2Mos. 39 - BUKO SIPUNENAN

Masigalai leppei imam

¹ Si Bezaleel samba si Oholiab masigalai leppeira tai imam sibara ka komak simalimun, simasurou samba simabonan, pakeietda kateteret rapugalai ka Bilik Sipunenan. Leppei imam Aron tugalai kele sikuat Tuhan katubut Mose.

² Efod tugalai sibara ka komak simaalit baga, komak simalimun, simasurou samba simabonan samba banang mas.

³ Paddairangan ba'bat mas lepa geti patippurangannia bailiu banang simanimpi, lepa tikairangannia pasamba komak simaalit baga, simasurou samba simabonan.

⁴ Lepa nenda tugalai rua apprat ta'ta pasiapprat efod sisuilak ka bebenia.

⁵ Akkik tenga sitikai simaalit baga tugalai sibara ka galajet simakere samba tusuilakake ka efod nenda bailiunangannia sara kele sikoiniakenen Tuhan katubut Mose.

⁶ Rugguirangan bukku simakeppu saki oiniakenen delima lepa ottotnakerangannia ka laplap mas. Ka sun puaagai rapae oni pulurua togat Jakob ka sangamberi bukku nenda.

⁷ Lepa geti sangamberi bukku nenda tuottotnake ka apprat ta'tat efod sibailiu toggaiat pasirepdeman sipulurua muntogat Israel, kele sikoiniakenen Tuhan katubut Mose.

⁸ Si Bezaleel samba si Oholiab masigalai tabbot ru'rukat sibara ka galajet simakere pasamba efod, iate mas, komak simaalit baga simalimun, simasurou samba simabonan.

⁹ Putubuatnia simatuddak sileuleu rua, lionia samba nantania sangaremang.

¹⁰ Ka tabbot ru'rukat nenda galairangan epat ngatun bukku simakirisau. Ka patunan siboiki bukku simakeppu saki sipuoni delima, topas samba baiduri sepah.

¹¹ Ka patunan sikarua zamrud, bukku nilam samba intan.

¹² Ka patunan sikatelu bukku lazuardi, akik samba bukku kecubung.

¹³ Ka patunan sikaepat bukku pirus, yakut, samba ratna cempaka. Ka puluruania simakirisau nenda tulailaiji pasamba mas.

¹⁴ Ka senen bukku sirimakirisau tusurat sara oni sibara ka pulurua togat Jakob sibailiu toggaiat perepdeman sangamberi muntogat Israel.

¹⁵ Lepa galairangan rua ngalou sibara ka mas simalina siputre kele appra.

¹⁶ Tugalai leu et rua letcu mas ottotnakenen ka rua taiming ka uddut tabbot ru'rukat nenda.

¹⁷ Lepa ruania ngalou mas nenda tubulukngake kabagat sangamberi letcu nenda,

¹⁸ samba ka rua tu'tut bagei tuppraake ka rua laplap, bailiu oinangan tutuppaiake ka rubeiat ka mata ka apprat ta'tat leppei efod nenda.

¹⁹ Lepa tugalai rua letcu mas minca ottotnakenen ka tabbot ru'rukat nenda, ka ngungunia ka tei ka rubeiat bagania siorak efod.

²⁰ Lepat nenda tugalai rua letcu mas ottotnakenen ka rubeiat ruania appra ta'ta efod ka mata, legret tuppai susuilaknia simakarepe, ka uddut akkik tenga sibara ka sitikai simaalit baga.

²¹ Siripokat sikoiniakenen Tuhan katubut Mose, appraakerangan tabbot ru'rukat pasamba letcu leppei efod, bailiu tabbot ru'rukat nenda riuriu le ai ka uddut akkik tenga samba ta igogolok.

²² Jubah pakeiet lakket efod, sangamberinia tugalai sibara ka komak simalimun.

²³ Lobok lolokkat leppei nenda tuparon pasamba komak sigoiso sisuilak bule ta imalabbei imabirit.

²⁴ Galairangan pulaingean ka tu'tut lolokkat leppei nenda kele buat delima sibara ka komak simasurou, simasuat laiket samba simabonan, banangnia siputre.

²⁵ Galairangan jijining sibara ka mas simaeru samba ottotakerangan jinijining nenda ka paoggangan buat delima, ka tu'tut lakket leppei nenda,

²⁶ bailiu sara jinijining samba sara buat delima aipakakaddiu, ka sibokko tu'tut lakket leppei nenda, pakeiet ke tugalaiake parurukat kele sikoiniakenen Tuhan katubut Mose.

²⁷ Galairangan leppei Aron samba tatogania, sigalai sibara ka komak simaalit baga,

²⁸ sorot ute sigalai sibara ka komak simaalit, leppei sirumbang simalainge sibara ka komak simaalit baga, sokkoi sitete sibara ka komak simaalit banangnia siputre,

²⁹ samba akkik tenga sibara ka komak simaalit baga, komak simalimun, simasurou samba simabonan tupalinge pasamba sisuilak, kele sikoiniakenen Tuhan katubut Mose.

³⁰ Galairangan leu et sara pulaingean sigalai ka mas simaeru. Ka pulaingean nenda tupae tiboiet, “Sipunenan kai Tuhan.”

³¹ Pulaingean mas nenda tuottotnake ka sorot ute rubeiat ka matania, siripokat sirikoiiakenen Tuhan katubut Mose.

Tulepaake galajet nenda

³² Kisedda te aralepakaake ragalai Sapou Tuhan. Aragalaian sangamberinia tai Israel kele sikoiniakenen Tuhan katubut Mose.

³³ Ambitrangan katubut Mose Sapou pasamba sangamberi bibiletnia, sasakutnia, loina simalittenga, arigi samba bongennia,

³⁴ tabbo sibara ka kulit kambing simanteu sibonanakenen, tabbo sibara ka kulit silebbuk samba komak pasitabbo.

³⁵ Peti Pakerekat Baga sibara rua bukku lei kabagania pasamba loina pasibairat samba tabbonia,

³⁶ kudduat panbguruat roti pasamba sangamberi bibiletnia samba roti simatarek,

³⁷ reret alito sibara ka mas simaeru, sangamberi alito pasamba sangamberi bibiletnia, tulat alito,

³⁸ kudduat pasibuluat sigalai sibara ka mas, tula pasisukat, kumanyang simasingin, komak matatbaliu Sapou,

³⁹ kudduat pasibuluat sigalai ka tembaga pasamba raoi sitikai sibara ka tembaga, loina babairat samba sangamberi bibiletnia, kudduat oinan pasibui pasamba aponia,

⁴⁰ sangamberi komak kekret laibokat samba arigi samba leu bongennia, komak matatbaliu gugurukat laibokat samba leu sangamberi apprania, sangamberi arigit Sapou, sangamberi bibilet pakeiet kabagat Sapou,

⁴¹ samba leppeira tai imam pakeietda rapugalai ka Bilik Sipunenan samba leppei sipunenan kai Aron samba ka tatogania.

⁴² Aragalaiakean galajet nenda tai Israel kele sikoiniakenen Tuhan katubut Mose.

⁴³ Puleleknangan sangamberinia si Mose samba itconangannia, bulat makolou aragalaiania, kele sikoiniakenen Tuhan. Lepa sukatnakenangan sia si Mose.