2Mos. 36 - BUKO SIPUNENAN

¹ Si Bezaleel, Oholiab samba sangamberi simaagai mugalai, sisilo puagaijat sibara kai Tuhan, bailiu agairangan masigalai senengamata galajet masirioake Sapou Tuhan. Buita ragalai sangamberinia nenda kele sikoiniakenen Tuhan.”

² Iageti si Mose sogainangan si Bezaleel, Oholiab samba sangamberi sirimanua sisilo puagaiat sibara kai Tuhan samba sioba masiropmake bule rataddaake mugalai.

³ Si Mose masikau katubutda senengamata paroman sikaura tai Israel bule rarioake Sapou Tuhan. Tapoi tai Israel mariuriu peile rakau paroman katubut Mose ka senen simanseman.

⁴ Lepa geti sia simaagai sipasigagalai Sapou nenda

⁵ masisegeake kai Mose, “Sangamberi panguruat siakera nenda amulegeian siripot pakeiet ka galajet kele sikoiniakenen Tuhan.”

⁶ Iageti segeakenangannia si Mose ka sangaliot pusapougat, kise: “Taan leu tuaake panguruat, aipoi amakappulangan siripot pakeiet ka pasigagalai Sapou Tuhan.” Kisedda te aitukeraake tai Israel ta raambit minca panguruatda.

⁷ Sangamberi galajet pakeiet sipanguruatakenenda masigalai Sapou Tuhan, aiailingan samba amulegei peile siripot pakeiet masilepaake Sapou nenda.

Pasigagalai Sapou Tuhan

⁸ Lepa geti simakope agai katalagat siagai mugalai nenda galairangan Sapou Tuhan. Galairangan Sapou nenda sibara ka pulu ngatippu komak simaalit baga siputre pasamba komak simalimun, simasurou samba simabonan, lepa suilakrangannia pasamba tularat malaika.

⁹ Ka senen tipput komak makere kirekatnia, nantania rua pulubalu ngaeto samba liot senesenen sapou epat ngaeto.

¹⁰ Lima ngatippu komak buita tutuppaiake ibailiu sara komak, samba lima ngatippu bagei buita tugalai kele kisedda leu et.

¹¹ Galai kam sakkunen sibara ka komak simalimun ka bebet ruania komak nenda,

¹² lima pulu sakkunen ka senen komak bailiunangannia sangalakke.

¹³ Galai kam lima pulu panangkut mas masituppaiake ka ruania komak nenda.

¹⁴ Lepa nenda galairangan tobat Sapou nenda sibara ka pulusara komak sibara ka bulut kambing.

¹⁵ Senen tippunia buita makere kirekatnia, nantania telu pulu ngaeto samba lionia epat ngeto.

¹⁶ Lima ngatippu buita tutuppaiake ibailiu sara komak samba enem ngatippu bagei buita tugalai kisedda leu et.

¹⁷ Galai kam lima pulu sakkunen ka bebet komak siboiki samba lima pulu sakkunen ka bebet komak sikarua.

¹⁸ Galai kam lima pulu panangkut sigalai sibara ka tembaga bule itusaraake komak ibailiunia tobat Sapou.

¹⁹ Lepa nenda tugalai leu rua tabbot Sapou, sara sibara ka kulit biribiri simanteu sibonanakenen, samba ka uddutnia sibara ka kulit silebbuk.

²⁰ Lepa geti galairangan sangamberi galajet Sapou simario sibara ka loina akasia.

²¹ Ka senen galajetnia pulu ngaeto nantania samba lionia sarasitengaeto.

²² Ka senen galajet Sapou ai rua arigi sipalalakke, bailiu sangamberi galajet Sapou nenda momoi itutuppaiake ka bagei.

²³ Rubeiat Sapou ka isit ka kaiaman, galai kam rua pulu galejet Sapou,

²⁴ pasamba epat pulu bongennia sibara ka perak, rua pulu bongen ka senen tei senen galajet Sapou ka rua ariginia.

²⁵ Rubeiat Sapou ka isit ka bare, galai kam rua pulu galajet

²⁶ pasamba epat pulu bongennia sibara ka perak, rua bongen ka tei senen galajet Sapou.

²⁷ Rubeiat Sapou ka teitei isit ka sikaleleu, galai kam enem galajet Sapou

²⁸ samba rua galajet ka sangamberi taimingnia ka isit kateitei.

²⁹ Ka rua lappri nenda rua ariginia ka isit ka repe samba kisedda leuet rua ariginia ka isit ka pata, kabebet letcu sikasara nenda, kisedda te aragalainia sirimanua rua lappri ka rua taimingnia.

³⁰ Oto sangambernia ai balu galajet pasamba pulu enem bongen perak, rua bongen ka tei ka senen galajet.

³¹ Lepa galairangan pulu lima littengaakenen sibara ka loina akasia, lima ka galajet ka sara bebet Sapou,

³² lima ka bebenia bagei, samba lima minca ka bebet Sapou rubeiat ka teitei isit ka sikaleleu.

³³ Loina simalittenga ka talaga, buita tugalai buaknia iletalagat galajet, barania ka tu'tu sege ka tutut Sapou nenda.

³⁴ Galajet Sapou samba sangamberi loina littengaakenen nenda tulakkeki pasamba mas, lepa kau letcu mas pasibulungan sangamberi loina nenda.

³⁵ Galairangan leu et komak matatbaliu sibara ka komak simaalit baga sigalai ka komak simalimun, simasurou samba simabonan, lepa tusuilak pasamba tularat kappot malaika.

³⁶ Pasitoak komak nenda tugalai epat arigi sibara ka loina akasia silakkeki mas pasamba susuilak mas samba tukau epat bongen sigalai sibara ka perak.

³⁷ Lepa galairangan komak kekre ka matatbaliu Sapou sibara ka komak simaalit sitikai pasamba komak simalimun, simasurou samba simabonan samba tupalainge pasamba senengamata pulaingean.

³⁸ Pasitoangan komak kekret matatbaliu nenda tugalai lima arigi situppai pasamba sangamberi sasakkut. Sangamberi ngungunia samba sangamberi pasituppai ka lima arigi nenda tulakkeki pasamba mas, tapoi ka lima bongennia tugalai sibara ka tembaga.