2Mos. 4 - BUKO SIPUNENAN

Taikamanua masikau gege kai Mose masigalaiake pukerengan

¹ Lepa aleginangan si Mose, “Tapoi kipa ke ta mataonem bagatda sangamberi tai Israel ta raoba masilelekake sangamberi tiboietku? Apa bulat kugagalai ke rakua, si Tuhan ta ipatoila tubuNia katubukku?”

² Parerenangan si Tuhan katubut Mose, “Apa nenda ka kabeinu?” Aleginangannia si Mose, “Tutura.”

³ Kuanangan si Tuhan, “Ribbaiake tutura nenda ka polak.” Ribbaiakenangannia si Mose, lepa tutura' nenda bailiu ulou pat areuakenangan tubunia si Mose.

⁴ Kuanangan si Tuhan kai Mose, “Legreake tubum ka ulou nenda, samba ukkaake leileinia.” Legreakenangan tubunia si Mose samba labanangan ulou nenda, ta amauju ulou ka kabei Mose nenda bailiu minca tutura'.

⁵ Kuanangan si Tuhan, “Kisedda nugagalai bule sangamberi tai Israel matonem baga, Aku, Tuhan Taikamanuan taikebbukatda, Taikamanuan Abraham, Ishak, samba si Jakob, sipatoila tubu katubum.”

⁶ Kuanangan si Tuhan minca katubut Mose, “Bulukake kabeinu kabagat leppeinu.” Reddetnanngannia si Mose, samba kele aitiktikake ibela kabeinia, aiorakngan kabeinia lubbe simasappo samba amubulauan kele kapas.

⁷ Lepa kuanangan si Tuhan, “Bulukake minca kabeinu kabagat leppeinu.” Galaiakenangan kisedda si Mose, samba kateteret aibelaakenia minca, kabeinia nenda amalengan.

⁸ Kuanangan si Tuhan, “Ke ta roba mutonem baga katubum, ele ta raoba mutonem baga kalepat raitco kiseiet siboiki, iageti kiseiet sikarua nene masikau sia mutonem baga.

⁹ Ke ta'pei leu et raoba mutonem baga katubum kenanen leu et araitcoat ruania kiseiet nene, samba ta raoba masilelekake sangamberi tiboietnu, alanungan goiso oinan sibara kabagat oinan Nil samba piliakenungannia ka polak simagarak. Oinan nenda bailiunangannia geti logau ka polak simagarak nenda.”

¹⁰ Tapoi kuanangan si Mose, “Oi Tuhan, aku sirimanua sitaiagai manibo, baranangan siburu kisedda leu kineneiget, samba kateteret kineneiget aipanibo si Tuhan. Makela jalaiku, paninibo mabi'bo samba ta mariuriu.”

¹¹ Kuanangan si Tuhan katubut Mose, “Kasei bai siake ngungu katubut sirimanua? Kasei sigalainia maouou ele matakkep? Kasei sipasigagalai maitco ele mapeset? Ta' pa Aku, Tuhan?

¹² Kineneiget, kenannan le, aile Kuropake ekeu manibo samba masigelaiake apa bulat kuanennu.”

¹³ Tapoi aleginangan si Mose, “Panindogatku, bui' aku nukoiniake, oi Tuhan, koiniake le sirimanua sabagei.”

¹⁴ Lepa bara golut Tuhan katubut Mose samba kuanangan, “Ta' pa ai sarainam sipuoni si Aron? Kuagai maagainia manibo. Bulatnia, ai nia kabagat puenunganan ioi sene, samba maangka bagania geti paaili pasamba ekeu.

¹⁵ Patibongan pasambania samba paagainungan katubunia apa bulat kuanennia. Aku masiropake geti kam ruamui samba masigelaiake apa bulat kuanenmui samba nugagalaiake kam.

¹⁶ Buita nia manibo ka onim ka matatda tai Israel, bailiunia geti sitiboake tiboietnu samba addeakenangan ekeu kele Taikamanua sipasikukua apa bulat kuanennia.

¹⁷ Abbit le tutura' nenda. Ekeu le masisigalai sangamberi kiseiet.”

Si Mose toili ka Misir

¹⁸ Kele aitukapplu nenda toili si Mose ka lalep Jitro, talikunia, samba kuanangan katubunia, “Obaake kam aku toili ka Misir masibalou sangamberi sasarainangku samba masiitco aipeileu pa sia muririmanua ele ta.” Kuanangan si Jitro katubut Mose, “Kenannan le kabagat aban.”

¹⁹ Kateteret ai peile si Mose ka laggai Midian, kuananngan si Tuhan katubunia, “Toiliake ekeu ka Misir. Sangamberi sirimanua sioba masimateiake ekeu amateian sia.”

²⁰ Iageti si Mose masinana sinanalep samba tatogania taimanteu samba masisakaiake sia ka teitei kalidei, lepa putuituirangan simakere ka Misir. Si Mose leu et masiabbit tuturat Taikamanua ka kabeinia.

²¹ Kuanangan si Tuhan kai Mose, “Akuakean gege katubum masigalai sangamberi kiseiet. Oto ke atoilingan bai ekeu ka Misir, galaiakenungan sangamberi kiseiet nenda ka matat rimata Misir. Tapoi Kubailiuake le nia geti simakela patuat pat taiobaakenangan ratuitui tai Israel.

²² Lepa buita nukua katubut Parao: Aku, Tuhan masitoneake kisene: Israel iate togaKu sikebbukat,

²³ kalulut nenda Aku masikua katubum: Obbake ituitui togakKu; bule ioi ipanindou katubukKu; tapoi ke ta nuobaake ituitui, mateiakekungan togam sikebbukat.”

²⁴ Ka sara kudduat pusapougat ka pusilaiat nenda, oi si Tuhan katubut Mose samba ioba masimateiakenia.

²⁵ Lepa Si Zipora, sinanalepnia, masiala sara balatu simalauru sigalai sibara ka bukku samba masisunat togania, lepa tonemakenangannia ka reret Mose. Kuanangan si Zipora, “Ka logau nene, ekeu ibailiu simanteuku.”

²⁶ Aikuania pagalaiat nenda iate sipaakkup ka enungan galaiakenen pususunat. Oto si Tuhan taan amuriuriu imateiake si Mose.

²⁷ Ta' amauju nenda kuanangan si Tuhan kai Aron, “Kenan ka simatangeu nuailiake si Mose.” Ei si Aron, lepa paailirangan baginia ka leleu Taikamanua, samba sigguknangannia.

²⁸ Tiboinangan si Mose katubut Aron sangamberi sikuat Tuhan katubunia bule isegeake samba senengamata pukerengan bule tugalaiake.

²⁹ Lepa si Mose samba si Aron ei ka Misir samba masiruruake sangamberi siuteake tai Israel.

³⁰ Segeakenanngan si Aron katubutda sangamberi sikuat Tuhan katubut Mose, samba si Mose masigalaiake sangamberi kiseiet ka matada sangamberi sirimanua nenda.

³¹ Iageti matonemnagan bagat tai Israel, samba kateteret araarep aipoi Tuhan aipuletseian tai Israel samba aiitcoan sangamberi pangoringanda, lepa purekkukrangan manindou.