2Mos. 34 - BUKO SIPUNENAN

Rua bukku lei sibau

¹ Iageti kuanangan si Tuhan katubut Mose, “Pae rua bukku lei kele siboiki. Kusuratnake te geti ka bukku lei nenda sangamberi surukatKu kele sitususurat ka bukku lei sigatcaakenennu nenda.

² Mansep simaseman patarek tubum manatra ka leleu Sinai masipatiboake Aku ka uddut leleu nenda.

³ Bui ibara berisara sia sipasitutut ekeu ka leleu nenda samba bui ramakoinong berisara sirimanua ka sangaliot leleu nenda. Beringan jaui samba biribiri tamomoi ipukom turuturu ka reret leleu nenda.”

⁴ Lepa geti paenangan si Mose rua bukku lei sibau, samba ka mansepnia bulat simanseman ambitnangannia ka uddut leleu Sinai kele sikuat Tuhan katubumui.

⁵ Iageti gorosot si Tuhan kabagat tanai rusa, purionangan pasamba si Mose ka kudduat nenda, samba kuanangan oniNia sipunenan, iate Tuhan.

⁶ Lepa geti tusabaunangan si Tuhan ka matat Mose samba kuanangan, “Aku Tuhan, iate Taikamanua simasun anggai baga samba punununtut baga. Nuntut bagaKu ta magulai, matopit Aku samba ta maruei mugolu.

⁷ Mariuriu le kupunutuki baga sipuriribu reddenan samba masiappeake puseleat samba jo, tapoi sirimanua sitaibauake patuatnia bulat ta Kubebelaakenia ka ukuman, samba Kuukum leu et tatoga samba sapunuteteura teret reddenan sikatelu samba sikaepat kalulut jotda saepputda.”

⁸ Tetere nenda leu et purekkukanangan si Mose manindou.

⁹ Kuanangannia, “Tuhan, ke bulatnia makiliu bagam katubukku, kutiddou oi Tuhan, bule Nuoba muenung pasambamai. Kirenangan paamian nenda makela patuatda, tapoi appeake le sele samba jomai samba silo le kai sibailiu paamianNu.”

¹⁰ Kuanangan si Tuhan katubut Mose, “Kineneiget Kugalai palelengan pasamba tai Israel. Kugagalai te geti kerek sitapei amuaili ka sangaliot polak. Sangamberi sirimanua raitco te geti sangamberi kerek sigalaiakenenKu, aipoi Aku, Tuhan masigalaiake geti bulat siabeu ka kam.

¹¹ Reddet kam sangamberi surukat siakeKu katubumui gogoi nene. Kututuituiake te geti tai Amori, Kanaan, Het, Feris, Hewi samba tai Jebus ka matamui.

¹² Bui te nugalai kam palelengan pasamba sangamberi sikudduiji laggai ailiakenenmui, kalulut nenda momoi ibailiu luluplup sibaraake kamateiatmui.

¹³ Oto, bui te nugalaiake kisedda, tapoi bukkatnake le sangamberi kudduat pasibuluatda, ragatanake sangamberi arigit buluatda samba tadde kam sangamberi arigit Asyera sabulungan sinanalep, buluijietda.

¹⁴ Bui nupanindogi taikamanua bagei, aipoi Aku Tuhan, iate Taikamanua sitaioba tupakereake pasamba aponia pa.

¹⁵ Bui nubaraake palelengan pasamba silaggaiji ka laggai nenda, aipoi kateteret rapaninndogi samba rapanguruatnake buluakenen katubut taikamanuanda, na'narangan geti kam, samba tutakemuian sia.

¹⁶ Ke mutalimou tatogamui ka tainanalep siooiake, na'narangan geti sia tainanalep nenda bule rakaddiuake Aku samba rapanindogi sangamberi taikamanuanda.

¹⁷ Bui nugalai samba nupanindogi tularat sigalai sibara ka mas.

¹⁸ Punenake kam Punen Roti sitasioman. Kele sikuakKu katubumui, buita nukom kam roti sitasioman pitu ngagogoi burunia ka laggo Abib, kalulut ka laggo nenda te anubela kam ka laggai Misir.

¹⁹ Senen tatoga taimanteu sikebbukat samba tarimeu simanteu sipututu mata siboiki iate Aku sibakkatnia,

²⁰ tapoi buita nutebui kam togat kalidei sipututumata siboiki iate sangamuneng togat biribiri sibailiu sailinia. Ke ta noba kam masitebui, buita nubakbakngake kam lolokkat kalidei nenda. Senen tatogamui simanteu sikebbukat buita nutebui kam. Taanai berisara sirimanua momoi katubukKu ke ta iambit panguruat.

²¹ Enem ngagogoi burunia nupugalai, tapoi ka gogoi sikapitu, buita muari ekeu, kenanen poi nenda tetere pasikuilukat ele gogoi pasimoneian.

²² Punenake kam Punen Pasimoneiat kateteret nutadda kam masimonei buat gandum siboiki. Punenake leu kam Punen Pusasapou Buluk ka pangampulat rura, kateteret nupasiappek kam sangamberi buat siureman.

²³ Telu ngaminca sangarura sangamberi taimanteu buita moi sia masipanindogi Aku, Tuhan Taikamanuan Israel.

²⁴ Lepat Kutuituiake sangamberi sirimanua ka matamui samba Kulioake kupkumen laggaimui, berisara sia geti simagege masioppu laggaimui kateteret nuei kam masipunenake Punen Roti Sitasioman, Punen Pasimoneiat samba Punen Pusasapou Buluk.

²⁵ Kateteret nupanguruatnake kam buluakenen ja'jaket, bui nupanguruatnake aponia pa sibara sioman. Tarimeu simateiakenen buluakenen ka Punen Kabelaiat buita nusappruake kam ka soibo nenda leu et; bui ibara legeinia teret imapato.

²⁶ Ka senen rura buita nuambit kam ka Uman Tuhan Taikamanuamui bua siboiki bulat simaeru sibara ka polakmui. Akkulat togat biribiri ele togat kambing tamomoi ituseu pasamba suat tottot inania.”

²⁷ Kuanangan si Tuhan katubut Mose, “Suratnake sangamberi tiboiet nenda, kalulut tiboiet nenda Aku masigalai palelengan pasamba ekeu samba pasamba tai Israel.”

²⁸ Epat pulu ngagogoi, epat pulu ngasoibo burunia si Mose mukuddu sedda pasamba si Tuhan, samba burunia nenda ta amukom samba ta mulonia. Sangamberi tiboiet palelengan nenda, iate Surukat Taikamanua Sipulungamata, sisuratakenen ka bukku lei.

Tugorosot si Mose barania ka leleu Sinai

²⁹ Kateteret aitugorosot si Mose barania ka leleu Sinai ambitnangan rua bukku lei sitususurat Surukat Sipulungamata nenda, pumataatnia matoro kalulut apatibongan sia pasamba si Tuhan, tapoi si Mose geti ta iagai putotorot pumataatnia.

³⁰ Si Aron samba sangamberi tai Israel geti airaitco putotorot pumataat Mose, samba maloto sia ralegerinia.

³¹ Tapoi sogainangan sia si Mose, iageti si Aron samba sangamberi sikebbuat laggai Israel legerirangannia, samba panibonangan si Mose katubutda.

³² Lepa nenda parururangan sangamberi tai Israel ragoiliknia, samba segeakenangan si Mose katubutda sangamberi surukat siaket Tuhan ka uddut leleu Sinai.

³³ Lepat aipanibo katubutda si Mose tabbonangan matania pasamba komak.

³⁴ Senen ituguru' si Mose kabagat Sapou Tuhan patibo kai Tuhan, bukanangan komak nenda teret ibela ka Sapou Tuhan. Lepa nenda segeakenangan ka tai Israel sangamberi patonekat Tuhan,

³⁵ samba itcorangan pumataat Mose aimutotoro. Iageti tabbonangan minca pumataatnia pat aili ituguru minca ka Sapou Tuhan ipatibo kai Tuhan.