2Mos. 40 - BUKO SIPUNENAN

Turioake Sapou Tuhan samba tukokoiake kai

¹ Kuanangan si Tuhan katubut Mose,

² “Rioake kam SapouKu ka gogoi sikasara laggo sara.

³ Kau kam kabagat Sapou nenda Peti Pakerekat Baga sibara Surukat Sipulungamata samba kau kam komak pasitabbo ka matania.

⁴ Galakngake kam pasigalangan bibilet pasamba bibiletnia siripot patunannia. Kau kam leu et reret alito samba alito ka uddutnia.

⁵ Galakngake kam kudduat pasibuluat mas kudduat pasilabot kumanyang sibara ka mas ka matat Peti Pakerekat Baga, samba toakngake kam komak kekre ka matatbaliu Sapou.

⁶ Galakngake kam kudduat pasibuluat buluakenen rarangen ka matatbaliu Sapou.

⁷ Kau kam kudduat oinan ka paoggangan Sapou samba kudduat pasibuluat nenda, lepa uruakemuian oinan ka bagania.

⁸ Lepa geti kaumuian komak ka sangaliot laibokat Sapou samba toakngakemuian komak kekret matatbaliu gugurukat laibokat.

⁹ Lepa geti alanungan tula pasisukat samba tulaijinungan Sapou Sipunenan pasamba sangamberi sibabara kabagania; kisedda te nupuneninia pasamba senengamata bibiletnia, bailiunangannia sipunenan.

¹⁰ Sukatnake kudduat pasibuluat samba sangamberi bibiletnia, bule sangamberinia bailiu bulat sipunenan.

¹¹ Kisedda enungannia nupuneninia. Galaiake kisedda leu et ka kudduat oinan samba bongenia.

¹² Lepa nenda koiniake si Aron samba tatogania raoi ka matatbaliu Sapou samba palinanungan sia pasamba oinan.

¹³ Leppeiake leppei imam katubut Aron samba tulaijinia bule imapunen ragalaiake puukuket puiimam.

¹⁴ Lepa koiniakenungan tatogania ramalegre, samba leppeiakenungan leppei puimam katubutda.

¹⁵ Lepa tulaijinungan sia kele nutulaiji ukkuira, bule sia leu et momoi ragalaiake puukuket puimam, bule ka pasitutulaiji nenda galaiakerangan galajet puiimam teret buruburu.”

¹⁶ Galaiakenangan sangamberinia si Mose kele sikoiniakenen Tuhan katubunia.

¹⁷ Iageti ka gogoi sikasara laggo sara ka rura sikaruania ka lepat arakaddiuake Misir tai Israel, turioake Sapou Tuhan nenda.

¹⁸ Galakngakenangan si Mose sangamberi bongennia, masirioake sangamberi pulanen, baibainia samba rioakenangan sangamberi ariginia.

¹⁹ Lepa nga'ngaakenangan tobat Sapou pasamba tabbo rubeiat ka uddutnia kele sikoiniakenen Tuhan katubut Mose.

²⁰ Lepa ka rua bukku lei nenda tubulukngake kabagat Peti Pakerekat Baga. Lepa galakakenangan si Mose takket Peti nenda samba bulukngakenangan loina pasibairat kabagat letcunia.

²¹ Lepa kaunangan Peti Pakerekat Baga nenda kabagat Sapou samba toakngakenangan komak pasitabbo ka matania, kele sikoiniakenen Tuhan katubut Mose.

²² Lepa geti galaknangan kudduat roti si Mose kabagat Sapou, ka isit ka bare, kamatat komak kekre nenda.

²³ Lepa ka uddut meja nenda tugalakngake sedda roti simatatarek, kele sikoiniakenen Tuhan katubut Mose.

²⁴ Reret alito tugalakngake kabagat Sapou, ka rubeiat ka kaiaman sipamamatai ka meja nenda,

²⁵ lepa, sangamberi alito nenda tutunam ka matat Tuhan – kele sikuat Tuhan katubut Mose.

²⁶ Kudduat pasibuluat mas tugalakngake kabagat Sapou ka ipot komak,

²⁷ lepa labonangan kumanyang simasingin kele sikoiniakenen Tuhan katubut Mose.

²⁸ Toakngakenangan si Mose komak matatbaliu Sapou,

²⁹ samba ka ipot matatbaliu nenda tugalakngakenia kudduat pasibuluat buluakenen rarangen. Ka uddut kudduat pasibuluat nenda tupanguruatnake buluakenen rarangen samba buluakenen komen simatatarek – kele sikoniakenen Tuhan katubut Mose.

³⁰ Kudduat oinan sigalai ka tembaga tugalakngake ka paoggangan Sapou samba kudduat pasibuluat, lepa tukau kabagania oinan.

³¹ Si Mose, si Aron samba tatogania masibui kabei samba reretda sedda.

³² Senen ratuguru kabagat Sapou Tuhan ele senen ralegeri kudduat pasibuluat buita ta rubui rere samba kabeira – kele sipkoiniakenen Tuhan katubut Mose.

³³ Ka sangaliot bebet Sapou samba kudduat pasibuluat nenda kaunangan komak si Mose, lepa toakngakenangan komak matatbaliu gugurukat laibokat. Kisedda te ailepaake galajet nenda si Mose.

Pulatsanan Tuhan masilakkup Sapou

³⁴ Lepa geti gorosot tanai rusa masilakkup Sapou nenda, samba Sapou nenda sun le toro pulatsanan kababarat Tuhan.

³⁵ Oto kalulut nenda taioinangan ituguru si Mose kabagat Sapou nenda.

³⁶ Ke tusakai tanai rusa sibara ka teitei Sapou Tuhan, ragatrangan sapoura tai Israel ratuitui raei ka kudduat bagei.

³⁷ Tapoi ke ta tusakai tanai rusa nenda, ta mututuiuti sia sedda.

³⁸ Burunia arapusila tai Israel, si Tuhan ainia kabagat Sapou nenda. Kateteret sinago ka tanai rusa sipununuijat samba sinoibo ka arigit obengan sipususumbulat.