2Mos. 35 - BUKO SIPUNENAN

Pasirepdeman masipuneni gogoi Sabat

¹ Ruruakenangan si Mose sangamberi tai Israel lepa kuanangan katubutda, “Nene te tiboiet Tuhan galaiakenenmui.

² Enem ngagogoi burunia nugalai kam galajetmui, tapoi gogoi sikapitu iate gogoi puariat, gogoi sabeu sikokoiakenen kai Tuhan. Kasei sipugagalai ka gogoi Sabat buita tuukum ukum simateiakenen.

³ Ka gogoi nenda tamomoi masiobekngake obengan ka lalepmui.”

Panguruatakenen ka Sapou Tuhan

⁴ Kuanangan si Mose katubutda tai Israel, “Kisene te sikuat Tuhan:

⁵ Ambit kam panguruat katubut Tuhan. Kasei sikua kapatutatnia, buita ipanguruatnake mas, perak samba tembaga,

⁶ komak simaalit baga, komak simalimun, simasurou samba simabonan. Komak sigalai sibara ka bulut kambing;

⁷ kulit biribiri simanteu sibonanakenen, kulit silebbuk, loina akasia,

⁸ tulat alito, pusinginan pakeiet tulat pasisukat samba kumanyang sibara ka pungisinan,

⁹ bukku simakeppu saki sipuoni delima samba pulaingean bagei lakkeakenen ka leppei efod samba tabbot ru'rukat Imam Sabeu.”

¹⁰ “Sangamberi siagai kabei katalagamui buita moi sia masigalai sangamberi sikoiniakenen Tuhan iate:

¹¹ Sapou, tobat samba tabbonia sasakkut samba tolatnia, loina simalittenga, arigit matatbaliu samba bongennia.

¹² Peti Pakerekat Baga pasamba loina pasibairatnia, tabbonia samba komak pasitabbonia,

¹³ kudduat pasibuluat pasamba loina pasibairatnia, sangamberi pugalainia samba roti komen sigalakakenen,

¹⁴ reret alito pasipato pasamba pugalainia, alito pasamba tulania,

¹⁵ kudduat pasibuluat kudduat masilabo kumanyang pasamba loina pasibairatnia, tulat pasisukat, kumanyang simasingin, kekret matatbaliu Sapou,

¹⁶ kudduat pasibuluat buluakenen rarangen pasamba ra'rakatnia sibara ka tembaga, loina pasibairat pasamba sangamberi pugalainia, kudduat oinan pasibui, samba bongennia,

¹⁷ sangamberit komak ka laibokat, sangamberi arigi pasamba bongennia, kekret matatbaliu gugurukat laibokat,

¹⁸ sangamberi turi' samba apprat Sapou samba laibokat,

¹⁹ leppei imam kateteret rapugalai ka Bilik Sipunenan samba bibilet sabeu addeat Imam Aron, samba tatogania.”

²⁰ Lepa geti putuituirangan sangamberi tai Israel ka matat Mose,

²¹ samba kasei le sikua kapatuatnia, oi sia samba ambitrangan panguruat katubut Tuhan masisutnake bibilet ka Sapou Tuhan. Ambitrangan leu et sangamberi pakeiet ka parurukat samba bibilet imam.

²² Kasei le siobania, taimanteu ele tainnalep, oi sia masiambit subang, sipsip, inu samba sangamberi ngamataat pulaingean mas panguratnakenen katubut Tuhan.

²³ Senen sirimanua sibara komak simaalit baga, komak simalimun, simasurou, simabonan, komak sigalai ka bulut kambing, kulit biribiri simanteu sibonanakenen, ele kulit silebbuk panguruatnakerangan bibilet nenda.

²⁴ Senen sirimanua sioi masipanguruatnake perak ele tembaga, ambitrangannia kai Tuhan. Kisedda leu et ragagalaiake sangamberi sirimanua sibara loina akasia ka galajet masirioake Sapou nenda.

²⁵ Senen tainanalep siagai masiputre masiambit komak simaalit baga, komak simalimun, simasurou samba simabonan silepa ragalai.

²⁶ Sia leu et masiputre banang sibara ka bulut kambing.

²⁷ Sangamberi saute masiambit bukku simakeppu saki sipuoni delima samba sangamberi simakirisau bagei lakkeakenen ka efod samba tabbot ru'rukat,

²⁸ pasingin-singin, tulat alito, tulat pasisukat samba kumanyang simasingin.

²⁹ Sangamberi tai Israel kabagat teu bagatda masiambit panguruat katubut Tuhan masutnake galajet sikoiniakenen Tuhan kai Mose.

Sipasigagalai Sapou Tuhan

³⁰ Iageti kuanangan si Mose katubutda tai Israel, “Aipilingan si Tuhan si Bezaleel togat Uri, punuteteu Hur sibara ka muntogat Jehuda,

³¹ samba aipanguruaningannia Ketcat Tuhan. Taikamanua masikau katubunia agai kolou, puagaijat ka senengamata galaiakenen,

³² iate masigalai senengamata isiat galaiakenen bule tugalai sibara ka mas, perak samba tembaga;

³³ masiruggui bukku simakeppu saki sipuoni delima lakkeakenen; bule itupae loina samba senengamata galajet galaiakenen siisiakenen nenda.

³⁴ Katubut Bezaleel samba Oholiab, togat Ahimelekh sibara ka muntogat Dan, Aikauan si Tuhan puagaijat masigelaiake puagaijatda ka sirimanua sabagei.

³⁵ Tuhan masikau puagaiajatda senengamata galaiakenen siagai mamae', siisiake galaiakenen samba agai masiputre komak simaalit baga, komak simalimun, simasurou samba simabonan, samba komak bagei. Sia te siagai masiisiake galaiakenen samba senengamata galajet.