2Rim. 14 - BUKO SIPUNENAN

Amazia rimata Jehuda

¹ Ka rura sikarua kateteret puparentaat Joas togat Joahas ka Israel, si Amazia togat Joas ibailiu rimata Jehuda.

² Rurania rua pulu lima kateteret aibailiunia rimata samba rua pulu siba ngarura burunia aipuparenta ka Jerusalem. Onin inania iate Joadan sibara ka Jerusalem.

³ Si Amazia masigalaiake simaeru ka matat Tuhan, tapoi ta kele si David, taikebbukatnia. Makere sigalaiakenen ukkuinia.

⁴ Kenanen kisedda, ta aipakatai pasibuluijiat sabulungan, bailiu sarakyat mariuriu rapanguruatake buluakenen samba ralabo kumanyang sedda.

⁵ Kele aimaron puparentaatnia si Amazia, mateiakenangan tai pegawainia simateiake ukkuinia.

⁶ Tapoi tatogatda tai pegawainia nenda tai' aimareiake sia, kalulut aireddet tiboiet Tuhan ka bagat Surukat Mose, sipasikua kise, “Bui' numateiake saukkui kalulut pukakatai sigalaiakenenda tatogatda, samba bui' numateiake tatoga kalulut pukakatai sigalaiakenenda saukkuira. Senen sirimanua momoi tuukumake sia kalulut sigalaiakenenda sikatai.”

⁷ Ka sara pasaggangan, si Amazia masimateiake pulu ngaribu saladdutda tai Edom ka Lembah Asin samba alanangan leu laggai Sela. Oniakenangan laggai nenda iate Jokteel. Teret kineneiget Jokteel peile onin laggai nenda.

⁸ Iageti koiniakenangan sara pakoinien si Amazia katubut rimata Joas rimata Israel, isegeake bule rapasaggak.

⁹ Tapoi si Joas masikau alegiat kele nene, “Puo simarui ka leleu Libanon masikau patonekat katubut loina cemara ka leleu Libanon, “Ale loina cemara, kau togam siokko katubut togaku simanteu ibailiu sinanalepnia.” Tapoi tusabaunanngan sedda sangamuneng tarimeu sikuddu ka leleu, paperakinangan puo simarui nenda.

¹⁰ Kirenangan anukalaakean Edom, iate lulunia imabubuak patuatnu. Teret seddangan te puaabeunu samba kuddungan ka lalepnu. Apangan le lulunia nugagaba pugejaat baga, sibaraake kamateiatnu samba rakyatnu?

¹¹ Tapoi si Amazia ta aipuletsei ngangan Joas rimata Israel. Kalulut nenda, Rimata Joas samba saladdunia mei sia ka Bet-Semes ka Jehuda samba saggangirangan si Amazia sedda.

¹² Kalaakerangan saladdut Jehuda samba sangamberi saladdutda putuituirangan samba toili sia ka lalepda.

¹³ Labanangan si Amazia si Joas ka Bet-Semes. Lepa ei si Joas ka Jerusalem bukkatakenangan irip laggai Jerusalem barania ka Matat Baliu Efraim pat aili ka Matat Baliu Sudut, epatngotu eto nantania.

¹⁴ Lepa nenda alanangan mas samba perak samba sangamberi bibilet sibabara ka uman Tuhan samba leu pukayoat ka uma purimataat, samba piga pa sia tangsiakenen ambitnangan leu sia si Joas ka Samaria.

¹⁵ Pumumuan bagei pagalaiat si Joas samba sigalaiakenennia samba leu gegenia aisaggangi si Amazia rimata Jehuda atusuratakean ka buko Pagalaiat Rimata-rimata Israel.

¹⁶ Iageti matei si Joas samba rateiakerangannia ka rateira tai rimata ka Samaria. Bailiunangan leu togania si Jerobeam rimata masisailiakenia.

¹⁷ Kele aimatei si Joas rimata Israel, amurimanua peile si Amazia rimata Jehuda pulu lima ngarura burunia.

¹⁸ Pumumuan bagei pagalaiat si Amazia atusuratakean sangamberinia ka buko pagalaiat tai rimata Jehuda.

¹⁹ Baraakerangan sara pukerekat baga sirimanua sikuddu ka Jerusalem masimateiake si Amazia. Iate lulunia aituitui ka Lakhis. Tapoi koiniakerangan sia rakukrunia ka Lakhis, lepa mateiakerangannia sedda.

²⁰ Ambitrangannia pasamba kuro, lepa rateiakerangannia ka bebet taikebbukatnia ka laggai David.

²¹ Iageti sangamberi bangsa Jehuda masirioake si Azarya sipururura pulu enem sibailiu rimata masisailiake si Amazia, ukkunia.

²² Kele aimatei ukkuinia, alanangan minca laggai Elat si Uzia samba paerunangannia.

Jerobeam II rimata Israel

²³ Kabagat rura sikapulu lima puparentaat Amazia, togat Joas, rimata Jehuda, si Jerobeam, togat Joas ibailiu rimata ka Samaria. Puparentanangan epat pulu sara ngarura burunia.

²⁴ Galainangan jo ka matat Tuhan, kalulut itutake jot Rimata Jerobeam I siabbit tai Israel kabagat jo.

²⁵ Toiliakenangan laggai Israel, barania ka enungan gugurukat ka Hamat pat aili ka Koat Araba kele sikuat Tuhan, Taikamauan Israel sikuaNia ka paguguletNia nabi Jona togat Amitai sibara ka Gat-Hefer.

²⁶ Kalulut aiitcoan poi si Tuhan kopet beunannia pangoringanda tai Israel samba ta'anai sia berisara siromake sia.

²⁷ Tapoi ta'anai pinatunia si Tuhan masitataake onin Israel ka polak, oto romakenangan sia melalui Rimata Jerobeam II.

²⁸ Pumumuan bagei pagalaiat Jerobeam samba sangamberi sigalainia samba gegenia ka pasaggangan samba kipa aitoiliake laggai Damsyik samba Hamat-Jehuda ka Israel, atusuratakean ka buko pagalaiat tai rimata Israel.

²⁹ Iageti matei si Jerobeam II samba rateiarangannia ka kudduat rateira tai rimata. Iageti bailiunangan si Zakharia rimata masisailiake ukkuinia si Jerobeam II.