mas.

¹⁵ Kalulut nenda, sangamberi perak sibabara ka Uman Tuhan samba bulagat ka uma purimataat kaunangannia si Hizkia kai Sanherib.

¹⁶ Mas sikau Hizkia ka matat baliu Uman Tuhan alanangannia samba kaunangannia kai Sanherib.

¹⁷ Tapoi rimata Asyur masikau sibara ka Lakhis sangamungkuat sabeu saladdu masisaggangi Jerusalem. Sibaililu ute mungkuat saladdu nenda iate telu utera saladdu siabeu tiboi tubu samba sara utet saladdu samba leu sipasikeli lo, samba sara sia sipasijajago rimata. Kele arasege ka laggai nenda kuddu sia ka mone, iate Mone Penatu ka bebet sopak enungan pugurungan oinan ka kolam rubeiat ka pata.

¹⁸ Lepa pugereirangan rasogai Rimata Hizkia. Iageti bela si Elyakim togat Hilkia, ute ka uma purimataat, si Sebna, panitera negara samba si Joah togat Asaf sipuuku pubulaganan negara.

¹⁹ Iageti kuanangan sara saladdutda tai Asyur katubutda, “Segeake kam kai Hizkia tiboiet rimata Asyur nene “Angoi nukau tubum simaron?

²⁰ Nukua pa sarat tiboiet le sibailiu ron ka bagat pasaggangan? Kasei karoakenennu, bailiu magege ekeu masilawan Asyur?

²¹ Kirenangan nukaroni raropake ekeu tai Misir, tapoi makere le kele tupakei loinat boroboroi sibailiu tutura, lepa mabakbaknangan tutura nenda samba pununangan kabeinu. Kisedda rimata Misir ka sangamberi sirimanua sikaroninia.”

²² Ke nukua kam katubukku “Tuhan Taikamanuamai le karonanmai baga? Ta pa aipakataian si Hizkia kudduat pasibuluat samba ikua ka tai Jehuda samba Jerusalem “Ka matat kudduat pasibuluat ka Jerusalem nene le nupaninindou kam!”

²³ Oto kineneiget, ka onin rimata Asyur magege aku pataru, kuaake rua ngaribu ngamuneng kuro katubumui, ke moi nuake kam katalagamui sirimanua sipakei kuro nenda.

²⁴ Kipa ioi nukalake kam sara saladdut tuanku bulat sigoiso nene? Tapoi aipeile nukakaroni kam Misir iake paroman kereta pasaggak samba saladdu sipukukuro!

²⁵ Nukua pa kam ta anai iroropake kai si Tuhan kusaggangi samba kukalaake kai laggaimui? Tuhan le amasikoiniake kai kusaggangi samba kupakatai kai laggai nenda!”

²⁶ Lepa kuanangan si Elyakim, Sebna samba si Joah katubut saladdu nenda “Tuan, panibo le ka ngangan Aram katubumai, kuagai le kai. Bui nukau ngangan Ibrani, raarep sarakyat sikuddu ka pata ka irip laggai.”

²⁷ Aleginangan saladdu nenda “Sarat kakam samba katubut rimatamui pa kusegeake sangamberi nene? Ta! Tapoi katubutda leu sarakyat sikuddu ka irip laggai nenda, sikom samba silo simalolitda pasambamui?

²⁸ Iageti purionangan samba pugereinangan saladdu nenda ka ngangan Ibrani “Arep kam sikuat rimata Asyur,

²⁹ “Bui nuoba ipabokoiji kam si Hizkia, kalulut ta momoi ibelaake kam ka kabeiku.

³⁰ Bui nuarepi kam pananakatnia nupukaronan kam katubut Tuhan, bui nukua kam iroropake te kam si Tuhan ele ikeraake saladdut Asyur raala laggaimui.

³¹ Bui nuarepi kam ngangan Hizkia. Aku rimata Asyur masikua kamatamui, kaddiuake kam laggai nenda. Nulolo geti kam buat suat anggur ka monemui samba masinanam buat aramui samba leu masilo oinan ka uggunganmui,

³² teret kukau kam ka sara laggai kele laggaimui, simaigi gandum, suat anggur, zaitun, tulat zaitun samba suat mani. Ke nureddet kam sikuakku katubumui purimanuamuian samba ta mamatei kam. Bui nuarep kam ngangan Hizkia! Aile ipabobokoiji kam ikua iropake kam si Tuhan.

³³ Amuaili leu pa sabulungan bangsa bagei masibelaake laggaira ka kabeiku?

³⁴ Kaipania sabulungan laggai Hamat samba Arpad? Kaipania sabulungan Sefarwaim, Hena samba Iwa? Aileu pa siooi masiropake laggai Samaria?

³⁵ Kasei sabulungan amasibelaake laggaira ka kabeiku? Kipa ioi ibelaake Jerusalem si Tuhan ka kabeiku?”

³⁶ Kele araarep sangamberi nenda, ta araalegi sipulaggai ka Jerusalem, kalulut aikuangan si Hizkia katubutda bule ta raaleginia.

³⁷ Iageti biritakenangan leppeinia si Elyakim, Sebna samba si Joah toggaiat sou bagatda, lepa tuitui sia masisegeake katubut rimata Hizkia sangamberi sikuat saladdut Asyur nenda.