2Rim. 11 - BUKO SIPUNENAN

Ratu Atalya sibara ka Jehuda

¹ Kele aiagainia si Atalya kamamatei Rimata Ahazia, togania, parentaakenangan bule tumateiake sangamberi muntogat Ahazia.

² Tapoi si Joseba, togat rimata Joram sinanalep, maniu Ahazia masiala si Joas togat Ahazia, nangkounangannia katalagatda tatogat rimata mateiakenenda nenda, guruakerangan sia ruatda sipasikelinia ka sara bilik pereman, bailiu ta aramateiakenia.

³ Enem ngarura burunia aipasikeli toga nenda si Joseba ka bagat Uman Tuhan kateteret puparentaat Atalya sibailiu ratu.

⁴ Ka rura sikapitunia, Imam Joyada masisogai saute saladdu sipasijajago ratu samba sipasijajago uma purimataat bule raoi rapaaili ka Uman Tuhan. Koiniakenanngan sia musuppa bule ragalaiake sipinatunia. Koinongakenangan si Joas, togat Rimata Ahazia, katubutda.

⁵ Lepa nenda parentaakenangan sia, “Ke mujago kam ka gogoi Sabat, sepertelu ka igimui nene buita mujago ka uma purimataat,

⁶ sepertelu leu ka matat baliu Sur, samba legeinia ka matat baliu ka teiteira sipasijajago sabagei

⁷ samba ka rua rubeiatmui, iate sangamberi sipujajago sene ka gogoi Sabat samba mujago ka uman Tuhan masijago Rimata Joas.

⁸ Kaipa iei buita nujago kamnia, samba kasei masilegreake tubu katubumui buita numateiake kam sia.”

⁹ Galaiakerangan leu et nia sautet saladdu nenda kele sikuat imam Joyada. Sene-senenda masiabbit anak buatda silelepa mujago ka gogoi Sabat sambatda sipujajago ka gogoi nenda, lepa ei sia kai imam Joyada.

¹⁰ Kaunangan sosoat si Joyada katubutda sautet saladdu samba korabbit rimata David sikukuddu ka uman Tuhan.

¹¹ Iageti sene-senenda sipujajago nenda ei sia ka kudduatda ka sangaliot matat Uman Tuhan masijago rimata.

¹² Lepa nenda abbitnangan si Joas ka uja si Joyada, lepa kaunangan kirit purimataat ka utenia samba kaunangan leu surukat Taikamanua katubunia. Sukatnakerangannia ibailiu rimata samba sogaakerangan leu, “Murimanua le rimata!”

¹³ Kele aiarep si Atalya sogatda sipasijago samba sarakyat, olaakenangan iei ka Uman Tuhan.

¹⁴ Itconangan rimata sibau ainia muririo ka matat baliu Uman Tuhan ka kudduat aitusukatnakenia, ai sia kabebenia sautet saladdu samba leu sipasinanauke trompet. Pusogarangan sarakyat ka bagat angkat baga samba leu airananauake trompet. Iageti biritnakenangan leppeinia si Atalya samba kuanangan, “Sipatataju, sipatataju!”

¹⁵ Tapoi si Joyada ta aiobaake tumateiake si Atalya ka bebet Uman Tuhan, oto kuanangan ka sautet saladdu, “Abbit kamnia ka uja ka mungkuat sipujajago samba mateiake kam sia kasei siropmakenia.”

¹⁶ Labarangannia, lepa abbitrangannia ka uma purimataat, mateiakerangannia ka matat baliu Gugurukat Kuda.

¹⁷ Iageti koiniakenangan Rimata Joas samba leu sarakyat si Joyada ragalai palelengan kai Tuhan, sia iate sibailiu paamian Tuhan. Koiniakenangan leu rimata masigalai palelengan ka sarakyat.

¹⁸ Lepa nenda guru' sarakyat ka uman Baal samba bukkatnakerangannia samba mateiakerangan leu si Matan, imam Baal, ka matat pasibuluat. Iageti koiniakenangan sipujajago si Joyada bule rajago Uman Tuhan.

¹⁹ Lepa sambatda sautet saladdu, sipasijajago rimata samba sipasijajago uma purimataat samba leu sangamberi sarakyat abbitrangan rimata barania ka Uman Tuhan, guru' sia ka uma purimataat masienungi matat baliu sipujajago, iageti kuddu rimata ka uddenan purimataat.

²⁰ Mangkanangan bagatda sarakyat samba masanangnangan laggai, amateian poi si Atalya aramateiakenia ka uma purimataat.

²¹ Kateteret pitu ngarurania si Joas aibailiunia rimata.