2Rim. 10 - BUKO SIPUNENAN

Si Jehu masisubuake keluargat Rimata Ahab

¹ Rimata Ahab ai pitu pulu sia tatogania taimanteu ka Samaria. Kalulut nenda galainangan surat si Jehu samba kaunangannia ka Samaria katubutda siabeu tiboi tubu ka laggai nenda samba ka sikebbukat laggai samba leu katubutda sipasikeli totogat Ahab, kise ngangan surat nenda:

² “Tatogat Ahab ai sia ka bagat pasikelatmui, samba ai kereta pasaggakmui, kuro, pamatei samba laggai sibara irip bukku. Kalulut nenda ke anusiloan kam surat nene,

³ pili kam sara simaeru katalagatda tatogat Ahab samba uddetnakemuiannia sibailiu rimata, lepa pasaggakmuian nujago kamnia.

⁴ Tapoi amaloto le sia simakope samba kuarangannia, “Beringan Rimata Joram samba Rimata Ahazia ta amoi arasagganginia, kipa ioi tasagganginia?”

⁵ Kalulut nenda siuteake uma purimataat, siuteake laggai, sikebbukat laggai samba leu sipasikeli tatogat Ahab masikau patonekat kai Jehu, kise ngangania: “Paguguletnu le kai samba sangamberi sikuam katubumai kugagalaiake kai, ta kuuddetnake kai kasei pa sibailiu rimata. Galaiakean simaeru siripot sipinatum.”

⁶ Iageti kaunangan surat minca si Jehu katubutda, kise ngangania, “Ke patadde kam katubukku samba noba kam masitut sikuaku, mateiake kam tatogat Ahab samba mansep kele tetere kineneiget abbit kam ute'ra katubukku ka Jizreel.” Sipitu pulu tatogat Rimata Ahab nenda ai sia katubutda sikebbukat laggai ka Samaria samba airagegelaiake sia.

⁷ Kele aisege surat Jehu katubutda, mateiakerangan sipitu pulu tatogat Ahab nenda sia sikebbukat laggai ka Samaria, lepa kaurangan ute'ra ka bagat karakjak samba kaurangannia kai Jehu ka Jizreel.

⁸ Kele arasegeake katubunia, koiniakenangan sia bule rapagalak simakolou ute nenda ibailiu rua ngarurukat ka matat baliu laggai, samba kuddu sedda teret simansep.

⁹ Mamansep peile bela si Jehu ka matat baliu laggai, lepa kuanangan katubutda siparururu sedda, “Ta' masele kam. Kirenangan aku le amasibaraake pukerekat baga masisaggangi samba masimateiake Rimata Joram, tapoi sangamberi sirimanua nene, ta aku amasimateiake sia.

¹⁰ Nene te toggaiatnia, muaaili te sangamberi sikuat Tuhan pagalaiat tatogat Ahab. Aigalaiakean si Tuhan sikuaNia kele sisegeakenenNia kai Elia, paguguletNia.”

¹¹ Iageti mateiakenangan sangamberi saepput Ahab sabagei si Jehu sikukuddu ka Jizreel samba sangamberi sipugagalai katubunia, sasuruaknia samba leu tai imamnia, ta anai beri sia sara aiobaake murimanua.

Kamateiatda saepput Rimata Ahazia

¹² Iageti kaddiuakenangan Jizreel si Jehu, lepa einia ka Samaria. Ka tengan enungan, ka kudduat oniakenen “Pulaggaiat Sipasijago tarimeu,”

¹³ ailinangan piga pa sia saepput Ahazia, rimata Jehuda. Lepa rerenangan sia, “Kasei kam nene?” Alegirangannia, “Kai nene iate saepput Ahazia, mei kai masibalou tatogat rimata samba tatogat Ratu Izebel.”

¹⁴ Kuanangan si Jehu, “Laba kam sia!” Lepa labarangan sia samba mateiakerangan sia ka bebet uggungan simagarak, sangamberitda epat pulu rua sia igitda, berisara sia amurimanua.

Kamateiatda sangamberi saepput Ahab

¹⁵ Kele aituitui sedda, ailinangan si Jonadab togat Rekhab sioi masiailiakenia. Kaunangan paroroiat katubunia samba kuananngan, “Ta' pa sisara patuat le sita? Noba leu masiropmake aku?” Aleginangannia si Jonadab, “Oo.” Kuanangannia si Jehu, “Ke kisedda, pasalam sita. Iageti pasalamrangan samba na'nanangannia si Jonadab itusakai ka keretania.

¹⁶ Kuanangan si Jehu, “Konan taei simakere, bule nuinco kipa ngamangku kai Tuhan.” Lepa tuitui sia simakere raei ka Samaria.

¹⁷ Kele aisege si Jehu ka Samaria, mateiakenangan sangamberi saepput Ahab, ta anai berisara sia amurimanua. Aipuaili sangamberinia nene kele sikuat Tuhan katubut Elia.

Tumateiake sipasibubuluiji sabulungan

¹⁸ Iageti ruruakenangan sangamberi rakyat si Jehu, lepa kuanangannia, “Rimata Ahab ta mangamangnia manindou katubut Baal, tapoi aku peile mangamang ka sia.

¹⁹ Kalulut nenda ruruake kam sangamberi nabi Baal samba sipasibubuluijinia samba leu tai imamnia, bui' ibara sara sitaiooi, aipoi kupangunguruatnake te buluakenen sabeu katubut Baal. Kasei ta moi bui' ta tumateiake.” Tapoi nene iate enungan Jehu le bule isubuake sangamberi sipanindogi Baal.

²⁰ Kuanangan minca si Jehu, “Teuake kam sara gogoi sikokoiakenen tupanindogi Baal!” Lepa teuakerangan gogoinia

²¹ samba segeakenangannia si Jehu ka sangaliot Israel. Kateteret nenda oi sia sangamberi sipanindogi Baal, ta'anai sia sitaiooi. Lepa guru' sia ka uman Baal samba masunnangan uma nenda barania ka mata pat aili ka teitei.

²² Iageti kuanangan si Jehu katubut sipasikeli leppei pakeiet panindou ka uma nenda, “Belaake leppei nenda samba kau katubutda senen sioi manidou katubut Baal!” Iageti belaakenangannia kaunangannia katubutda.

²³ Lepa nenda guru' si Jehu samba si Jonadab togat Rekhab ka bagat uman Baal, lepa kuanangan katubutda sangamberi sipanindogi Baal sedda, “Lelekngake kam simakolou, bule bui' ibara katalagamui sapagugulet Tuhan, tapoi bui' ta sarat sipanindogi Baal le.”

²⁴ Lepa guru si Jehu samba si Jonadab masipanguruatnake buluakenen katubut Baal. Aipagalakngan leu si Jehu balu pulu sia ka uja samba aikuangan katubutda: “Bui' ta numateiake kam sia sangamberitda nenda. Kasei siobaake mutuitui sara katalagatda, buita tumateiakenia.”

²⁵ Kele ailepa aipanguruatnake buluakenen si Jehu, kuanangan ka sipasijajago samba ka saute saladdu, “Guruake kam, mateiake kam sia sangamberitda. Bui' ibara sara katalagatda sibebela! Iageti guru sia mateiakerangan sia sangamberitda, lepa giritnakerangan tubut sirimanua simamatei nenda ka uja. Iageti guru' sia ka rubeiat ka baga ka uman Baal.

²⁶ Belaakerangan arigit pasibuluat uman Baal, lepa laborangannia.

²⁷ Bukkatnakerangan tularat Baal samba leu umania, lepa bailiuakerangan kudduat nenda kudduat pasiribbaiat pat aili teret kineneiget.

²⁸ Kisedda te aisubuake Baal si Jehu ka Israel.

²⁹ Sarat, si Jehu nene ta aireunanake tubunia ka jot Jerobeam togat Nebat, sibaraake ramajo leu et ka sia tai Israel iate jo pasibubuluiji togat jaui mas ka Betel samba leu ka Dan.

³⁰ Kuanangan si Tuhan kai Jehu, “Kalulut anugalaian poi simaeru ka mataKu, samba anugalaiakean ka keluargat Ahab kele siobat bagaKu, oto ibabailiu te tatogam rimata ka Israel teret redddenan sikaepat.”

³¹ Tapoi si Jehu ta mamuine patuatnia murimanua ka bagat surukat Tuhan, Taikamanuan Israel, ta aiareuake tubunia ka jot Jerobeam sibaraake ramajo leu et ka sia tai Israel.

³² Kateteret nenda taddaakenangan si Tuhan masipagoiso kupkumen laggai Israel. Kalulut aikupkumakean si Hazael sangaliot kupkumen Israel

³³ ka saigit kabelaiat sulu oinan Jordan samba leu sangaliot laggai Gilead, laggaira tai Gad, Ruben samba tai Manasye, barania ka Aroër ka bebet oinan Arnon, ka Gilead samba leu ka Basan.

³⁴ Pumumuan bagei pagalaiat si Jehu samba leu sigalaiakenennia samba gegenia pasaggak, tusuratnake ka buko Pumumuan pagalaiat Rimata-rimata Israel.

³⁵ Iageti matei si Jehu samba rateiakerangannia ka Samaria, lepa bailiunanngan rimata si Joahas, togania, masisailiakenia.

³⁶ Burunia aipuparenta si Jehu sibailiu rimata Israel ka Samaria iate rua pulu balu ngarura.