2Rim. 15 - BUKO SIPUNENAN

Azarya rimata Jehuda

¹ Ka rura sikarua pulu pitu ngarura burunia puparentaat Rimata Jerobeam II ka Israel, bailiunangan si Uzia togat Amazia rimata Jehuda

² Kateteret nenda rurania pulu enem aibailiunia rimata samba lima pulu rua ngarura burunia aipuparenta ka Jerusalem. Onin inania iate Jehhoya sibara ka Jerusalem

³ Galaiakenangan simaeru ka matat Taikamanua, kele siripot sigalaiakenen Amazia, ukkuinia.

⁴ Tapoi kenanen kisedda, ta aipakatai kudduat pasibuluat sabulungan, bailiu bangsa Israel mariuriu peile rapanguruatake buluakenen samba masilabo kumanyang ka kudduat nenda.

⁵ Iageti kaunangan besit kulit simakope katubunia si Tuhan, bailiu bara bokbongnia pat mateinia samba kalulut taimamalet besinia kaurangannia ka sara lalep ka simatangeu. Iageti uteakenangan uma purimataat si Jotam, togania samba galaiakenangan puparentaat ka laggai nenda.

⁶ Pumumuan bagei pagalaiat Rimata Amazia tusuratake ka Pumumuan Rimata Jehuda.

⁷ Iageti matei si Amazia samba rateiakerangannia ka rateira tai rimata ka laggai David. Bailiunangan rimata si Jotam, togania, masisailiakenia.

Zakharia rimata Israel

⁸ Ka rura sikatelu pulubalu puparentaat Azarya, rimata Jehuda, bailiunangan rimata si Zakharia, togat Jerobeam ka Israel samba puparentanangan ka Samaria enem ngalaggo burunia.

⁹ Si Zakharia masigalaiake sikatai ka matat Tuhan kele sigalaiakenenda taikebbukatnia. Ta' aiareuake tubunia ka jot Jerobeam togat Nebat, sikau ramajo leu et ka sia tai Israel.

¹⁰ Si Salum togat Jabesh masigalai sara pukerekat baga masilawan Rimara Zakharia, masimateiakenia ka Jibleam, lepa bailiunangannia rimata masisailiakenia.

¹¹ Pumumuan bagei pagalaiat Zakharia, tusuratake ka Buko Pumumuan Rimata Israel.

¹² Kisedda te ipuaili kele sikuat Tuhan katubut rimata Jehu “Tatogam pat aili reddenan sikaepat muririmata te sia ka kudduat purimataat Israel!”

Salum rimata Israel

¹³ Ka rura sikatelu pulusiba puparentaat Rimata Uzia, rimata Jehuda, bailiunangan rimata si Salum, togat Jebesh ka Israel. Puparentanangan ka Samaria sangalaggo burunia.

¹⁴ Iageti ei si Menahem togat Gadi ka Tirza ka Samaria, lepa mateiakenangan si Salum samba bailiunangannia rimata masisailiakenia.

¹⁵ Pumumuan bagei pagalaiat Salum samba pukerekat baga sigalaiakenenia, tusuratake ka Buko Pagalaiat Rimata Israel.

¹⁶ Kateteret nenda, barania ka Tirza, subuakenangan si Menahem laggai Tifsah samba sangamberi sirimanua samba leu laggaira, kalulut ta'arabukaake matat baliu laggaira samba sausaunangan leu balugura tainanalep sipususuruket.

Menahem rimata Israel

¹⁷ Ka rura sikatelu pulu siba puparentaat Rimata Azarya rimata Jehuda, bailiunangan rimata si Menahem togat Gadi ka Israel. Puparetanangan pulu ngarura burunia ka Samaria.

¹⁸ Burut purimanuaiatnia majonia kai Tuhan kalulut ituake katai Rimata Jerobeam I, sikau tai Israel mujo

¹⁹ Kateteret aisaggangi Israel si Pul, rimata Asyur, kaunangan si Menahem kai Pul telu pulu epat ribu kilo perak bule iropake masiparon purimataat Menahem ka Israel.

²⁰ Enungan aibaraake bulagat nene si Menahem iate itiddou sibesiakenen katubutda senen simakayo ka Israel lima pulu bulagat perak senen sara sirimanua. Lepa geti kaddiuakenangan laggai nenda rimata Asyur samba toilinia ka laggainia.

²¹ Pumumuan bagei pagalaiat Rimata Menahem tusuratake ka Buko Pumumuan Rimata Israel.

²² Iageti mateinia samba rateiakerangannia, lepa bailiunangan rimata si Pekahya, togania, masisailiakenia.

Pekahya rimata Israel

²³ Ka rura sikalima pulu puparentaat Rimata Azarya, rimata Jehuda, bailiunangan rimata si Pekahya togat Menahem ka Israel samba puparentanangan ka Samaria rua ngarura burunia.

²⁴ Majonia ka matat Tuhan kalulut itutake katai Rimata Jerobeam I, siabbit tai Israel ka bagat jo.

²⁵ Lepa geti sara sautet saladdunia iate si Pekah togat Remalya, masibaraake pukerekat baga masilawannia samba masimateiakenia ka Samaria ka sara kudduat ka uma purimataat rimata. Mateiakerangan si Pekahya sambatda si Argob samba si Arye. Iageti bailiunangan rimata si Pekah nasisailiakenia.

²⁶ Pumumuan bagei pagalaiat Pekahya samba sangamberi sigalaiakenennia tusuratake ka Buko Pumumuan Rimata Israel.

Pekah rimata Israel

²⁷ Ka rura sika lima pulu puparentaat Azarya, rimata Jehuda, bailiunangan rimata Israel si Pekah togat Remalya ka Samaria. Puparentanangan rua pulu ngarura burunia.

²⁸ Majonia ka matat Tuhan kalulut itutake katai Rimata Jerobeam I siabbit tai Israel ka bagat jo.

²⁹ Kateteret puparentaat Pekah, si Tiglat-Pileser rimata Asyur masiala laggai Iyon, Abel-Bet-Maakha, Jenoah, Kedes, Hazor, laggai Gilead, Galilea samba Naftali samba ambitrangan leu sipulalaggai ka sangamberi laggai nene ka Asyur sibailiu tangsiakenen.

³⁰ Ka rura sikarua pulu puparentaat Rimata Jotam togat Uzia ka Jehuda, baraakenangan pukerekat baga si Hosea masilawan si Pekah togat Remalya. Mateiakenangannia, iageti bailiunangannia rimata masisailiakenia.

³¹ Pumumuan bagei pagalaiat Rimata Pekah tusuratake ka Buko Pumumuan Rimata Israel.

Jotam rimata Israel

³² Ka rura sikarua puparentaat Rimata Pekah togat Remalya ka Israel, bailiunangan rimata si Jotam togat Uzia ka Jehuda.

³³ Kateteret nenda rua pulu lima ngarura beunannia aibailiunia rimata samba puparentanangan ka Jerusalem pulu enem ngarura burunia. Inania iate si Jerusa togat Zadok.

³⁴ Si Jotam masigalaiake simaeru ka matat Tuhan kele si Uzia ukkuinia.

³⁵ Tapoi kenanen kisedda, ta aipakatai kudduat pasibuluat sabulungan bailiu mariuriu peile rapanguruatake buluakenen samba masilabo kumanyang sapaamian Isreal ka kudduat nenda. Si Jotam te amasigalai Matat Baliu saigit ka bare ka Uman Tuhan.

³⁶ Pumumuan bagei pagalaiat Rimata Jotam samba sangamberi sigalaiakennenia tusuratake ka Buko Pumumuan Rimata Jehuda.

³⁷ Barania ka gogoi nenda si Tuhan masikoiniake si Rezin, rimata Siria samba si Pekah rimata Israel masisaggangi Jehuda.

³⁸ Iageti matei si Jotam samba reteiakerangannia ka rateira tai rimata ka laggai David. Si Ahas togania ibailiu rimata masisailiakenia.