2Rim. 16 - BUKO SIPUNENAN

Ahas rimata Israel

¹ Ka rura sikapulu pitu puparentaat Rimata Pekah togat Remalya ka Israel, si Ahas togat Jotam ibailiu rimata ka Jehuda.

² Kateteret nenda rua pulu ngarura beunannia aibailiunia rimata samba pulu enem ngarura burunia aipuparenta ka Jerusalem. Ta' aitutake simaeru kele sigalaiakenen Rimata David, taikebbukatnia, tapoi aigalaiake le sitaiobaket bagat Tuhan, Taikamanuania.

³ Purimanuanangan kele galai tubutda tai rimata Israel, pat panguruatakenangan togania sibailiu buluakenen ka sabulungan, kele katukelat sikatai galaiakenenda sirimanua sikeklet Tuhan ka laggai Kanaan kateteret araguruki laggai nenda tai Israel.

⁴ Si Ahas masipanguruatake buluakenen samba masilabo kumanyang ka senen kudduat pasibuluat sabulungan ka leleu samba tei loina sabeu buttet.

⁵ Kateteret nenda saggangirangan Jerusalem Rimata Rezin, rimata Siria samba si Pekah togat Remalya, rimata Israel. Alourangan si Ahas, tapoi ta amoi arakalaakenia.

⁶ Kateteret nenda si Rezin, rimata Siria, masitoiliake laggai Elat katubut rimata Edom, lepa keklenangan tai Jehuda ka laggai Elat. Iageti oi tai Edom ka laggai Elat pulaggairangan sedda pat aili kineneiget.

⁷ Koiniakenangan pakoiniet si Ahas ka Tiglat-Pileser rimata Asyur, masikua, “Aku nene paguguletnu samba togam. Konan samba belaake aku ka kabei rimata Siria samba ka kabeira tai Israel siooi masisaggangi aku.”

⁸ Alanangan perak samba mas si Ahas ka Uman Tuhan samba leu pukayoat uma purimataat, lepa kaunangannia kai rimata Asyur sibailiu panguruat.

⁹ Iageti kaunangan rimata Tiglet-Pileser siripot sinindou Ahas, lepa sagganginangan samba alanangan laggai Damaskus. Ambitnangan leu sipulalagggai sedda sibailiu tangsiakenen ka Kir samba leu mateiakenangan rimata Rezin.

¹⁰ Katetere Rimata Ahas mei ka Damaskus masiailiake Rimata Tiglat-Pileser, itconangan kudduat pasibuluat ka laggai nenda. Lepa kaunangan kai Imam Uria ka Jerusalem kirekat tubut kudduat pasibuluat nenda bulat siripot kirekatnia.

¹¹ Iageti rioakenangan sara kudduat pasibuluat kele kirekat sisilonia samba lepaakenangannia kepei toili si Ahas barania ka Damaskus.

¹² Kele aisege barania ka Damaskus, itsonangan alepaan kudduat pasibuluat nenda.

¹³ Lepa panguruatakenangan tarimeu, gandum samba leu piliakenangan leu logau tarimeu buluakenen paabanan ka uddut kudduat pasibuluat nenda.

¹⁴ Itsonangannia si Ahas kudduat pasibuluat sibara ka perunggu sikokoiakenen kai Tuhan kudduatnia ai ka talagat Uman Tuhan samba kudduat pasibuluat sibau. Kalulut nenda kudduat pasibuluat sibau nenda kaurangannia ka matat Uman Tuhan ka saigit bare meja sibau nenda.

¹⁵ Iageti koiniakenangan si Uria si Ahas, “Laboan buluakenen rarangen simansep samba buluakenen pusurakat kasoibokat ka uddut kudduat pasibuluat sabeu nenda samba leu buluakenen rarangen samba buluakenen pusurakat rimata samba leu logau buluakenen ka sapaamian. Piliakenungan leu logau buluakenen rarangen samba sangamberi logau buluakenen jajaket, tapoi kudduat pasibuluat siburu sibara ka perunggu nenda aku le masipakei bule kutiddou enungan ka sangamberi ketsat.”

¹⁶ Lepa galaiakenangannia si Uria kele siripot sikuat rimata.

¹⁷ Lepa nenda ragatnangan si Ahas kereta-kereta perunggu pakeiet ka Uman Tuhan samba pagolonginangan lalaisu ka kereta-kereta nenda. Mangkok perunggu sabeu sikuddu ka teitei sipulurua ngamuneng jaui perunggu nenda alanangan leu et nia samba galakakenanngannia ka uddut kalak bukku.

¹⁸ Iageti kalulut rimata Asyur, ragatnangan pulaibokat rimata ka Uman Tuhan samba patpatakenangan matat baliu gugurukat sikokoiakenen kai rimata.

¹⁹ Pumumuan bagei pagalaiat Rimata Ahas samba sangamberi sigalaiakennia tusuratake ka Buko Pumumuan Rimata Jehuda.

²⁰ Iageti matei si Ahas samba rateiakerangannia ka bebera taikebbukatnnia ka laggai David. Iageti bailiunangan rimata si Hizkia togania masisailiakenia.