2Mos. 33 - BUKO SIPUNENAN

Si Tuhan masikoiniake tai Israel masikaddiuake leleu Sinai

¹ Iageti kuanangan si Tuhan katubut Mose, “Kaddiuake kam kudduat nene samba kenan kam sambamui paamian siambit sibara ka Misir nenda ka laggai sipalelekKu katubut Abraham, Ishak samba Jakob samba leu sapunuteteura.

² Kukokoiniake te geti sara malaika masipalulu kam. Kututuituiake te geti tai Kanaan, Amori, Het, Feris, Hewi samba Jebus.

³ Nuailiake kam ka polak simalilimai susu samba suat mani. Tapoi Aku geti tamomoi pasambamui, bule ta kusubuake kam ka tengan enungan, aipoi kam nene paamian simakela patuat.”

⁴ Kele araarep tiboiet palotokat kalotoakenen nene, pureureurangan baga samba berisara sia sipakei pulaingean.

⁵ Kuanangan si Tuhan katubut Mose, “Kua katubutda tai Israel: Kam nene iate paamian simakela patuat. Ke muenung Aku pasambamui subuakekungan kam. Kalulut nenda, rubba kam pulaingeanmui, bailiu teuakekungan galaiakenenKu geti katubumui.”

⁶ Oto barania arakaddiuake leleu Sinai tai Israel taan arapekei pulaingeanda.

Sapou Tuhan

⁷ Ka senen rapusapou tai Israel, rioakenangan sapou si Mose simakareunan ka pusapougatda. Sapou nenda ioniake Sapou Tuhan, samba kasei sioba masitiddou nganturat Tuhan, momoi iei ka Sapou nenda.

⁸ Ke mei si Mose ka Sapou nenda, sangamberi tai Israel murio ka matatbaliu gugurukat Sapou samba lelekakerangan si Mose teret ituguru' ka Sapou nenda.

⁹ Lepat aituguru' si Mose, gorosot tanai rusa sipususumbulat samba puarinangan ka matatbaliu Sapou. Ka tanai rusa nenda panibonangan si Tuhan kai Mose.

¹⁰ Kateteret araitconia tai Israel tanai rusa ka matatbaliu Sapou Tuhan, puriorangan sangamberitda samba purekkukrangan ka matatbaliu senesenen sapoura.

¹¹ Panibonangan si Tuhan kai Mose sipamamatai, kele sirimanua sipatitibo ka aleinia. Lepa nenda toili si Mose ka pusapougat. Tapoi si Josua togat Nun, sara silainge sipasirorop si Mose, riuriu le ikuddu kabagat Sapou nenda.

Tuhan masigalai palelengan ipasikeli paamianNia

¹² Ka sara gogoi kuanangan si Mose katubut Tuhan, “Tuhan, Ekeu masikoiniake aku masipalulu paamian nene ka laggai sipalelekNu. Tapoi ta anukua kasei Nukokoiniake geti masiropake aku. Tuhan, Ekeu masikua, Nuagai aku, samba makiliu bagam katubukku.

¹³ Oto kineneiget, paagaian le aponia sipinatum Tuhan, bule ioi kugalaiake galajetNu samba mariuriu kuangkaake bagam. Repdem paamian nene anupilingan ibailiu bakkatNu.”

¹⁴ Kuanangan si Tuhan, “Kupasikeli te geti ekeu samba Kuake puaraugat katubum.”

¹⁵ Aleginangan si Mose, “Ke ta nupasikeli kai, bui nukoiniake kai masikaddiuake kudduat nene.

¹⁶ Kipa raagainia sirimanua, kiliu bagam katubukku samba ka paamian nene, ke ta nuropake kai? Kababarat Tuhan katalagamai masibaggei kai ka sangamberi sirimanua ka polak.”

¹⁷ Kuanangan si Tuhan katubut Mose, “Aile Kusutnake panindogatnu, kalulut Kuagai ekeu samba makiliu bagakKu katubum.”

¹⁸ Lepa tidounangan si Mose, “Tuhan, patoila le toro kababaram katubukku.”

¹⁹ Aleginangan si Tuhan, “Tusasabau geti Aku pasamba sangamberi pulatsananKu ka matam, samba masisogaake oningKu sipunenan. Aku te Tuhan, samba Kupatoila te anggai baga samba nuntut baga katubut sangamberi sirimanua sipilikKu.”

²⁰ Kuanangan minca si Tuhan, “Ta nuom numattai mataKu, aipoi tamomoi raitco Aku sirimanua mariuriu rapurimanua.

²¹ Ka bebeKu ai leleu bukku bulak, momoi nupurio sedda.

²² Kateteret itusabau toro kababarakKu, guruakekungan ekeu kabagat paoggangan leleu bukku bulak nenda samba tabbokungan ekeu kabeiKu teret Kutusabau.

²³ Lepa tiktikungan kabeiKu bule ioi nuitco Aku ka teitei, tapoi mataKu geti ta nuitco.”