2Rim. 13 - BUKO SIPUNENAN

Joahas rimata Israel

¹ Ka rura si karua pulu telunia puparentaat Joas togat Ahazia ka Jehuda, si Joas, togat Jehu, ibailiu rimata ka Israel samba puparentananngan ka Samaria pulu pitu ngarura burunia.

² Kele Rimata Jerobeam sipupaparenta siboiki kepeinia, si Joahas masigalai jo katubut Tuhan samba sibaraake ramajo leu ka sia tai Israel. Ta' aikaddiuake paraboatnia sikatai.

³ Kalulut nenda pugolunangan si Tuhan ka tai Israel, kaunangan sia kai Rimata Hazael, rimata Siria samba kai Benhadad, togania, ka burunia nenda.

⁴ Lepa panindounangan si Joahas katubut Tuhan, samba arepinangan si Tuhan panindogatnia, kalulut aiitcoat si Tuhan kopenia rimata Siria ipaoreiji tai Israel.

⁵ Kaunangan si Tuhan sara siuteake tai Israel sibelaake sia ka kupkumen Siria, bailiu masanangrangan murimanua kele siboiki.

⁶ Kenanen kisedda ta raariake mugalai jo tai Israel kele jo sigalaiakenen Rimata Jerobeam. Mariuriu ragalaiake jo samba raobaake ipukuddu simariuriu patung Dewi Asyera ka Samaria.

⁷ Kalulut ta'anai saladdu sipulelegei katubut Joahas, sarat lima pulu sia saladdu sipukukuro le samba pulu kereta pasaggak samba pulu ribu sia saladdu, kalulut aimateiakean sia rimata Siria.

⁸ Pumumuan bagei pagalaiat Rimata Joahas samba sangamberi gegenia pasaggak atusuratnakean ka bagat buko Pagalaiat tai Rimata Israel.

⁹ Iageti matei si Joahas samba rateiakerangannia ka Samaria. Oto bailiunangan rimata si Joas, togania, masisailiakenia.

Joas rimata Israel

¹⁰ Ka rura sikatelu pulu pitu puparentaat Rimata Joas ka Jehuda, si Joas togat Joahas ibailiu rimata Israel samba puparentanangan ka Samaria pulu enem ngarura burunia.

¹¹ Si Joas leu et masigalai jo katubut Tuhan kalulut itutnake pukakatai Rimata Jerobeam sikau tai Israel masigalai jo.

¹² Pumumuan bagei pagalaiat Rimata Joas samba leu gegenia ka bagat pasaggangan masilawan si Amazia rimata Jehuda, atusuratnakean ka bagat buko Pagalaiat tai Rimata Israel.

¹³ Iageti matei si Joas samba rateiakerangannia ka Samaria. Bailiunangan rimata si Jerobeam II, togat Joas, masisailiakenia.

Kamateiat Elisa

¹⁴ Ka sara tetere bara besit Elisa simakope, samba ei leu Rimata Joas masibalounia.

¹⁵ Kuanangan si Elisa katubunia, “Ala rourou samba silogui!” Lepa alanangannia si Joas.

¹⁶ Iageti koiniakenangannia si Elisa ipatarek tubunia rimata masipana. Patareknangan tubunia Rimata, samba galakakenangan kabeinia ka uddut kabei rimata,

¹⁷ samba kuanangan si Elisa, “Bukaake jandela simattai ka Siria!” Kele aibukaakenia rimata, kuanangan si Elisa, “Panaakean!” Lepa panaakenangan silogui nenda rimata. Iageti kuanangan si Elisa, “Iate silogui kamanangan sibara kai Tuhan, silogui kamananganmui katubutda tai Siria. Nukakalaake te Siria ka Afek pat sappru sia.”

¹⁸ Lepa nenda kuanangan si Elisa, “Ala silogui nenda!” Kele aialania rimata, kuanangan si Elisa katubut rimata, “Bo'boake ka polak!” Bo'boakenangannia rimata ka polak telu ngaminca, lepa puarinangan.

¹⁹ Tapoi pugolunangnan si Elisa, samba kuanangannia, “Siripokatnia teret lima ele enem ngaminca le nubo'boakenia, oto kisedda te ioi nusubuake bangsa Siria. Tapoi kineneiget, telu ngaminca le nukalaake Siria.”

²⁰ Lepa nenda matei si Elisa samba rateiakerangannia. Kateteret nenda senen rura mungkuatda tai Moab rasaggangi tai Israel.

²¹ Ka sara tetere airarateiake simamatei, sinulut itsorangan sioi mungkuatda tai Moab, ribbaiakerangan simamatei nenda ka bagat ratei Elisa, lepa putuituirangan. Kele aisappo tubut sirimanua simamatei nenda tolat Elisa, purimanuanangan samba purionangan.

Pasagganganda tai Israel samba Siria

²² Kasanganantat puparentaat Joas, si Hazael rimata Siria masipaoreiji tai Israel.

²³ Tapoi si Tuhan manuntu bagaNia ka paamianNia samba iappeake le jotda. Ta' iobaake tusubuake sia, tapoi iropake le sia kalulut palelenganNia pasamba si Abraham, Ishak samba Jakob. Teret aili kineneiget ta ikakalipogi paamianNia.

²⁴ Iageti matei si Hazael, rimata Siria, samba si Benhadad, togania, ibailiu rimata.

²⁵ Lepa si Joahas masioppu minca palaggai-laggai kakabei Benhadad togat Hazael sioppunia ka bagat pasagangan kakabei Joahas, ukkui Joas. Telu ngaminca aikalaakenia si Joas samba alanangan minca laggai-laggai Israel.