2Mos. 8 - BUKO SIPUNENAN

Ukuman sikarua: Kuret simigi

¹ Lepa kuanangan si Tuhan kai Mose, “Kenan masipatiboake rimata samba segeake katubunia patonekatKu nene: ‘Obaake paamianKu raei rapanindou katubukKu.

² Ke nukkera ratuitui, laggai nene Kususunake geti kuret sibailiu ukuman.

³ Bagat oinan Nil nenda sun le geti kuret, bailiu sangamberi kuret nenda bela sibara ka oinan samba tugurunangan ka uma purimataatnu, kabagat bili pereman samba kudduat peremannu, kabagat sangamberi lalepda simabuk tiboi tubu, sakalaggaiatnu samba leu et ka sangamberi paneukat.

⁴ Sangamberi kuret nenda muattat samba masikarai ekeu samba leu sangamberi siabeu tiboi tubu samba taikalaggaiatnu.’ ”

⁵ Kuanangan si Tuhan katubut Mose, “Koiniakenungan si Aron masipatotoi tuturania ka uddut sangamberi bagat oinan, pugurungan oinan samba sangamberi siugguk bule sangamberi kuret tuottou samba masisunake polak Misir.”

⁶ Iageti totoiakenangan tuturania si Aron ka uddut sangamberi oinan, lepa tuottounangan sangamberi kuret masisunake sangaliot laggai Misir.

⁷ Tapoi simatawa masipakei puagaijatda simatawa, samba masigalai ituottou sangamberi kuret ka tobbou laggai nenda.

⁸ Iageti sogainangan rimata si Mose samba si Aron samba kuanangan, “Panindou kam katubut Tuhan bule itataake sangamberi kuret nene, iageti obaakekungan taikalaggaiatnu raei masipanguruatake buluakenen katubut Tuhan.”

⁹ Aleginangannia si Mose, “Ka bagat angkat baga kupanindou addeat Tuanku. Teuake le teterenia, iageti patiddouakekungan Tuanku, siabeu tiboi tubu samba taikalaggaiatnu. Iageti Tuanku tuujaake ka sangamberi kuret nenda samba ta'anai sipulelegei, legeinia le sarat kabagat oinan Nil.”

¹⁰ Aleginangan si Parao, “Mansep tiddou akemui aku.” Kuanangan si Mose, “Kugagalaiake geti apa sitiddou Tuanku. Iageti Tuanku masiagai geti, ta'anai Taikamanua kele Tuhan Taikamanuamai.

¹¹ Nia te masibebelaake Tuanku, siabeu tiboi tubu samba taikalaggaiatnu ka sangamberi kuret nenda. Taan babara geti kuret ka sangamberi lalep, sarat kabagat oinan Nil mulelegei.”

¹² Lepa si Mose samba si Aron kaddiuakerangan si Parao. Lepa geti panindounangan si Mose katubut Tuhan bule itataake sangamberi kuret siakeNia ka rimata.

¹³ Arepinangan si Tuhan panindogat Mose. Sangamberi kuret sibabara ka sangamberi lalep, ka sangaliot pugeranan bebet lalep samba sangamberi mone sangamberinia matei.

¹⁴ Ruruakerangan tai Misir kuret simamatei nenda pat piga tobbou pa, bailiu sangaliot laggai bute lepa.

¹⁵ Kateteret aiitconia rimata, sangamberi kuret nenda amateian, kelaakenangan patuatnia. Samba kele sikuat Tuhan, ta ioba rimata masipuletcei sikuat Mose samba si Aron.

Ukuman sikateu: Legu

¹⁶ Kuanangan si Tuhan kai Mose, “Koiniake si Aron masibo'boake tututania ka polak, iageti ka sangaliot tobbou laggai Misir abu silinangannia geti bailiu legu simigi.”

¹⁷ Lepa boboakenangan tututania ka polak si Aron, samba sangamberi abu ka Misir silinangannia bailiu legu sipurut sirimanua samba tarimeu.

¹⁸ Sia simatawa masibesiake masipakei puagaijatda simatawa masibaraake legu leu et, tapoi ta amoi rabaraakenia. Ka senen kudduat ai legu,

¹⁹ bailiu simatawa nenda masikua katubut rimata, “Nene sigalaiakenen Taikamanua.” Tapoi rimata nenda masikelaake paatuatnia samba kele sikuat Tuhan nenda ta ioba masipuletcei sikuat Mose samba si Aron.

Ukuman sikaepat: Legu silimong

²⁰ Kuanangan si Tuhan kai Mose, “Kenan mansep bulat simanseman masiailiake si Parao kateteret itugorosot kabagat oinan, samba segeakenungan katubunia tiboietKu nene: ‘Obaakean paamianKu raei rapanindou katubukKu.

²¹ Ke ta nuobaake raei sapaamianKu, iageti akekungan geti legu silimong katubum, katubutda siabeu tiboi tubu samba taikalaggiatnu. Sangamberi lalepda tai Misir samba sangaliot laggai sun le legu silimong.

²² Tapoi Kugalai le geti ta makere kupkumen laggai Gosyen, kudduatda sapaamianKu. Sedda taanai legu silimong, bule nuagainia, Aku, Tuhan sipasigagalaiake nenda.

²³ Kugalai le geti pabaggeijat paamianKu pasamba taikalaggaiatnu. Mansep puailinangan geti pukerengan nene.’ ”

²⁴ Tuhan masibaraake legu silimong bulat simakope igi ka uma purimataat samba ka sangamberi lalep siabeu tiboi tubu. Sangamberi tai Misir bulat mangorik le sia kalulut sangamberi legu silimong nenda.

²⁵ Lepa geti si Parao masisogai si Mose samba si Aron lepa kuanangan, “Kenan kam masipanguruatake buluakenen katubut Taikamanuamui, tapoi ka laggai nene le.”

²⁶ Aleginangannia si Mose, “Simaerunia ta kisedda, kalulut ta iooba bagatda geti tai Misir ke raitco panguruatmai nenda, samba bulat rabaijuk le geti kai bukku teret matei.

²⁷ Buita mei le kai ka simatangeu telu ngagogoi pusilaijat reunannia, masipanguruatke buluakenen katubut Tuhan Taikamanuamai, kele siparentaakenenNia katubumai.”

²⁸ Lepa kuanangan si Parao, “Amaeruan, kuobaakean le nuei kam ka simatangeu masipanguruatake buluakenen katubut Tuhan, Taikamanuamui, sarat bui nuei kam ka reunan. Repdem, patiddouake kam aku!”

²⁹ Aleginangan si Mose, “Ke ameian aku, panindoukungan simaruei katubut Tuhan bule mansep sangamberi legu silimong nenda masikaddiuake Tuanku, sia siabeu tiboi tubu samba taikalaggaiatnu. Tapoi bui nubokoi kai minca, samba bui nusaila tai Israel rapanguruatake buluakenen katubut Tuhan.”

³⁰ Lepa nenda bela si Mose ikaddiuake Rimata Parao, lepa panindounangan katubut Tuhan,

³¹ samba si Tuhan masiarepi panindogat Mose. Sangamberi legu silimong nenda tuburutnangan ikaddiuake si Parao, sia siabeu tiboi tubu samba taikalaggaiatnia; taanai berisara amulegei.

³² Tapoi ka nene leu et makela leu et patuatnia si Parao samba ta iobaake ratuitui tai Israel.