2Mos. 6 - BUKO SIPUNENAN

Taikamanua masisogai si Mose

¹ Panibonangan Taikamanua katubut Mose, kuananganNia, “Aku te Tuhan.

² Akupatoilaan tubuKu kai Abraham, Ishak samba kai Jakob sibailiu Taikamanua Sipulegege, tapoi ta akupaagai tubuKu katubutda ka oni Tuhan.

³ Aku leu et masibaraake palelengan pasamba sia, iate masikau geti katubutda laggai Kanaan, laggai kudduatda siburu sibailiu siooiake.

⁴ Akuarepman katsitda tai Israel rapaoreiji sia tai Misir, lepa repdepkungan palelenganKu nenda.

⁵ Oto kalulut nenda paagai ka tai Israel: Aku te Tuhan, Kubebelaake te kam ka paoreatda tai Misir. Kupatotoila te gegeKu sabeu masipaarau kam samba masikau ukuman simasane ka tai Misir.

⁶ Bailiuakekungan kam geti paamianKu, samba Aku ibailiu Taikamanuamui, bule nuagai kammia, Aku te Tuhan, Taikamanuamui, sibelaake kam ka paoreatda tai Misir.

⁷ Kuabbit te kam ka laggai sipalelekakenenKu kabagat suppa katubut Abraham, Ishak samba si Jakob; polak nenda Kuake katubumui ibailiu bulat bakkatmui. Aku te Tuhan.”

⁸ Sangamberi patonekat Tuhan nenda segeakenangannia si Mose ka tai Israel, tapoi ta arapuletsei sikuat Mose, kalulut paoreat sikatai nenda sibailiuake sia mubele baga.

⁹ Lepa geti kuanangan si Tuhan katubut Mose,

¹⁰ “Kenan kai Parao samba kua katubunia, kau iobaake tai Israel ratuitui rakaddiuake laggainia.”

¹¹ Tapoi aleginangan si Mose, “Beringan tai Israel ta raoba masiarepake aku, kipa ioi iarepi aku si Parao, aku sitaiagai manibo?”

¹² Iageti si Tuhan masikoiniake si Mose samba si Aron, kuanangan, “Kua kam ka tai Israel samba kai Rimata Parao, aikoiniakean kai si Tuhan masiuteake tai Israel bela ka laggai Misir.”

Tiboi paninikat Mose samba Aron

¹³ Nene te tiboi paninikat Mose samba Aron: Si Ruben, togat Jakob sikebbukat, ai epat togania simanteu: Henokh, Palu, Hezron samba Karmi. Sia nenda iate taikebbukatda sibara ka muntogat Ruben.

¹⁴ Si Simeon samba sinanalepnia tai Kanaan ai enem togania simanteu: Jemuel, Jamin, Ohad, Jakhin, Zohar samba Saul. Sia nenda iate taikebbukatda sibara ka muntogat Simeon.

¹⁵ Si Lewi ai telu togania simanteu: Gerson, Kehat samba Merari, sia nenda iate taikebbukatda sibara ka muntogat Lewi. Si Lewi aiaili rurania sangotu telu pulu pitu ngarura.

¹⁶ Si Gerson ai rua tatogania simanteu: Libni samba Simei; sia nene maigi muntogatda.

¹⁷ Si Kehat ai epat togania simanteu: Amram, Jizhar, Hebron samba si Uziel. Si Kehat aiaili rurania sangotu telu pulu telu ngarura.

¹⁸ Si Merari ai rua tatogania taimanteu: Mahli samba si Musi. Nenda te sangamberi muntogat sibara ka muntogat Lewi pasamba paninikatda sene-senenda.

¹⁹ Si Amram mutalimou pasamba Jokhebed, maniu ukkuinia, samba tatogatda siate: Aron samba si Mose. Amram murimanua sangotu telu pulu pitu ngarura.

²⁰ Si Jizhar ai telu togania simanteu: Korah, Nefeg samba si Zikhri.

²¹ Si Uziel leu et ai telu togania simanteu: Misael, Elsafan samba si Sitri.

²² Si Aron mutalimou pasamba si Eliseba, togat Aminadab sinanalep, si Eliseba leu et musaraina kai Nahason. Si Eliseba masitutuake si Nadab, Abihu, Eleazar samba Itamar.

²³ Si Korah ai telu togania simanteu: Asir, Elkana samba Abiasaf. Sia nenda iate taikebbukat sibara ka muntogat Korah.

²⁴ Si Eleazar, togat Aron simanteu mutalimou ka sara sinanalep togat Putiel, samba togatda iate: Pinehas. Nenda te sangamberi sautet muntogatda tai Lewi siripot taikebbukatda.

²⁵ Si Aron samba si Mose nenda siparentaakenen Tuhan addeat masiabbit sangamberi tai Israel bela sibara ka Misir.

²⁶ Ruadda masipatiboake rimata Misir bule ibelaake tai Israel.

Si Tuhan masikau parenta kai Mose samba kai Aron

²⁷ Kateteret aipanibo si Tuhan kai Mose ka Misir,

²⁸ kuanangan si Tuhan, “Aku te Tuhan. Segeake kam katubut rimata Misir sagamberinia sikuaKu katubumui.”

²⁹ Tapoi aleginangannia si Mose, “Tuhan, Nuagai, ta maagai aku manibo. Kipa iooi ioba iarepi aku Rimata Parao?”