2Rim. 17 - BUKO SIPUNENAN

Hosea rimata Israel

¹ Ka rura sikapulu rua puparentaat Rimata Ahas ka Jehuda, si Hosea togat Ela ibailiu rimata Israel ka Samaria. Puparentanangan sedda siba ngarura burunia.

² Majonia ka matat Tuhan, tapoi ta kele tai rimata Israel siboiki.

³ Sagganginangan samba kalaakenanngannia rimata Asyur, bailiu senen laggo buita ilului upeti katubunia.

⁴ Tapoi ka sara gogoi, koiniakenangan pakoiniet si Hosea katubut So rimata Misir bule itiddou paromannia. Lepa ariakenangan si Hosea masilului upeti senen rura katubut rimata Asyur. Kateteret aiagainia si Salmaneser pagalaiat sigalaiakenen Hosea, labananngnan si Hosea samba kaunangannia ka bagat tangsi.

⁵ Iageti enunginangan sangaliot laggai nenda rimata Asyur, sagganginangan laggai Samaria samba alounangannia telu ngarura burunia.

⁶ Ka rura sikasiba puparentaat Hosea, rimata Asyur masiala laggai Samaria. Ambitnangan tai Israel ka Asyur samba kaunangan sia mukuddu ka Halah, ka bebet oinan Habor, iate oinan laggai Gozan samba laggaira tai Madai.

⁷ Aipuaili nenda, kalulut amajongan tai Israel katubut Tuhan, Taikamanuanda sibelaake sia ka laggai Misir ka bagat kupkumen Parao, rimata Misir samba leu kalulut rapanindogi taikamanua bagei

⁸ samba ratutake katukelat bangsa sikeklet Tuhan kateteret arasaggangi bangsa nenda. Bangsa Israel masitut katukelat siteuakenenda tai rimata Israel,

⁹ samba ragalaiake leu sitaimateu ka matat Tuhan, Taikamanuanda. Ragalai kudduat pasibuluat sabulungan ka sangamberi laggaira, ka laggai sigoiso samba leu ka laggai sabeu.

¹⁰ Ka senen leleu samba leu ka tei loina sabeu, rioakerangan leu tugutugu sabulungan samba leu tularat Dewi Asyera.

¹¹ Laborangan leu sedda sangamberi buluakenen ka sabulungan, kele katukelatda tai bangsa sikeklet Tuhan ka laggai Kanaan. Galaiakerangan sikatai bailiu pugolunangan si Tuhan katubutda.

¹² Panindourangan ka sabulungan, kenanen aikuangan si Tuhan katubutda kise “Bui nugalaiake kam kele kisedda!”

¹³ Aikoiniakean pakoiniet samba tai nabiNia ka paamian Israel samba ka tai Jehuda masikua patonekat nene “Ariake kam mugalai sikatai samba reddet kam sangamberi parenta samba surukat siakeKu ka taikebbukatmui samba ka tubumui sisegeakenenKu ka tai nabi sapaguguletKu.”

¹⁴ Tapoi ta arareddet tai Israel samba tai Jehuda. Makela le patuatda kele taikebbukatda sitaimatonem baga katubut Tuhan, Taikamanuanda.

¹⁵ Tai Israel samba tai Jehuda ta raoba masireddet parentat Tuhan samba ta mariuriu topitda ka palelengan sigalaiNia pasamba taikebbukatda. Ta' arapuletsei ngantomanNia, tapoi manindou le sia ka sabulungan sitapaluluat, bailiu tutakerangan bangsa-bangsa ka bebera, kenanen aikerangan sia si Tuhan.

¹⁶ Pasabaurangan sangamberi surukat Tuhan, Taikamanuanda, samba galairangan rua jaui sibara ka logam ibailiunia panindogietda. Galairangan tularat Dewi Asyera, panidourangan ka panyanyat samba Dewa Baal.

¹⁷ Panguruatakerangan tatogatda sibailiu buluakenen ka sabulungan. Pakeirangan tai kerei samba paguguletakerangan tubutda ragalaiake sikatai ka matat Tuhan, bailiu pugolunanngan si Tuhan katubutda.

¹⁸ Kalulut nenda pugolunangan simakope si Tuhan katubutda samba taipuletseinangan sia. Ribbaiakenangan sia ka polak sikauNia katubutda, sarat purimataat Jehudangan le amulegei.

¹⁹ Tai Jehuda leu ta arareddet surukat Tuhan, Taikamanunda, tapoi ratutake le siteuakenen sigalaira tai Israel,

²⁰ oto taisilonangan sangamberi muntogat Israel si Tuhan. Ukumnangan samba kaunangan sia ka tai saggakra sikatai, taipuletseinangan sia samba ribbaikenangan sia ka polak sikauNia katubutda.

²¹ Kateteret ailepa aipasaraake Israel ka tai Jehuda si Tuhan, uddetakerangan si Jerobeam tai Israel sibailiu rimatatda. Lepa geti ambitnangan tai Israel si Jerobeam masikaddiuake si Tuhan samba galairangan leu jo sabeu.

²² Kisedda rapurimanua tai Israel ratutake sangamberi jo kele sigalaiakenen Jerobeam samba mariuriu ragalaiakenia,

²³ bailiu kalepakatnia taipuletseinangan sia si Tuhan, tapoi riribbaiake le' sia ka polak sikauNia katubutda. Aipuaili nene kele siripot sikuaNia katubutda tai Israel sisegeakenenNia kai tai nabi. Ambitrangan tai Israel ka kudduat katuribbaiatda ka Asyur samba sedda te arakuddu pat aili kineneiget.

Tai Asyur mulaggai ka Israel

²⁴ Rimata Asyur masiambit tai Babel, Kuta, Awa, Hamat samba tai Sefarwaim, kaunangan sia mulaggai ka laggai Samaria sailitda tai Israel. Kudduijirangan laggai nenda samba pulaggairangan leu sedda.

²⁵ Kateteret panandaat arakuddu sedda ta masuru sia katubut Tuhan, iate lulunia aikau singa si Tuhan masimateiake piga sia katalagatda.

²⁶ Lepa segeakerangannia katubut rimata Asyur “Bangsa-bangsa sitangsiakenennu samba sikoniakenennu masikudduiji laggai Samaria ta raagai surukat manindou ka Taikamanuan laggai nenda, iate lulunia aiake singa katalagatda masimateiake sia.

²⁷ Kalulut nenda rimata Asyur masiparentaake bule sara imam katalagatda siribbaiakenen ka Asyur mei ka Samaria. Kuanangan rimata, “Koiniake kamnia itoili samba ikuddu sedda bule igelaiake sia pagalaiat surukat Taikamanua laggai nenda.”

²⁸ Iageti sara katalagat imam Israel siambitda ka Asyur, toili samba kuddunia ka Betel. Gelaiakenangan sia kipa bulat enungan manindou katubut Tuhan.

²⁹ Tapoi sirimanua sikuddu ka Samaria mariuriu ragalai buluatda samba kaurangannia ka uma pasibuluat sigalaira tai Israel, sikukuddu siboiki ka laggai nenda. Senesenenda masigalai buluatda ka laggaira.

³⁰ Tai Babel masigalai tularat Dewa Sukot-Benot, tai Kuta masigalai tularat Nergal, tai Hamat masigalai tularat Asima,

³¹ tai Awa masigalai tularat Nibhas samba Tartak samba tai Sefarwaim masipanguruatake tatogatda sibailiu buluakenen katubut Dewa Adramelekh samba Anamelekh.

³² Airapaninindogi sabulungan, sia leu et manindou kai Tuhan. Pilirangan katalagatda sibailiu imam sipanguruatake buluakenen ka uman sabulungan.

³³ Oto, manindou sia katubut Tuhan samba manindou leu et sia ka sabulunganda, kele siripot katukelat laggai kabaraiatda.

³⁴ Teret aili kineneiget aipeile raenungake kele siripot katukelatda siburu. Ta anai sia maninindou katubut Tuhan samba leu ta mareddet sia ka surukat samba ka ngantomanNia sikauNia ka muntogat Jakob, oniakenenNia leu Israel.

³⁵ Aigalaian si Tuhan palelengan nene ka paamian Israel, “Bui nupanindogi kam taikamanua bagei, bui nureddet samba nusuru kam sia, ele masipanguruatake buluakenen katubutda.

³⁶ Suru kam Aku, Tuhan, sibelaake kam ka lagai Misir ka bagat gege sabeu, kau mareddet kam katubukku samba panguruatake kam buluakenen katubukKu.

³⁷ Kau mariuriu nureddet kam surukat samba tiboiet sinuratakenenKu katubumui. Bui nupanindou kam ka taikamanua bagei,

³⁸ bui nukalipogi kam palelengan sibaraakenenKu pasambamui.

³⁹ Kau mareddet ka katubukKu, Tuhan Taikamnuamui, iageti belaakekungan kam ka tai saggakmui.”

⁴⁰ Tapoi sipulalaggai ka Samaria ta raoba masiarepi, mariuriu le ragalaiake katukelatda siburu.

⁴¹ Oto, manindou sia katubut Tuhan, tapoi manindou leu sia ka sabulunganda. Teret aili kineneiget leu muntogatda aipeile ragagalaiake kele nenda.