2Rim. 1 - BUKO SIPUNENAN

Si Elia samba Rimata Ahazia

¹ Kele aimatei si Ahab rimatatda tai Israel, taimereddetdrangan tai Moab katubutda tai Israel.

² Ka sara gogoi Rimata Ahazia sibara ka Israel belenia ka serambi ka rubeiat ka pata uma purimataatnia ka Samaria, bailiu bara besinia simakope. Lepa koiniakenangan sirimanua rarereake katubut Baal-Zebub, sabulunganda laggai Ekron ka Filistin, mamale leu pa nia ele ta.

³ Tapoi Malaikat Tuhan masikoiniake si Elia, nabi sibara ka Tisbe, mei masiailiake sirimanua sikoniakenen Rimata Ahazia bule ikua, “Ta' anai pa Taikamanua ka Israel, bailiu obamuian mei masitiddou enungan kai Baal-Zebub, sabulunganda sikuddu ka laggai Ekron?

⁴ Kua kam katubut Rimata, kise aikua si Tuhan, “Ta' mamale ekeu, tapoi mamatei le ekeu!” Kele ailepa aigalaiake parentat Tuhan si Elia,

⁵ toili sia sikoiniakenen nenda katubut rimata, lepa rerenangan sia rimata, “Angoi anutoili kam?”

⁶ Alegirangannia, “Amoi sara simanteu masiailiake kai samba koiniakenangan kutoili kai bule kukua kai katubut Tuan. Kisene aikua si Tuhan katubut Tuan, “Ta' anai pa Taikamanua ka Israel, bailiu koiniakenungan tutiddou enungan katubut Baal-Zebub, sabulunganda laggai Ekron? Ta' mamale ekeu, tapoi mamatei le ekeu!”

⁷ Rerenangan sia rimata, “Kipa putubuatnia sirimanua nenda?”

⁸ Alegirangannia, “Sipuleleppei bulu, samba kabe'nia sibara ka kulit.” Kuanangan rimata, “Nenda te si Elia, tai Tisbe.”

⁹ Lepa koiniakenangan sara utet saladdu pasamba lima pulu sia sapoguguletnia raei masilaba si Elia. Tuitui utet saladdu nenda, lepa ailinangan si Elia ainia mukukuddu ka sara leleu. Kuanangan utet saladdu nenda, “Ale, pagugulet Taikamanua, aikua rimata gorosotnake ekeu!”

¹⁰ Aleginangannia si Elia, “Ke bulatnia aku nene pagugulet Taikamanua, eddangan itugorosot obengan sibara ka manua ilabo ekeu pat sappru samba leu sapaguguletnu!” Iageti bara obengan sibara ka manua, labonangan utet saladdu nenda samba leu silima pulu anak buania.

¹¹ Lepa geti rimata masikoiniake utet saladdu sabagei pasamba lima pulu anak buania. Ei sia samba kuarangan katubut Eli, “Ale, pagugulet Taikamanua, aikua rimata gorosotnake ekeu kineneiget leu et!”

¹² Aleginangan si Elia, “Ke bulatnia aku nene pagugulet Taikamanua, eddangan itugorosot obengan masilabo ekeu samba saanak buam!” Goggoi nenda leu et bara obengan sibara ka manua samba labonangan utet saladdu nenda samba leu silima pulu anak buania.

¹³ Iageti sikatelunia koiniakenangan minca sara utet saladdu sambatda lima pulu saanak buania. Panatranangan utet saladdu nenda ka leleu samba kele aisege ka matat Elia purekkuknangan samba kuanangannia, “Appeake kai, ale pagugulet Taikamanua! Pununtuki aku baga samba leu sangamberi anak buakku nene. Bui' numateiake kai!

¹⁴ Rua utet saladdu sambatda saanak buatda matei ailabo sia obengan sibara ka manua, tapoi kutiddou, kau imanuntu bagam katubukku!”

¹⁵ Kateteret nenda leu et kuanangan malaikat Tuhan kai Elia, “Bui' numaloto! Tut le nia baram ka leleu nene.” Kalulut nenda tuitui si Elia sambatda utet saladdu nenda raei kai rimata.

¹⁶ Lepa kuanangan si Elia katubut rimata, “Aikua si Tuhan, anukoiniake sirimanua masitiddou enungan katubut Baal-Zebub sabulungan laggai Ekron, kelean le ta anai Taikamanua ka Israel itutiddou enungan katubuNia. Kalulut nenda ta'an mamale ekeu, tapoi mamatei le ekeu.”

¹⁷ Iageti matei si Ahazia kele sikuat Tuhan kai Elia. Kalulut ta'anai togat Ahazia simanteu, oto bailiunangan si Joram rimata masisailiakenia. Aipuaili nenda ka rura sikarua puparentaat Jehoram togat Josafat, rimata Jehuda.

¹⁸ Pumumuannia bagei pagalaiat sigalaiakenen Rimata Ahazia atusuratnakean ka bagat buko Pumumuan pagalaiat Rimata Israel.