2Mos. 38 - BUKO SIPUNENAN

Masigalai kudduat pasibuluat buluakenen rarangen

¹ Alanangan si Bezaleel loina akasia, lepa galainangan kudduat pasibuluat buluakenen rarangen. Kudduat pasibuluat nenda tubunia si epat taiming, nantania samba lionia makere kirekatnia iate lima ngaeto samba buaknia telu ngaeto.

² Ka senen taiming ka uddutnia tugalai ban sisaraakenen pasamba kudduat pasibuluat. Sangamberinia tulakkeki pasamba tembaga.

³ Galainangan leu et pakoalikoali, susukkai, simuko, kakakkak samba kudduat obengan, sangamberi pugalai nenda buita tugalai sibara ka tembaga.

⁴ Galainangan raoi sitikai sibara ka tembaga silailaiakenen ka rubeiat tei kudduat pasibuluat, buaknia iletalaga kudduat pasibuluat nenda.

⁵ Lepa galainangan epat letcut loina pasibairat ka epat taiming ka teinia.

⁶ Loina babairat nenda sigalainia sibara ka loina akasia silakkeki pasamba tembaga.

⁷ Lepa ka rua loina babairat nenda tubulukngake kabagat sangamberi letcu ka rua bebet kudduat pasibuluat nenda. Kudduat pasibuluat nenda galainangannia sibara ka lappri samba rubeiat kabaga ai oggaknia.

Masigalai kudduat oinan sibara ka tembaga

⁸ Si Bezaleel masigalai kudduat oinan sibara ka tembaga samba leu bongennia sibara ka tembaga. Tembaga nenda sibara ka pualiggoubatda tainanalep sipugagalai ka matatbaliu Sapou Tuhan.

Laibokat Sapou Tuhan

⁹ Si Bezaleel masikekre laibokat Sapou Tuhan pasamba komak sibara ka komak simaalit baga. Ka isit ka kaiaman, sangotu ngaeto,

¹⁰ pasitukket komak nenda rua pulu arigi tembaga. Bongen samba sasakkutnia samba leu sakkunennia sibara ka perak.

¹¹ Ka isit ka bare, tugalai kisedda leu et.

¹² Ka isit kabelekat sulu, tukau komak simaalit baga nantania limapulu ngaeto. Pulu arigi samba pulu bongen. Komak samba panumpainia sigalai sibara ka perak.

¹³ Ka isit sikalaut, ka matatbaliu, nantat komak nenda limapulu ngaeto,

¹⁴ kabebet matatbaliu nenda kaurangan komak pululima ngaeto nantania, telu arigi samba telu bongennia;

¹⁵ kisedda leu et ka bebet matatbaliu laibokat nenda ai komak kekre pululima ngaeto nantania, pasamba telu arigi samba telu bongennia.

¹⁶ Sangamberi komak kekre sibokko laibokat nenda tugalai sibara ka komak simaalit baga.

¹⁷ Bongen sangamberi ariginia tugalai sibara ka tembaga, oto sasakkut, patuppaiat samba buttet arigi tugalai sibara ka perak. Sangamberi arigi ka laibokat nenda tutuppaiake ka bagei pasamba sasakkut perak.

¹⁸ Komak kekret matatbaliu gugurukat laibokat nenda tugalai sibara ka komak simaalit baga sitikai pasamba komak simalimun, simasurou samba simabonan samba leu tupalainge pasamba sisuilak. Nantania ruapulu ngaeto samba buaknia lima ngaeto, makere kele buak komak kekret laibokat nenda.

¹⁹ Komak matatbaliu nenda itukkenia epat arigi pasamba epat bongen sibara ka tembaga. Sangamberi sasakkut, tabbot buttetnia samba panangkutnia tugalai sibara ka perak,

²⁰ tapoi sangamberi arigit Sapou samba kekrenia tugalai sibara ka tembaga.

Laba' pakeiet ka Sapou Tuhan

²¹ Nene te onin laba' atupakei masigalai Sapou Tuhan samba kudduat Surukat Sipulungamata. Onin laba nenda siripot sikuat Mose samba sisuratda tai Lewi sipugagalai kabagat paneineiat Itamar, togat imam Aron.

²² Si Bezaleel togat Uri, punuteteu Hur sibara ka muntogat Jehuda, masigalai sangamberi sikoiniakenen Tuhan.

²³ Sipasisiropnia, iate si Oholiab togat Ahisamakh sibara ka muntogat Dan, iate sara sirimanua siagai kabei, siagai masipaatu galaiakenen samba masitikai komak simaalit baga.

²⁴ Mas sipanguruatnakenen katubut Tuhan ka Sapou Sipunenan iginia sangaribu ngakilo, tukilo siripot siteuakenen kilo pakeiet ka Sapou Tuhan.

²⁵ Perak sibara ka siripot igit tai Israel iginia telu ngaribu epat ngotu telu pulu ngakilo siripot kilo pakeiet ka Sapou Tuhan.

²⁶ Igit sangamberinia nenda makere siluluira sangamberi sirimanua sitususurat kabagat pangandeat nenda. Senen sirimanua masilului siripot siteuakenen, tukilo siripot kilo pakeiet simaturere. Ka pangandeat nenda tusurat iate enem ngotu telu ribu lima ngotu lima pulu taimanteu sipurura rua pulu ngarura ka pata.

²⁷ Sibara ka perak nenda, tupakei telu ngaribu epat ngotu kilo masigalai sisangotu bongen arigit Sapou Tuhan samba komak matatbaliunia. Senen bongen telu pulu epat ngakilo.

²⁸ Ka legei perak sitelu pulu ngakilo nenda, galainangan si Bezaleel patuppaiat samba sasakkut ariginia, samba leu tabbot buttet arigi nenda.

²⁹ Tembaga sipanguruatnakenen katubut Tuhan iginia rua ngaribu epat ngotu rua pululima ngakilo.

³⁰ Tembaga nenda tupakei masigalai bongen matatbaliu Sapou Tuhan, kudduat pasibuluat pasamba raoi sitikai sibara ka tembaga, sangamberi bibilet ka kudduat pasibuluat,

³¹ bongen komak sibokko laibokat, matatbaliu gugurukatnia, sangamberinia arigit Sapou samba laibokat sigoiliknia.