2Mos. 7 - BUKO SIPUNENAN

¹ Kuanangan si Tuhan kai Mose, “Kubailiuake geti ekeu kele Taikamanua ka matat Rimata Parao, samba kebbunu si Aron manibo geti katubunia sibailiu nabim.

² Segeake katubut Aron sangamberi siparentaakenenKu katubum. Koiniakenungan si Aron masikua katubut rimata, buita iobaake si Parao tai Israel rakaddiuake laggai Misir.

³ Tapoi Kubailiuake te geti si Parao makela patuat. Ta te ipuleletsei ekeu, kenanen maigi kubaraake pugejaat baga ka Misir.

⁴ Kalulut nenda Aku masiukum geti Misir pasamba sangamberi ukuman simasane, lepa geti abbitkungan sangamberi tai Israel, paamianKu bela sibara ka tobbou laggai nenda.

⁵ Iageti agairangan te getinia tai Misir, Aku nene Tuhan, kateteret Kuukum sia samba Kuambit tai Israel bela sibara ka laggaira.”

⁶ Si Mose samba si Aron masigalaiake siparentaakenen Tuhan.

⁷ Si Mose aian rurania balu pulu ngarura samba si Aron ainia balu pulu ngarura kateteret rapatiboake rimata Misir.

Tuturat Aron

⁸ Kuanangan si Tuhan kai Mose samba kai Aron,

⁹ “Ke itiddou Rimata Parao bule nugalai kam pukerengan sibailiu toggaiat, koiniakenungan si Aron masiala tuturania samba masiribbaiakenia ka polak ka matat Parao. Tutura nenda silinangannia geti bailiu ulou.”

¹⁰ Iageti ei si Mose samba si Aron masipatiboake Rimata Parao, lepa galaiakerangan apa siparentaakenen Tuhan. Si Aron masiribbaiake tuturania ka polak ka matat rimata samba kamatatda sipugagalai ka uma purimataatnia, lepa tutura nenda silinangannia bailiu ulou.

¹¹ Kalulut nenda rimata leu masisogai sangamberi sirimanua sibara puagaijat samba simatawa, lepa galaiakenangan kisedda leu et ka puagaijatda masitawa.

¹² Senenda masiribbaiake tutura'ra ka polak samba sangamberi tutura nenda silinangannia bailiu ulou; tapoi tuturat Aron masiguk tutura'ra.

¹³ Kenanen leu kisedda, rimata ikelaake le paatuatnia samba ta ioba masipuletcei sikuat Mose samba si Aron, kele silepa aikua si Tuhan.

Misir isaksak pugejaat baga sabeu Ukuman siboiki: Oinan ibailiu logau

¹⁴ Lepa geti kuanangan si Tuhan katubut Mose, “Rimata nenda bulat makela paatuatnia, ta ioobaake ratuitui tai Israel.

¹⁵ Lulut nenda kenan simaseman nuailiakenia, kateteret itugorosot ka bagat oinan Nil. Abbitnungan tutura siooi isili ibailiu ulou nenda samba ngenanungan ka oijanannia ka bebet bagat oinan.

¹⁶ Kuanangan katubut rimata nenda, Tuhan Taikamanuan Ibrani masikoiniake aku bule kusegeake katubut tuanku bule nuobaake paamianNia raei manindou katubuNia ka simatangeu. Tapoi aili kineneiget Tuanku ta noba masiarepake.

¹⁷ Lulut nenda si Tuhan masikua kisene, “Ka sigalaiakenenku nenda, againungannia, Aku te Tuhan. Pasamba tutura nene kubo'bo geti uddut oinan, samba oinannia silinangannia geti bailiu logau.

¹⁸ Matei le geti sangamberi iba kabagat oinan Nil, samba bagat oinan nene mabutenangan, bailiu tai Misir taioinangan ralo oinan nenda.”

¹⁹ Kuanangan si Tuhan katubut Mose, “Koiniake si Aron iala tuturania samba itotoiake kabeinia ka sangamberi bagat oinanda tai Misir, sangamberi sopak samba sangamberi siugguk ka Misir samba ka sangamberi kudduat oinan. Oinannia ibailiu geti logau, samba ka sangaliot laggai ai logau, samba leu ka sangamberi lalaisu samba lulak.”

²⁰ Si Mose samba si Aron masigalaiake sangamberi siparentaakenen Tuhan ka matat Rimata Parao samba sangamberi sapaguguletnia, si Aron masiakkatake tuturania samba masibo'bo uddut oinan Nil, iageti silinangan oinannia ibailiu logau.

²¹ Sangamberi iba kabagat oinan Nil nenda matei, samba mabutenangan bagat oinan Nil, bailiu tai Misir, taioinangan ralo oinan nenda. Ka sangaliot polak Misir ai logau.

²² Tapoi simatawa tai Misir masigalai kisedda leu et pasamba puagaijatda simatawa, bailiu rimata Parao mariuriu imakela patuatnia. Kele sikuat Tuhan, ta ioba rimata Parao masiarepi si Mose samba si Aron.

²³ Tapoi atoili peilenia si Parao ka uma purimataat, ta aipuletsei sibabara nenda beri goiso.

²⁴ Sangamberi tai Misir masigaigai lobok ka sanganantat bebet bagat oinan rapasigaba oinan lo, kalulut bagat oinan nenda ta momoi tulo.

²⁵ Sabau pitu ngagogoi lepat aipateleiji si Tuhan bagat oinan Nil.