2Ptr. 1 - BUKO SIPUNENAN

¹ Sibara kai Simon Petrus, pagugulet samba apostel Jesus Kristus masiailiake sia siputotonem baga kele laingen tonem bagamai kalulut puroipoat Taikamanua samba Jesus Kristus, Sipaarau sita.

² Kiliu baga samba aban simabura ka kam kalulut pasiaagai Taikamanua samba Jesus Tuhanta.

Pasogaiat samba pamiliat Taikamanua

³ Kalulut geget putaikamanuaatnia aipanguruatnakean ka sita sangamberinia sikau sita murimanua simatopit kalulut pasiaagaita nia, sipasisosogai sita ka pulatsanan samba erut bagania.

⁴ Ka enungan nenda te aipanguruatnake ka sita palelengan simakeppu saki samba simakope beunan, bule kalulut nia bela kam ka pubotbonan sikatai ka polak nene, bailiu kam mueneu ka putaikamanuaat.

⁵ Kalulut nene, besiake kam nutuppaiake kam ka tonem bagamui pueeru, tuppai pueeru puaagai,

⁶ tuppai puaagai surut tubu, tuppai surut tubu om baga, tuppai om baga topit,

⁷ tuppai topit nuntut baga ka sasaraina, tuppai nuntut baga ka sasaraina nuntut baga ka sangamberi sirimanua.

⁸ Aipoi ai bai sangamberinia nene ka kam sipububura, bailiu kam mangamang samba mubua ka bagat pasiaagaimui Tuhanta Jesus Kristus.

⁹ Tapoi kasei si ta anai sangamberinia nene, mapeset le nia ta mareunan siitcokatnia, aikalipogingan katupoposat jonia siburu.

¹⁰ Oto sasarainangku, besiake kam simakope bule memei maroron pasogaiat samba pamiliat Taikamanua ka kam. Aipoi ke nugalaiake kam nene, ta te bebele kam.

¹¹ Kisedda te ipanguruatnake ka kam gege simasun masiguruki Purimataat simatom, ia te Purimataat Tuhan samba Sipaarau sita, Jesus Kristus.

¹² Ia te lulunia sarat kuparepdep kam pagalaiat sangamberinia nene, kenanen anuagaian kam samba amaronan kam ka bagat pubulanan sinilomui.

¹³ Bulat mateu le ka paatuatku kuparepdep kam pagalaiat sangamberinia nene, burut ai pei le aku muririmanua ka bagat tubu nene.

¹⁴ Kuagai poi taan mauju kukaddiuake polak nene, kele sipoiliat Tuhanta Jesus Kristus ka mataku.

¹⁵ Tapoi kubebesiake le, bule kenanen amutuituian aku mariuriu le nurepdep kam sangamberinia nene.

Sipasimumuneng pulatsanan Kristus

¹⁶ Aipoi ta masitutnake pumumuan pinabarat sirimanua siagai paatuat ka teteret kupaarep kai ka kam gege samba kaoijanan Tuhanta Jesus Kristus, matamai le amasiitco pubeunanannia.

¹⁷ Aisilo poi pubeunanan samba pulatsanan sibara ka Taikamanua Ukkui, ka teteret aioi ka tubunia nganga sibara ka sipululatsat masikua, “Nene te Toga kilibet bagaku, siobakat bagaku te nia!”

¹⁸ Bulat tubumai amasiarep nganga nene sibara ka sorga, ka teteret ai kai sambamai ka uddut leleu sipunenan.

¹⁹ Oto memei maroron ka kai tiboiet sinibalaakenenda tai nabi. Bulat maeru le nulelekngake kam nia kele nulelekngake kam alito siputotoro ka kudduat simagepgep teret imailau, samba ibela usutat simancep ka bagat paatuatmui.

²⁰ Bulat siboiki agaietmui ia te: Senen sinibalaakenen Surat Sipunenan ta momoi tukolouake siripot siobat bagat sirimanua,

²¹ tapei poi anai sibala sibara ka teu bagat sirimanua, sinubbui Ketsat Sipunenan le arapanibo sikoiniakenen Taikamanua.