2Rim. 12 - BUKO SIPUNENAN

Joas rimata Jehuda

¹ Ka rura sikapitunia puparentaat Jehu ka Israel, si Joas ibailiu rimata Jehuda, samba epat pulu ngarura burunia aipuparenta ka Jerusalem. Onin inania iate Zibya, sibara ka laggai Bersyeba.

² Kalulut gegelaiakena si Joas si Joyada, bailiu galaiakenangan simaeru si Joas ka sanganantat purimanuaiatnia.

³ Tapoi kenanen kisedda, ta aisubuake kudduat pasibuluat sabulungan, bailiu bangsa nenda aipeile rapangunguruatnake buluakenen samba kumanyang ka kudduat nenda.

⁴ Ka sara gogoi sogainangan tai imam si Joas samba koiniakenangan sia rakoiri bulagat panguruat sipanguruatnakenen ka Uman Tuhan, bulagat pasilului pasigagalai buluakenen samba leu siake sibara ka teu baga.

⁵ Senen tai imam buita rapasikeli bulagat sipanguruatnakenenda sirimanua pasikelietda. Bulagat nenda tupakeinia masipaeru simakakatai ka Uman Tuhan.

⁶ Tapoi kabagat rua pulu telu ngarura puparentaat rimata Joas, ta'pei leu arapaeru simakakatai ka Uman Tuhan nenda tai imam.

⁷ Kalulut nenda sogainangan imam Joyada samba tai imam sabagei si Joas, samba kuanangan, “Angoi ta'pei anupaeru kam Uman Tuhan” Barania kineneiget ta momoi nukoiri kam bulagat sisilomui. Sangamberinia buita tupakei masipaeru Uman Tuhan.”

⁸ Obarangannia tai imam ta itururuake bulagat sibara ka sarakyat, samba ta'an rapaeeru simakakatai ka Uman Tuhan.

⁹ Iageti alanangan sara peti si Joyada, galainangan sara lobok ka takkenia, lepa galakngakenangannia ka bebet kudduat pasibuluat saigit kai kattoet matat baliu Uman Tuhan. Sangamberi bulagat sipanguruatnakenen ka Uman Tuhan, kauarangannia tai imam sipugagalai ka matat baliu gugurukat ka bagat peti nenda.

¹⁰ Ke raitco amaigingan bulagat ka bagat peti nenda, iageti oi sekretaris rimata pasamba Imam Agung masiadde bulagat nenda samba tabunakerangannia.

¹¹ Kaurangan bulagat nenda kele igit siteuakenen katubutda sipugagalai siuddetnakenen sipasikeli Uman Tuhan, samba sia nene masikau katubutda sipasigagalai loina, siagai masigalai lalep sipasigagalai Uman Tuhan,

¹² ka tai siagaikabei mugalai bukku samba ka siagai masigalai tularat ka bukku. Sakirangan leu loina samba bukku sibara tularat, samba leu belaakerangan bulagat nenda simakolou itupakei masiperu Uman Tuhan.

¹³ Ta' atupakei bulagat nenda beri goiso masigalai pulokat perak, mangkok, trompet, alito ele galajet pakeiet bagei sibara ka mas.

¹⁴ Tapoi sangamberinia arakau le katubutda sipugagalai bule tupakei masipaeru Uman Tuhan.

¹⁵ Sipasijajago pugagalai nenda bulat makolou galajetda, oto ta tutitiddou rakolouake pagalaiat pubulaganan sisilora.

¹⁶ Tapoi bulagat sibara ka buluakenen pasitebui sele samba pasiappet jo ta arakau ka bagat peti nenda, sangamberinia nenda iate rubeiatda tai imam.

¹⁷ Kateteret nenda sagganginangan samba kudduijinangan laggai Gat si Hazael, rimata Siria. Iageti bara leu patuatnia masisaggangi Jerusalem.

¹⁸ Tapoi si Joas, rimata Jehuda, masiala sangamberi panguruat sipunenanakenenda tai kebbukatnia iate si Josafat, Joram samba si Ahazia, samba leu sipanguruatnakennia samba mas sikuddu ka bagat pubulaganan Uman Tuhan samba ka uma purimataat. Kaunangan sangamberinia nenda kai Hazael, rimata Siria, bailiu taipuriuriunangan isaggangi Jerusalem si Hazael.

¹⁹ Pumumuan bagei pagalaiat si Joas samba sangamberi sigalainia atusuratnakean ka bagat buko pagalaiat tai rimata Jehuda.

²⁰ Iageti bara pukerekat bagatda sipugagalai ka uma purimataat Jehuda masilawan Rimata Joas.

²¹ Rua katalagatda nenda iate si Jozakar togat Simeat samba si Jozabad togat Somer, masimateiake si Joas ka sara lalep sikuddu ka uddut polak sitabbui saigit ka belayat sulu Jerusalem, ka enungan katuluttunan ka Sila. Lepa rateiakerangannia ka bebera taikebbukatnia ka laggai David. Oto si Amazia, togania, ibailiu rimata masisailiakenia.